ԵԿԴ/0002/01/11



ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«9» մարտի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Գասպարյան

դռնբաց դատական նիստում քննեց քրեական գործն ըստ մեղադրանքի`
Արման Արմենակի Հակոբյանի` ծնված 1989 թվականի մարտի 5-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, ՀՀ ՊՆ թիվ 95532 զորամասի պայմանագրային զինծառայող, նախկինում չդատապարտված, հաշվառված է Գեղարքունիքի մարզի Փոքր Մասրիկ գյուղի 1-ին փողոցի 5-րդ նրբանցքի 4-րդ տանը, բնակվում է Արարատի մարզի Նիզամի գյուղում: Մեղադրանք է առաջադրվել ՀՀ քրեական օրենսգրքի 359-րդ հոդվածի 1-ին մասով, խափանման միջոց է ընտրվել ստորագրություն չհեռանալու մասին:
Սամվել Սարգսի Սարգսյանի` ծնված 1989 թվականի սեպտեմբերի 12-ին Գյումրի քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, ՀՀ ՊՆ թիվ 95532 զորամասի պայմանագրային զինծառայող, նախկինում չդատապարտված, հաշվառված է Գյումրի քաղաքի Երևանյան խճուղու 107ա շենքի 7-րդ բնակարանում, բնակվել է Երևան քաղաքի Սեբաստիա փողոցի 22/3 շենքի 71-րդ բնակարանում: Մեղադրանք է առաջադրվել ՀՀ քրեական օրենսգրքի 359-րդ հոդվածի 2-րդ մասի 4-րդ կետով, արգելանքի տակ է 2010 թվականի դեկտեմբերի 27-ից:
1. Գործի դատավարական նախապատմությունը.
2010 թվականի դեկտեմբերի 17-ին ՀՀ ՊՆ քննչական ծառայության 4-րդ կայազորային քննչական բաժնի քննիչ Ս.Պալյանի որոշմամբ ՀՀ քրեական օրենսգրքի 359-րդ հոդվածի 2-րդ մասի 4-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 90271110 քրեական գործը:
2010 թվականի դեկտեմբերի 27-ին ՀՀ ՊՆ քննչական ծառայության 4-րդ կայազորային քննչական բաժնի քննիչ Ս.Պալյանի որոշմամբ թիվ 90271110 քրեական գործով Արման Արմենակի Հակոբյանին մեղադրանք է առաջադրվել ՀՀ քրեական օրենսգրքի 359-րդ հոդվածի 1-ին մասով:
2010 թվականի դեկտեմբերի 27-ին ՀՀ ՊՆ քննչական ծառայության 4-րդ կայազորային քննչական բաժնի քննիչ Ս.Պալյանի որոշմամբ թիվ 90271110 քրեական գործով Սամվել Սարգսի Սարգսյանին մեղադրանք է առաջադրվել ՀՀ քրեական օրենսգրքի 359-րդ հոդվածի 2-րդ մասի 4-րդ կետով:
2010 թվականի դեկտեմբերի 30-ին Արման Արմենակի Հակոբյանի և Սամվել Սարգսի Սարգսյանի վերաբերյալ քրեական գործը մեղադրական եզրակացությամբ ուղարկվել է Դատարան:
Արման Արմենակի Հակոբյանին մեղադրանք է առաջադրվել ՀՀ քրեական օրենսգրքի 359-րդ հոդվածի 1-ին մասով` այն արարքի համար, որ նա, հանդիսանալով ՀՀ ՊՆ թիվ 95532 զորամասի 1-ին գումարտակի 2-րդ հրաձգային վաշտի 3-րդ հրաձգային դասակի 3-րդ ջոկի պայմանագրային զինծառայող, գնդացրորդ, կոչումով շարքային, 2010 թվականի հոկտեմբերի 20-ին` ժամը 14:30-ի սահմաններում, զորամասի լսարանում, ստորադասության հարաբերությունների բացակայության պայմաններում խախտելով ՀՀ զինված ուժերի ներքին ծառայության կանոնագրքի 13-րդ հոդվածի պահանջները, այն է` «զինծառայողը պարտավոր է բարձր պահել ընկերասիրությունը, հարգել ընկերներից յուրաքանչյուրի պատիվն ու արժանապատվությունը, իր և ուրիշ զինծառայողների նկատմամբ թույլ չտալ կոպտություն և ծաղրուծանակ ...», վիճաբանել է ՀՀ ՊՆ թիվ 95532 զորամասի պայմանագրային զինծառայող, շարքային Սամվել Սարգսի Սարգսյանի հետ և սեռական բնույթի հայհոյանքներ հնչեցրել վերջինի հասցեին, որոնք վիրավորել են Սամվել Սարգսյանի պատիվն ու արժանապատվությունը:
Սամվել Սարգսի Սարգսյանին մեղադրանք է առաջադրվել ՀՀ քրեական օրենսգրքի 359-րդ հոդվածի 2-րդ մասի 4-րդ կետով` այն արարքի համար, որ նա, հանդիսանալով ՀՀ ՊՆ թիվ 95532 զորամասի 1-ին գումարտակի 2-րդ հրաձգային վաշտի 3-րդ դասակի 2-րդ ջոկի պայմանագրային զինծառայող, նռնակաձիգի օգնական, կոչումով շարքային, 2010 թվականի հոկտեմբերի 20-ին` ժամը 14:30-ի սահմաններում, զորամասի լսարանում, ստորադասության հարաբերությունների բացակայության պայմաններում խախտելով ՀՀ զինված ուժերի ներքին ծառայության կանոնագրքի 13-րդ հոդվածի պահանջները, այն է` «զինծառայողը պարտավոր է բարձր պահել ընկերասիրությունը, հարգել ընկերներից յուրաքանչյուրի պատիվն ու արժանապատվությունը, իր և ուրիշ զինծառայողների նկատմամբ թույլ չտալ կոպտություն և ծաղրուծանակ ...», վիճաբանել է ՀՀ ՊՆ թիվ 95532 զորամասի պայմանագրային զինծառայող, շարքային Արման Արմենակի Հակոբյանի հետ և բռունցքով հարվածել վերջինի դեմքին` պատճառելով ստորին ծնոտի երկկողմանի կոտրվածք` հասցնելով միջին ծանրության մարմնական վնասվածք` առողջության տևական քայքայումով:
2. Ապացույցների հետազոտում և գնահատում.
Ամբաստանյալ Արման Հակոբյանն առաջադրված մեղադրանքում իրեն մեղավոր ճանաչեց և ցուցմունք տվեց այն մասին, որ հանդիսանում է ՀՀ ՊՆ թիվ 95532 զորամասի պայմանագրային զինծառայող: Ինքն ու նույն զորամասի պայմանագրային զինծառայող Սամվել Սարգսյանը ունեցել են նորմալ հարաբերություններ: Դեպքի օրը` 2010 թվականի հոկտմեբերի 20-ին, ինքն ու Սամվելը գտնվել են զորամասի լսարանում: Այդ ժամանակ իր ինքնազգացողությունը լավ չի եղել, ինչի պատճառով գլուխը դրել է սեղանին: Այդ ընթացքում Սամվելի ձեռքը սայթաքել է, որի հարվածի ձայնից ինքն անակնկալի է եկել և կարծել, որ Սամվելը միտումնավոր է հարվածել: Այդ պատճառով ինքը հայհոյել է Սամվելին, ինչից հետո իրենց միջև վեճ է սկսվել: Սամվելն իրեն մի քանի անգամ հարցրել, թե արդյոք իր հայհոյանքներն ուղղված են նրան, և ստանալով դրական պատասխան` մեկ անգամ ձեռքով հարվածել է իրեն, որի պատճառով վնասվել է իր ծոտը: Դրանից հետո ինքն ու Սամվելը խոսել են և հասկացել միմյանց: Ինքը զղջում է իր կատարած արարքի համար, ներում է Սամվելին և Սամվելից խնդրում է ներել իրեն:
