Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

21 փետրվարի 2011թ. ք. Երևան

ԵԿԴ-0004/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Տ. Գրիգորյան,

մեղադրող`
ՀՀ գլխավոր դատախազության
պատիժների և հարկադրանքի այլ միջոցների
կիրառման օրինականության նկատմամբ
հսկողություն իրականացնող վարչության
դատախազ Զ. Ստեփանյան,




դատարանում, դռնբաց դատական նիստում քննեց գործն ըստ մեղադրանքի
Հրաչիկ Սերգեյի Աղեկյանի`
ծնված 21.09.1952թ. Երևանում, հայ, Հայաստանի Հանրապետության /այսուհետ ՀՀ/ քա¬ղա¬քա¬ցի, միջնակարգ կրթությամբ, ամուսնացած, խնամքին ոչ ոք, բնակվել է Երևանի Վարշավյան փողոցի թիվ 2 շենքի թիվ 5 բնակարանում, ունի մեկ չմարված դատվածություն` Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 17.06.2010թ. դատավճռով, ՀՀ քրեական օրենսգրքի 266-րդ հոդվածի 4-րդ մասով և 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 66-րդ հոդվածի կիրառմամբ դատապարտվել է ազատազրկման 1 /մեկ/ տարի ժամկետով և տուգանքի 100.000 ՀՀ դրամ գումարի չափով, պատժի սկիզբը հաշվելով 19.03.2010թ.-ից, ունի ազատազրկման ձևով պատժի չկրած մաս` 26 օր ժամկետով։ Սույն քրեական գործով խափանման միջոց չի ընտրվել, մեղադրվում է ՀՀ քրեական օրենսգրքի 34-268-րդ հոդվածի 2-րդ մասի 1-ին կետով։

Գործի դատավարական նախապատմությունը

Թիվ 15103810 քրեական գործը ՀՀ ոստիկանության Երևան քաղաքի քննչական վարչության Կենտրոնականի քննչական բաժնում հարուցվել է 25.10.2010թ., ՀՀ քրեական օրենսգրքի 266-րդ հոդվածի 2-րդ մասի 3-րդ կետով և 34-268-րդ հոդվածի 1-ին մասով, անհայտ անձի կողմից ՀՀ ԱՆ «Դատապարտյալների հիվանդանոց» ՔԿՀ-ի դատապարտյալ Հրաչիկ Աղեկյանին զգալի չափերի «բուպրենորֆին» տեսակի թմրամիջոց իրացնելու և Հրաչիկ Ղազարի Աղեկյանի կողմից առանց իրացնելու նպատակի զգալի չափերի թմրամիջոց պահելու փորձի փաստի առթիվ։
Քննիչի 24.12.2010թ. որոշմամբ քրեական գործով Ալվարդ Սավգուլյանի կողմից թմրամիջոց փոխանցելու փորձի դեպքի վերաբերյալ նրա նկատմամբ քրեական հետապնդում չի իրականացվել` Ա. Սավգուլյանի արարքում հանցակազմի բացակայության պատճառաբանությամբ։
Քննիչի 24.12.2010թ. մեկ այլ որոշմամբ, քրեական գործով ինքնությունը չպարզված անձի կողմից Հրաչիկ Աղեկյանին 0,0029 գրամ քաշով «բուպրենորֆին» տեսակի թմրամիջոցն ապօրինի իրացնելու վերաբերյալ մասն անջատվել է, քննությունը շարունակվել է առանձին վարույթում` 15115210 համարի տակ։
Ամբաստանյալ Հրաչիկ Ղազարի Աղեկյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի 2-րդ մասի 1-ին կետով հետևյալ արարքի համար. <<որ նա` Երևանի Արաբկիր-Քանաքեռ և Զեյթուն վարչական շրջանների ընդհանուր իրավասության առաջին ատյանի դատարանի 2010թ.-ի հունիսի 17-ի դատավճռով դատապարտված լինելով ՀՀ քրեկան օրենսգրքի 268 հոդվածի 2-րդ մասի 2-րդ կետով, 266 հոդվածի 4-րդ մասով, պատիժը կրելով Հայաստանի Հանրապետության արդարադատության նախարարության «Դատապարտյալների հիվանդանոց» քրեակատարողական հիմնարկում, կրկին անգամ, առանց իրացնելու նպատակի փորձել է իրականացնել «Բուպրենորֆին» տեսակի թմրամիջոցի ապօրինի շրջանառություն, որը կայացել է հետևյալում`
Հանձնուք ստանալու պատրվակի տակ դատապարտյալ Հրաչիկ Աղեկյանը 2010 թվականի հոկտեմբերի 17-ին 077-36-88-85 բջջային համարով զանգահարել է ծանոթ Ալվարդ Ղազարի Սավգուլյանին և խնդրել իրեն սիգարետ բերել, ինչպես նաև հաջորդ օրը` հոկտեմբերի 18-ին` առավոտյան ժամը 10։00-ի սահմաններում լինել կրկեսի մոտ, որտեղ իր ծանոթը իրեն կփոխանցի հանձնուքը։
Այնուհետև թմրամիջոց ձեռք բերելու համար կրկին անգամ զանգահարել է Ալվարդ Սավգուլյանին և խնդրել իրեն փոխանցվող «իրիս» տեսակի կոնֆետները վերցնել իր կողմից մատնանշված անձից և սիգարետների հետ փոխանցել իրեն։
Ա. Սավգուլյանը 2010թ.ի հոկտեմբերի 18-ին Երևան քաղաքի կրկեսի շենքի մոտակայքում հանդիպել է Հ. Աղեկյանի մատնանշված քննությամբ դեռևս չպարզված անհայտ անձին և վերցրել նրանից «իրիս» տեսակի կոնֆետները, որոնցից մեկի մեջ նախապես թաքցված է եղել դեղահաբ` «բուպրենորֆին» տեսակի թմրամիջոցի պարունակությամբ։
Ա. Սավգուլյանը անտեղյակ լինելով «իրիս» կոնֆետի մեջ թաքցված թմրամիջոցի առկայության մասին նույն օրը սիգարետները և իրիս տեսակի կոնֆետները Հրաչ Աղեկյանին հանձնելու նպատակով բերել է «Դատապարտյալների հիվանդանոց» քրեակատարողական հիմնարկ և հանձնել այն։
«Դատապարտյալների հիվանդանոց» քրեակատարողական հիմնարկի աշխատակիցների կողմից հանձնուքի զննման ժամանակ «իրիս» տեսակի կոնֆետների մեկի միջից հայտնաբերվել է դեղահաբ, որի մեջ առկա է եղել զգալի չափերի հասնող 0,0029 գրամ քաշով բուպրենորֆին տեսակի թմրամիջոցը և առգրավվել այն, որի հետևանքով Հ. Աղեկյանը իր կամքից անկախ հանգամանքներով հանցագործությունն ավարտին չի կարողացել հասցնել։»։
2010թ. դեկտեմբերի 28-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Հրաչիկ Ղազարի Աղեկյանը 17.06.2010թ. Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատավճռով, ՀՀ քրեական օրենսգրքի 268-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով դատապարտվելով ազատազրկման մեկ տարի ժամկետով և տուգանքի 100.000 ՀՀ դրամ գումարի չափով, ազատազրկման ձևով պատիժը կրել է Երևանի Արշակունյաց 2 հասցեում գտնվող, ՀՀ ԱՆ «Դատապարտյալների հիվանդանոց» քրեակատարողական հիմնարկում։ Այդտեղ, դատապարտյալ Հրաչիկ Աղեկյանը կրկին անգամ, գործով չպարզված անձից, առանց իրացնելու նպատակի ցանկացել է ապօրինի ձեռք բերել զգալի չափի` 0,0029 գրամ քաշով «բուպրենորֆին» տեսակի թմրամիջոց հետևյալ հանգամանքներում.
Ամբաստանյալ Հրաչիկ Աղեկյանը 2010 թվականի հոկտեմբերի 17-ին, հանձնուք ստանալու պատրվակով, իր կողմից օգտագործվող 077-36-88-85 հեռախոսահամարից զանգահարել է իր ծանոթ, վկա Ալվարդ Սավգուլյանին և խնդրել իր համար ծխախոտ տանել քրեակատարողական հիմնարկ, ինչպես նաև հոկտեմբերի 18-ին, ժամը 10։00-ի սահմաններում Երևանի կրկեսի մոտ հանդիպել իր ծանոթին և նրա տված հանձնուքը փոխանցել իրեն։ Որպես հանձնուք փոխանցման ենթակա կոնֆետում թաքցված թմրամիջոցը ձեռք բերելու նպատակով` Հ. Աղեկյանը կրկին անգամ զանգահարել է Ալվարդ Սավգուլյանին և խնդրել իր կողմից մատնանշված անձից վերցնել «Իրիս» տեսակի կոնֆետները և ծխախոտի հետ փոխանցել իրեն։