Ամբաստանյալ Սամվել Սարգսյանն առաջադրված մեղադրանքում իրեն մեղավոր ճանաչեց և ցուցմունք տվեց այն մասին, որ հանդիսանում է ՀՀ ՊՆ թիվ 95532 զորամասի պայմանագրային զինծառայող: Ինքը մարզվում է բոքս սպորտաձևով: Դեպքի ժամանակ ինքը եղել է զորամասի լսարանում, որտեղ նստած են եղել ինքն ու Արմանը: Այդ պահին Արմանը գլուխը դրած է եղել սեղանին, իսկ ինքը ծնոտը հենել է իր ձեռքին: Այդ ընթացքում իր ձեռքը սայթաքել է և հարվածել սեղանին: Այդ հարվածի ձայնից Արմանն անմիջապես վեր է կացել և հայհոյել: Ինքն Արմանին մի քանի անգամ հարցրել է, թե արդյոք նրա հայհոյանքն ուղղված է իրեն, իսկ Արմանը յուրաքանչյուր անգամ տվել է դրական պատասխան, ինչից հետո ինքը կորցրել է ինքնատիրապետումը և մեկ անգամ հարվածել նրան, սակայն չի ցանկացել մարմնական վնասվածք պատճառել: Արմանի հայհոյանքը վիրավորել է իր պատիվն ու արժանապատվությունը: Երբ Արմանին տեղափոխել են հոսպիտալ, ինքը հանձնուքով գնացել է նրան տեսակցելու: Ինքը զղջում է իր կատարած արարքի համար, ինչպես նաև ներել է Արմանին: Իր հայրը մահացել է 2004 թվականին, իսկ քաղցկեղով հիվանդ մայրը գտնվում է իր խնամքին: Ինքն ու իր մայրը միասին բնակվում են վարձակալած բնակարանում:
Վկա Արկադի Խաչատրյանը ցուցմունք տվեց այն մասին, որ հանդիսանում է ՀՀ ՊՆ թիվ 95532 զորամասի պայմանագրային զինծառայող: 2010 թվականի աշնանը (օրը կոնկրետ չի հիշում)` ժամը 14:30-ի սահմաններում, ինքն ու նույն զորամասի պայմանագրային զինծառայող Բեգլար Սուլթանյանը ծխարանում ծխելիս են եղել, երբ զորամասի լսարանից ձայներ են լսվել: Ինքն ու Բեգլարը գնացել են լսարան և տեսել, որ Սամվել Սարգսյանը և Արման Հակոբյանը վիճում են: Այդ ժամանակ Սամվելը ձեռքով մեկ անգամ հարվածել է Արմանին, ինչից հետո ինքը բռնել է Սամվելին, որպեսզի նա չհարվածի, իսկ Բեգլարը բռնել է Արմանին և նրա հետ դուրս եկել լսարանից:
Վկա Բեգլար Սուլթանյանը ցուցմունք տվեց այն մասին, որ հանդիսանում է ՀՀ ՊՆ թիվ 95532 զորամասի պայմանագրային զինծառայող: Դեպքի օրը` ժամը 14:00-ից 15:00-ի սահամաններում, ինքն ու նույն զորամասի պայմանագրային զինծառայող Արկադի Խաչատրյանը զորամասի ծխարանում ծխելիս են եղել, երբ զորամասի լսարանից լսվել են վիճաբանության ձայներ: Իրենք վազելով գնացել են լսարան, որտեղ Սամվել Սարգսյանն ու Արման Հակոբյանը վիճաբանելիս են եղել: Ինքն ու Արկադին միջամտել ու բաժանել են նրանց: Այնուհետև Սամվելն ու Արմանը հանդարտվել են և հաշտվել միմյանց հետ: Սամվելն իրեն ասել է, որ վիճաբանության պատճառը եղել Արմանի տված հայհոյանքը, ինչի պատճառով նա հարվածել է Արմանին: Դեպքի հաջորդ օրը զորամասի բուժկետում իմացել են, որ Արմանի ծնոտը կոտրվել է:
Փորձագետի 2010 թվականի նոյեմբերի 12-ի թիվ 2944 եզրակացության համաձայն` Սամվել Սարգսյանին ուշ ներկայացնելու և բժշկական փաստաթղթերի բացակայության պատճառով ներկայում որոշել, թե Սամվել Սարգսյանի մոտ մարմնական վնասվածքներ եղել են, թե ոչ, հնարավոր չէ, քանի որ վերջինները կարող էին անհետացած լինել այդ օրերի ընթացքում:
Փորձագետի 2010 թվականի նոյեմբերի 29-ի թիվ 1712 եզրակացության համաձայն` Արման Հակոբյանի ստացած մարմնական վնասվածքը` ձախից ստորին ծնոտի անկյան շրջանի կոտրվածքի ձևով, պատճառված է բութ առարկայի ազդեցությամբ, հնարավոր է գործում նշված ժամանակին, հանգամանքներում և պատճառվել է առողջությանը միջին ծանրության վնաս` առողջության տևական քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը 21 օրից ավելի:
ՀՀ ՊՆ թիվ 95532 զորամասի հրամանատարի կողմից հաստատված ծառայողական բնութագրի համաձայն` շարքային Արման Արմենակի Հակոբյանը 2010 թվականի մայիսի 19-ից պայմանագրային զինվորական ծառայության է անցել ՀՀ ՊՆ թիվ 95532 զորամասում որպես 1-ին հրաձգային գումարտակի 2-րդ հրաձգային վաշտի 3-րդ դասակի 3-րդ ջոկի գնդացրորդ: Արման Հակոբյանն իրեն դրսևորել է որպես կարգապահ զինծառայող, ցուցաբերել է բավարար գիտելիքներ մարտական պատրաստությունից: Բնավորությամբ հանգիստ է և ընկերասեր: Չունի կարգապահական տույժ:
ՀՀ ՊՆ թիվ 95532 զորամասի հրամանատարի կողմից հաստատված ծառայողական բնութագրի համաձայն` շարքային Սամվել Սարգսի Սարգսյանը 2010 թվականի մայիսի 19-ից պայմանագրային զինվորական ծառայության է անցել ՀՀ ՊՆ թիվ 95532 զորամասում որպես 1-ին հրաձգային գումարտակի 2-րդ հրաձգային վաշտի 3-րդ դասակի 2-րդ ջոկի նռնակաձիգի օգնական: Սամվել Սարգսյանը 6 ամսվա ընթացքում իրեն դրսևորել է բարեխիղճ, ժամանակին կատարել է հրամանատարների տված առաջադրանքները, ցուցաբերել է բավարար գիտելիքներ մարտական պատրաստությունից: Բնավորությամբ ընկերասեր է: Չունի կարգապահական տույժ:
ՀՀ ոստիկանության ինֆորմացիոն կենտրոնի պահանջագրի համաձայն` Արման Արմենակի Հակոբյանը նախկինում դատապարտված չի եղել:
ՀՀ ոստիկանության ինֆորմացիոն կենտրոնի պահանջագրի համաձայն` Սամվել Սարգսի Սարգսյանը նախկինում դատապարտված չի եղել:
Մահվան թիվ 234712 վկայականի համաձայն` Սարգիս Սամսոնի Սարգսյանը մահացել է 2004 թվականի փետրվարի 28-ին:
Կալանավորումը որպես խափանման միջոց կիրառելու միջնորդությունը քննության առնելու վերաբերյալ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010 թվականի դեկտեմբերի 27-ի որոշման համաձայն` Սամվել Սարգսի Սարգսյանի նկատմամբ որպես խափանման միջոց կիրառվել է կալանավորումը, կալանավորման սկիզբը հաշվվել է 2010 թվականի դեկտեմբերի 27-ից:
Վերը նշված ապացույցները վերլուծելու և համադրելու արդյունքում Դատարանը հաստատված է համարում գործի լուծման համար նշանակություն ունեցող հետևյալ փաստական հանգամանքները.