2010թ. հոկտեմբերի 18-ին, Երևանի կրկեսի շենքի մոտ վկա Ա. Սավգուլյանը հանդիպել է ամբաստանյալ Հ. Աղեկյանի նշած, քննությամբ չպարզված անձին և նրանից վերցրել «Իրիս» տեսակի կոնֆետները, որոնցից մեկի մեջ նախապես թաքցված է եղել 0,0029 գրամ քաշով, այսինքն զգալի չափի «բուպրենորֆին» տեսակի թմրամիջոց պարունակող դեղահաբ։ Անծանոթ անձը նաև հյուրասիրել է Ա. Սավգուլյանին` վեց հատ կոնֆետ նվիրելով նրան։ Ա. Սավգուլյանն անտեղյակ լինելով հանձնուքի կոնֆետի մեջ թաքցված թմրամիջոցի մասին` նույն օրը ծխախոտ, թեյ և «Իրիս» տեսակի կոնֆետները տարել է ՀՀ ԱՆ «Դատապարտյալների հիվանդանոց» քրեակատարողական հիմնարկ ու հանձնել այդ հիմնարկի աշխատակիցներին` Հրաչ Աղեկյանին փոխանցելու համար։ ՀՀ ԱՆ «Դատապարտյալների հիվանդանոց» քրեակատարողական հիմնարկի աշխատակիցների կողմից «Իրիս» տեսակի կոնֆետների մի մասը զննվել և փոխանցվել է դատապարտյալ Հ. Աղեկյանին, իսկ մնացած մասի զննությունը շարունակվել է։ Հ. Աղեկյանը ստանալով կոնֆետները` փշրել է դրանք և փնտրել թմրամիջոցը, սակայն չգտնելով այն` զանգահարել է վկա Ա. Սավգուլյանին և հետաքրքրվել, թե ինչու կոնֆետներն ամբողջությամբ չեն փոխանցվել իրեն։ Այնուհետև նա պահանջել է Ա. Սավգուլյանից` կոնֆետները բերած անձին վերադարձնել նրա կողմից հյուրասիրած կոնֆետները, որն Ա. Սավգուլյանը կատարել է` անծանոթին կրկին վերադարձնելով նրա կողմից հյուրասիրած վեց կոնֆետները։ Այդ ընթացքում, ՀՀ ԱՆ «Դատապարտյալների հիվանդանոց» ՔԿՀ-ում, կոնֆետների մնացած մասի զննության ընթացքում, դրանցից մեկի միջից հայտնաբերվել է դեղահաբ, որի մեջ առկա է եղել զգալի չափերի` 0,0029 գրամ քաշով «բուպրենորֆին» տեսակի թմրամիջոց։ Դեղահաբն առգրավվել է, որի հետևանքով Հ. Աղեկյանն իր կամքից անկախ հանգամանքներում չի կարողացել այն ձեռք բերել։
Քրեական գործի նախաքննության ընթացքում կատարվել է տոքսիկոքիմիական փորձաքննություն ՀՀ ԳԱԱ «Փորձաքննությունների ազգային բյուրո» պետական ոչ առևտրային կազմակերպության կողմից, որի արժեքը կազմել է 56.334 /հիսունվեց հազար երեք հարյուր երեսունչորս/ ՀՀ դրամ գումար։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Վկա Ալվարդ Ղազարի Սավգուլյանի ցուցմունքով այն մասին, որ Հրաչիկ Աղեկյանի ընտանիքի հետ մտերիմ է եղել։ Մի քանի անգամ Հ. Աղեկյանի համար ծխախոտ, քաղցրավենիք և այլ կենցաղային իրեր է տարել ՀՀ ԱՆ «Դատապարտյալների հիվանդանոց» քրեակատարողական հիմնարկ, որտեղ նա պատիժ է կրել։ 2010թ. հոկտեմբերի 17-ին Հ. Աղեկյանը 077-36-88-85 հեռախոսահամարից զանգահարել է իրեն և խնդրել իր համար ծխախոտ տանել քրեակատարողական հիմնարկ։ Նա նաև խնդրել է հոկտեմբերի 18-ին Երևանի կրկեսի մոտ հանդիպել մի անձի, նրանից հանձնուք վերցնել և փոխանցել իրեն։ 2010թ. հոկտեմբերի 18-ին, ժամը 10։00-ի սահմաններում, Երևանի կրկեսի մոտ ինքը հանդիպել է նշված անծանոթ անձին, որն իրեն է փոխանցել Հ. Աղեկյանի համար նախատեսված հանձնուքը։ Միաժամանակ գրպանից հանելով «Իրիս» տեսակի մի քանի կոնֆետներ` նա հյուրասիրել է իրեն։ Հանձնուքն ինքն օրինական կարգով հանձնել է «Դատապարտյալների հիվանդանոց» ՔԿՀ-ի աշխատակիցներին։ Նույն օրը Հ. Աղեկյանը կրկին զանգահարել է իրեն և հետաքրքրվել, թե արդյոք ինքը չի կերել անծանոթի կողմից տված կոնֆետները, որին ինքը բացասական պատասխան է տվել։ Հ. Աղեկյանն ասել է, որ այդ կոնֆետներն իրեն անհրաժեշտ են և խնդրել է դրանք հետ վերադարձնել իր ծանոթին։ Լևոն Շանթի անվան դպրոցի մոտ ինքը դարձյալ հանդիպել է Հ. Աղեկյանի ծանոթին և կոնֆետները հետ է վերադարձրել նրան։
Ինքը տեղյակ չի եղել, որ հանձնուքի մեջ թմրամիջոց է եղել, այդ մասին ոչ ոք իրեն ոչինչ չի ասել։ Իր կողմից տրված հանձնուքի մեջ հայտնաբերված թմրամիջոցի մասին ինքը տեղեկացել է «Դատապարտյալների հիվանդանոց» ՔԿՀ-ի աշխատակիցներից։
/դատական նիստի արձանագրություն, գ.թ. 81-84, 181-182, 207-208/։
Վկա Ալվարդ Սավգուլյանն իր նախաքննական ցուցմունքները պնդել է նաև Հրաչիկ Աղեկյանի հետ առերես հարցաքննության ժամանակ։
/գ.թ. 184-185/։
Մեղադրող կողմի միջնորդությամբ դատարանում որպես վկա հարցաքննված Մանուկ Միքայելյանի ցուցմունքով այն մասին, որ աշխատում է ՀՀ ԱՆ «Դատապարտյալների հիվանդանոց» քրեակատարողական հիմնարկում։ Ամբաստանյալ Հ. Աղեկյանը բուժում է ստացել քրեակատարողական հիմնարկի թոքախտաբանական բաժանմունքում և բնակվել է բաժանմունքի թիվ 201 սենյակում։ 2010թ. հոկտեմբերի 18-ին օպերատիվ տեղեկություն է ստացվել այն մասին, որ Հ. Աղեկյանին այդ օրը թմրանյութ պետք է փոխանցեն հանձնուքի միջոցով։ Հանձնուքը ընդունվել է սահմանված կարգով։ Հանձնուքի ծավալը մեծ լինելու պատճառով դրա մի մասը ստուգվել և հանձնվել է Հ. Աղեկյանին, իսկ մյուս մասը շարունակվել է ենթարկվել ստուգման։ Ստուգման ժամանակ կոնֆետներից մեկի մեջ հայտնաբերվել է դեղահաբ։ Այնուհետև անվտանգության աշխատակիցների կողմից խուզարկություն է կատարվել Հ. Աղեկյանի հիվանդասենյակում։ Զննվել են կոնֆետները և նրա անձնական իրերը։ Նույն հիվանդասենյակում գտնվել են ևս երկու դատապարտյալներ, որոնք նույնպես ենթարկվել են զննության։ Դատապարտյալները մատնանշել են Հ. Աղեկյանի մահճակալը, նրա պահարանը։ Խուզարկության ժամանակ Հ. Աղեկյանը գտնվել է հիվանդասենյակում։ Կոնֆետներն ափսեով գտնվել են նրա պահարանի մեջ` կոտրտված վիճակում։ Խուզարկության ժամանակ հայտնաբերվել են մի քանի դատարկ ներարկիչներ, որոնցից մեկը պահված է եղել սրբապատկերի հետևում։
/դատական նիստի արձանագրություն/։
Վկաներ, ՀՀ ԱՆ «Դատապարտյալների հիվանդանոց» ՔԿՀ-ի աշխատակիցներ Էդուարդ Մարատի Եղիազարյանի և Տիգրան Գուրգենի Սայադյանի նույնաբովանդակ ցուցմունքներով այն մասին, որ 2010թ. հոկտեմբերի 18-ին զննել են քաղաքացի Ալվարդ Սավգուլյանի կողմից դատապարտյալ Հրաչիկ Աղեկյանի համար նախատեսված հանձնուքը և այնտեղ արգելված իրեր չեն հայտնաբերել։ Հանձնուքում եղած իրերը, այդ թվում կոնֆետների մի մասը զննել և ուղարկել են դատապարտյալ Հ. Աղեկյանին, իսկ կոնֆետների մնացած մասը շարունակել են զննել, որի ընթացքում, «Իրիս» տեսակի կոնֆետներից մեկի միջից հայտաբերել են դեղահաբ։ Հետագայում իրենք տեղեկացրել են, որ զննության ժամանակ հայտնաբերված դեղահաբի մեջ առկա է եղել «բուպրենորֆին» տեսակի թմրամիջոց։
/դատական նիստի արձանագրություն, գ.թ. 102-103, 104-105/։
Վկաներ, ՀՀ ԱՆ «Դատապարտյալների հիվանդանոց» ՔԿՀ-ի աշխատակիցներ Գարեգին Ալբերտի Աթոյանի և Վարազդատ Մուրադի Արշալույսյանի ցուցմունքներով այն մասին, որ 2010թ. հոկտեմբերի 18-ին ոչ պլանային խուզարկություն են կատարել ՀՀ ԱՆ «Դատապարտյալների հիվանդանոց» քրեակատարողական հիմնարկի թոքախտաբանական բաժանմունքի թիվ 201 հիվանդասենյակում, որի ժամանակ Հրաչիկ Աղեկյանի անձնական իրերի պահարանից հայտնաբերվել են «Իրիս» տեսակի կոնֆետներ, իսկ հիմնարկի ընդհանուր օգտագործման աղբարկղից հայտնաբերվել են նույն կոնֆետների մնացորդներ և կոնֆետների թղթեր։ Դրանք աղբարկղի մեջ է նետել Հ. Աղեկյանը, երբ խուզարկություն կատարելու նպատակով հիվանդասենյակ գնալիս նրան հանդիպել են միջանցքում։ Հետագայում տեղեկացել են, որ 2010թ. հոկտեմբերի 18-ին Հրաչիկ Աղեկյանի համար նախատեսված հանձնուքի խուզարկության ժամանակ հայտնաբերված դեղահաբի մեջ առկա է եղել «բուպրենորֆին» տեսակի թմրամիջոց։
/դատական նիստի արձանագրություն, գ.թ. 123-124, 125-126/։
Վկաներ Գարեգին Աթոյանը և Վարազդատ Արշալույսյանն իրենց նախաքննական ցուցմունքները պնդել են նաև Հրաչիկ Աղեկյանի հետ առերես հարցաքննության ժամանակ։
/գ.թ. 130, 131-132/։
Վկա, ՀՀ ԱՆ «Դատապարտյալների հիվանդանոց» ՔԿՀ-ի աշխատակից Արամ Ռուբենի Գասպարյանի ցուցմունքով այն մասին, որ 2010թ. հոկտեմբերի 18-ին դատապարտյալ Լևոն Հարությունյանը, որը սովորաբար դատապարտյալների համար հանձնուքներ է փոխանցում, եկել է ՔԿՀ-ի միջանկյալ գոտի և հայտնել, որ Հ. Աղեկյանի խնդրանքով ցանկանում է ստանալ նրա համար նախատեսված հանձնուքը։ Լ. Հարությունյանը ստացել է հանձնուքը և իր ուղեկցությամբ գնացել է թոքախտաբանական բաժանմունքի թիվ 201 հիվանդասենյակ, որտեղ հանձնուքը փոխանցել է Հրաչիկ Աղեկյանին։ Հետագայում ինքը տեղեկացել է, որ 2010թ. հոկտեմբերի 18-ին Հրաչիկ Աղեկյանի համար նախատեսված հանձնուքի խուզարկության ժամանակ հայտնաբերված դեղահաբի մեջ առկա է եղել «բուպրենորֆին» տեսակի թմրամիջոց։
/դատական նիստի արձանագրություն, գ.թ. 127-128/։
Վկա Արամ Գասպարյանն իր նախաքննական ցուցմունքը պնդել է նաև Հրաչիկ Աղեկյանի հետ առերես հարցաքննության ժամանակ։
/գ.թ. 129/։
Վկա, ՀՀ ԱՆ «Դատապարտյալների հիվանդանոց» ՔԿՀ-ի դատապարտյալ Լևոն Գևորգի Հարությունյանի ցուցմունքով այն մասին, որ շուրջ երկու տարի պատիժը կրում է «Դատապարտյալների հիվանդանոց» քրեակատարողական հիմնարկում և զբաղված է դատապարտյալների համար հանձնուք տեղափոխելով։ Իր հիվանդասենյակը գտնվում է քրեակատարողական հիմնարկի երրորդ, իսկ Հ. Աղեկյանինը` երկրորդ հարկում։ 2010թ. հոկտեմբերի 18-ին, ժամը 11։00-ի սահմաններում ՔԿՀ-ի թոքախտաբանական բաժանմունքից գնացել է միջանկյալ գոտի` իր հիվանդասենյակի դատապարտյալներից մեկի համար հանձնուք տեղափոխելու նպատակով, որն իրեն խնդրել է միաժամանակ տեղափոխել նաև Հ. Աղեկյանի համար նախատեսված հանձնուքը։ Ինքը վերցրել է նաև դատապարտյալ Հրաչիկ Աղեկյանի համար նախատեսված հանձնուքը և տարել է նրա հիվանդասենյակ։ Տեսնելով, որ հիվանդասենյակում ոչ ոք չկա` ինքը հանձնուքը դրել է սեղանին և հեռացել է։
/դատական նիստի արձանագրություն, գ.թ. 106-107
Դատաքիմիական փորձաքննության 20.10.2010թ. թիվ 36651005 եզրակացությամբ այն մասին, որ`
«ա/ բ/ Փորձաքննությանը ներկայացված 1 հատ գործարանային արտադրության, 0,145 գրամ քաշով, սպիտակ գույնի դեղահատի հատվածը իր բաղադրության մեջ պարունակում է 0,0029 գրամ քաշով «բուպրենորֆին» տեսակի թմրամիջոց։»։
/գ.թ. 67-70/։
Տոքսիկոքիմիական փորձաքննության 26.10.2010թ. թիվ 10-2836 եզրակացությամբ այն մասին, որ`
«1. Հրաչ Սերգեյի Աղեկյանից վերցված մեզի և մազի փորձանմուշների մեջ հայտնաբեվել են ափիոնի խմբին պատկանող թմրամիջոցի թմրալկալոիդներ։
2. Մեզի փորձանմուշի մեջ հայտնաբերվել է ափիոիդների շարքի բուպրենորֆին տեսակի դեղամիջոցի հետքեր։
3. Փորձաքննության ներկայացված Հրաչ Աղեկյանի եղունգների կտրվածքների վրա և տակի պարունակության մեջ թմրամիջոցի` մասնավորապես ափիոնային շարքի ալկալոիդների հետքեր չկան։
4. Փորձաքննության ներկայացված Հրաչ Աղեկյանի եղունգների կտրվածքների վրա և դրանց տակի պարունակության մեջ կոնֆետի` մասնավորապես «Իրիս» տեսակի կոնֆետի հետքեր չկան։»։
/գ.թ. 87-89/։
Դատանարկոլոգիական փորձաքննության 20.12.2010թ. թիվ 363/10 եզրակացությամբ այն մասին, որ`
«Հրաչիկ Սերգեյի Աղեկյանի մոտ թմրանյութերի գործածումը կրում է էպիզոդիկ բնույթ, ուստի հարկադիր բուժման կարիք չունի։»։
Հանձնուքի ստուգման վերաբերյալ 18.10.2010թ. արձանագրությամբ և կից լուսանկարչական հավելվածով այն մասին, որ Ալվարդ Ղազարի Սավգուլյանի կողմից Հրաչիկ Աղեկյանի համար նախատեսված հանձնուքի միջից 2010թ. հոկտեմբերի 18-ին «Դատապարտյալների հիվանդանոց» ՔԿՀ-ի աշխատակիցները հանձնուքի խուզարկության ժամանակ «Իրիս» տեսակի կոնֆետներից մեկի մեջ հայտնաբերել են փայլաթիթեղով փաթեթավորված, կոտրված եզրերով, սպիտակ գույնի, 0,13 գրամ քաշով դեղահաբ։
/գ.թ. 2-6/։
«Ղ.-Տելեկոմ» և «Արմենտել» ՓԲ ընկերություններից ստացված, Հրաչիկ Աղեկյանի 077-36-88-85 և Ալվարդ Սավգուլյանի 091-65-02-86 հեռախոսահամարների հեռախոսազանգերի վերծանումներով, որոնց համաձայն 2010թ. հոկտեմբերի 17-ին և 18-ին Հրաչիկ Աղեկյանը հեռախոսակապ է հաստատել Ալվարդ Սավգուլյանի հետ։
/գ.թ. 133-150, 177-180/։
Ապացույց ճանաչված, բջջային հեռախոսը զննելու մասին արձանագրությամբ, որի համաձայն Ալվարդ Սավգուլյանին պատկանող «Նոկիա» տեսակի բջջային հեռախոսի և դրա մեջ տեղադրված 091-65-02-86 հեռախոսաքարտի զննությամբ պարզվել է, որ 2010թ.-ի հոկտեմբերի 17-ին և 18-ին Հրաչիկ Աղեկյանի կողմից գործածվող 077-36-88-85 հեռախոսահամարից հեռախոսազանգ է գրանցվել Ալվարդ Սավգուլյանի հեռախոսահամարին։
/գ.թ. 21, 242/։
Ապացույց ճանաչված, բջջային հեռախոսը զննելու մասին արձանագրությամբ, որի համաձայն «Մոտոռոլա» մոդելի բջջային հեռախոսը և 077-36-88-85 հեռախոսաքարտի զննությամբ պարզվել է, որ 2010թ.-ի հոկտեմբերի 17-ին և 18-ին 077-36-88-85 հեռախոսահամարից հեռախոսազանգ է ուղարկվել Ալվարդ Սավգուլյանի կողմից գործածվող 091-65-02-86 հեռախոսահամարին։
/գ.թ. 22, 242/։
Ապացույց ճանաչված, «Դատապարտյալների հիվանդանոց» ՔԿՀ-ի պետին ուղղված 18.10.2010թ. դիմումով, որի համաձայն` Ալվարդ Սավգուլյանը խնդրել է թույլատրել դատապարտյալ Հրաչիկ Աղեկյանի համար ընդունել 2 տուփ ծխախոտ, 1 կիլոգրամ կոնֆետ և 1 տուփ թեյ։
/գ.թ. 7, 242/։
Ապացույց ճանաչված, ՀՀ ԱՆ «Դատապարտյալների հիվանդանոց» ՔԿՀ-ի աշխատակից Է. Եղիազարյանի զեկուցագրով այն մասին, որ 2010թ. հոկտեմբերի 18-ին դատապարտյալ Հ. Աղեկյանի համար նախատեսված հանձնուքի զննության ժամանակ «Իրիս» տեսակի կոնֆետներից մեկի միջից հայտնաբերվել է սպիտակ գույնի, կոտրված եզրերով մեկ դեղահաբ։
/գ.թ. 1,242/։
Ապացույց ճանաչված, ՀՀ ԱՆ «Դատապարտյալների հիվանդանոց» ՔԿՀ-ի աշխատակից Մ. Միքայելյանի զեկուցագրով այն մասին, որ 2010թ.-ի հոկտեմբերի 18-ին թոքախտաբանական բաժանմունքի թիվ 201 հիվանդասենյակում կատարված խուզարկությամբ, Հ. Աղեկյանի անձնական իրերի պահարանից հայտնաբերվել են նրա հանձնուքի կոնֆետների կտորներ, իսկ հիմնարկի ընդհանուր օգտագործման աղբամանից հայտնաբերվել են պոլիէթիլենային տոպրակի մեջ լցված «ոսկե բանալի» անվամբ, «Իրիս» տեսակի կոնֆետի թղթի կտորներ։
/գ.թ. 9, 242/։
Ապացույց ճանաչված, թոքախտաբանական բաժանմունքի թիվ 201 հիվանդասենյակի խուզարկության վերաբերյալ 18.10.2010թ. արձանագրությամբ և դրան կից լուսանկարչական հավելվածով այն մասին, որ 2010թ. հոկտեմբերի 18-ին ՀՀ ԱՆ «Դատապարտյալների հիվանդանոց» ՔԿՀ-ի թոքախտաբանական բաժանմունքի թիվ 201 հիվանդասենյակում կատարված ոչ պլանայի խուզարկությամբ, դատապարտյալ Հրաչիկ Աղեկյանի մահճակալի հարևանությամբ գտնվող անձնական իրերի պահարանում հայտնաբերվել են ափսեում լցված «Իրիս» տեսակի կոնֆետներ, իսկ հիմնարկի ընդհանուր օգտագործման աղբարկղից հայտնաբերվել են պոլիէթիլենային տոպրակի մեջ լցված նույն կոնֆետի մնացորդներ և կոնֆետի թղթեր։
Կրտսեր ծառայողներ Դ. Աթոյանը, Վ. Արշալույսյանը և Ս. Նավասարդյանը հայտարարել են, որ դատապարտյալ Հ. Աղեկյանի անձնական իրերի պահարանից հայտնաբերված «Իրիս» տեսակի կոնֆետների կտորներն իրենք տեսել են դեռևս ցերեկային ժամերին, իսկ երբ խուզարկության նպատակով եկել են նշված հիվանդասենյակ` այդ կոնֆետների թղթերը փաթեթավորումից քանդված, լցված դեղնավուն տոպրակի մեջ, տեսել են Հ. Աղեկյանի ձեռքին, որը ցանկացել է դրանք թափել զուգարանի աղբարկղում։
/գ.թ. 13-19, 242/։
Ամբաստանյալ Հրաչիկ Սերգեյի Աղեկյանն առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ որևէ հանձնուք ինքը չի տեսել։ Կոնֆետները նախատեսված են եղել դատապարտյալներից մեկի` Սիմոնի համար։ Վերջինս անկողնային հիվանդ է և տեղեկանալով, որ իր համար ծխախոտ պետք է բերեն` խնդրել է, որ իր ծանոթը փոխանցի նաև այդ կոնֆետները։ Ինքը նրան չի մերժել։ Ինքը ոչ մի հատ կոնֆետ չի տեսել, թե հանձնուքը ով է բացել` չգիտի։ Երբ Սիմոնն ասել է, թե կոնֆետները պակաս են, ինքը զանգահարել է Ա. Սավգուլյանին և խնդրել է այն փոխանցած անձին վերադարձնել մնացածը։ Ինքը թմրանյութ չի գործածում, հիվանդանոցում է գտնվում բուժում ստանալու նպատակով։ Ուղղակի «իր գլխին սարքում են»։
/դատական նիստի արձանագրություն/։


Դատարանի իրավական վերլուծությունները.
Վերլուծելով ամբաստանյալ Հրաչիկ Սերգեյի Աղեկյանի դատաքննական ցուցմունքները, դրանք համադրելով այլ ապացույցների հետ, գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Հրաչիկ Աղեկյանի ցուցմունքներն իրականությանը չեն համապատասխանում, քրեական պատասխանատվությունից և պատժից խուսափելու նպատակ են հետապնդում և հերքվում են արդեն իսկ նշված ապացույցներով։
Վերլուծելով ամբաստանյալ Հրաչիկ Սերգեյի Աղեկյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Հրաչիկ Սերգեյի Աղեկյանի կողմից, նրա մեղավորությամբ, առանց իրացնելու նպատակի, կրկին անգամ, զգալի չափերով թմրամիջոցներ ապօրինի ձեռք բերելու փորձ կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները, ամբաստանյալ Հրաչիկ Սերգեյի Աղեկյանի նկատմամբ պատիժ նշանակելիս դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը։ Ամբաստանյալի պատասխանատվությունը և պատիժը մեղմացնող հանգամանքներ դատարանը չի արձանագրում, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցագործությունների ռեցիդիվը։
Ամբաստանյալ Հրաչիկ Սերգեյի Աղեկյանն իր կատարած` Հայաստանի Հանրապետության քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցագործության համար ենթակա է պատժի ազատազրկման ձևով, որը նա պետք է կրի։
Հաշվի առնելով, որ ամբաստանյալ Հրաչիկ Սերգեյի Աղեկյանի կողմից նոր հանցանք է կատարվել 2010թ. հունիսի 17-ի դատավճիռը կայացնելուց հետո, բայց մինչև պատժի լրիվ կրելը, դատարանը գտնում է, որ ՀՀ քրեական օրենսգրքի 67-րդ հոդվածի 1-ին մասով սահմանված կարգով, նոր դատավճռով նշանակված պատժին մասնակիորեն գումարման է ենթակա նախորդ դատավճռով նշանակված պատժի չկրած մասը։
Քննարկելով խափանման միջոցի հարցը և նկատի ունենալով, որ սույն քրեական գործով ամբաստանյալ Հ. Աղեկյանի նկատմամբ խափանման միջոց չի ընտրվել` դատարանը գտնում է, որ ամբաստանյալ Հրաչիկ Սերգեյի Աղեկյանի նկատմամբ որպես խափանման միջոց պետք է ընտրել կալանավորումը։
Քննարկելով դատական ծախսերի հարցը` դատարանը գտնում է, որ ամբաստանյալ Հրաչիկ Սերգեյի Աղեկյանից հօգուտ ՀՀ պետական բյուջեյի բռնագանձման է ենթակա տոքսիկոքիմիական փորձաքննության կատարման արժեք հանդիսացող 56.334 /հիսունվեց հազար երեք հարյուր երեսունչորս/ ՀՀ դրամ գումար` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 168-րդ, 169-րդ, 357-360-րդ, 364-366-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Հրաչիկ Սերգեյի Աղեկյանին մեղավոր ճանաչել Հայաստանի Հանրապետության քրեական օրենսգրքի 34-268-րդ հոդվածի 2-րդ մասի 1-ին կետով նախատեսված հանցանքում և դատապարտել ազատազրկման 2 /երկու/ տարի ժամկետով։ ՀՀ քրեական օրենսգրքի 67-րդ հոդվածի 1-ին մասի կիրառմամբ, նշանակված պատժին մասնակիորեն գումարել նախորդ` Երևանի Արաբկիր և Քանաքեռ-Զեյթուն համայնքների առաջին ատյանի դատարանի 2010թ. հունիսի 17-ի դատավճռով նշանակված պատժի չկրած մասից` 20 /քսան/ օր ժամկետով ազատազրկումը և ամբաստանյալ Հրաչիկ Սերգեյի Աղեկյանի նկատմամբ վերջնական պատիժ նշանակել ազատազրկում 2 /երկու/ տարի 20 /քսան/ օր ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում։
Ամբաստանյալ Հրաչիկ Սերգեյի Աղեկյանի նկատմամբ որպես խափանման միջոց կիրառել կալանավորումը, կալանավորման սկիզբը հաշվելով 2011թ. փետրվարի 21-ից։
Ամբաստանյալ Հրաչիկ Սերգեյի Աղեկյանից հօգուտ ՀՀ պետական բյուջեյի բռնագանձել 56.334 /հիսունվեց հազար երեք հարյուր երեսունչորս/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