-Արման Հակոբյանը և Սամվել Սարգսյանը ՀՀ ՊՆ թիվ 95532 զորամասի պայմանագրային զինծառայողներ են, կոչումով շարքայիններ,
-2010 թվականի հոկտեմբերի 20-ին` ժամը 14:30-ի սահմաններում, Արման Հակոբյանը և Սամվել Սարգսյանը գտնվել են զորամասի լսարանում,
-զորամասի լսարանում այլ անձինք չեն եղել,
-Արման Հակոբյանը գլուխը դրել է զորամասի լսարանի սեղանին, իսկ Սամվել Սարգյանը ծնոտը հենել է ձեռքին.
-Սամվել Սարգսյանի ձեռքը սայթաքել է, որի պատճառով ձայն է հնչել,
-ձայնից Արման Հակոբյանը վեր է կացել և հայհոյել Սամվել Սարգսյանին,
-Արման Հակոբյանի հայհոյաքն ստորացրել է Սամվել Սարգսյանի պատիվն ու արժանապատվությունը,
-հայհոյանքից հետո Սամվել Սարգսյանը Արման Հակոբյանին մի քանի անգամ հարցրել է, թե արդյոք նրա հայհոյանքն ուղղված են իրեն,
-Արման Հակոբյանը յուրաքանչյուր անգամ պատասխանել է, որ հայհոյանքն ուղղված է Սամվել Սարգսյանին,
-Արման Հակոբյանի պատասխաններից հետո Սամվել Սարգսյանը ձեռքով հարվածել է նրա ծնոտին,
-հարվածի արդյունքում Արման Հակոբյանի առողջությանը պատճառվել է միջին ծանրության վնաս` առողջության տևական քայքայումով,
-Արման Հակոբյանը և Սամվել Սարգսյանը նախկինում դատապարտված չեն եղել և բնութագրվում են դրականորեն,
-Սամվել Սարգսյանն արգելանքի տակ է 2010 թվականի դեկտեմբերի 27-ից:
3. Դատարանի իրավական վերլուծությունները.
Վերոգրյալ փաստերի հիման վրա Դատարանը գալիս է այն եզրահանգման, որ Արման Արմենակի Հակոբյանը, հանդիսանալով ՀՀ ՊՆ թիվ 95532 զորամասի պայմանագրային զինծառայող, կոչումով շարքային, 2010 թվականի հոկտեմբերի 20-ին` ժամը 14:30-ի սահմաններում, զորամասի լսարանում, ստորադասության հարաբերությունների բացակայության պայմաններում խախտելով զինծառայողների փոխհարաբերությունների կանոնագրքային կանոնները, վիճաբանել է ՀՀ ՊՆ թիվ 95532 զորամասի պայմանագրային զինծառայող, շարքային Սամվել Սարգսի Սարգսյանի հետ և հայհոյել նրան` այդպիսով ստորացնելով Սամվել Սարգսի Սարգսյանի պատիվն ու արժանապատվությունը: Այսինքն` Արման Արմենակի Հակոբյանը կատարել է արարք, որը համապատասխանում է ՀՀ քրեական օրենսգրքի 359-րդ հոդվածի 1-ին մասի հատկանիշներին:
Ապացուցված է Արման Արմենակի Հակոբյանի մեղավորությունը ՀՀ քրեական օրենսգրքի 359-րդ հոդվածի 1-ին մասով նախատեսված արարքը կատարելու մեջ:
Արման Հակոբյանի անձը դրականորեն բնութագրող հանգամանքներ են ՀՀ զինված ուժերում ծառայելը, ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Արման Հակոբյանի պատասխանատվությունն ու պատիժը մեղմացնող հանգամանքներ պետք է դիտել նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Արման Հակոբյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Արման Հակոբյանը ենթակա է քրեական պատասխանատվության և պատժի:
Դատարանը, հաշվի առնելով Արման Հակոբյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Արման Հակոբյանի կողմից կատարված արարքի համար ՀՀ քրեական օրենսգրքի 359-րդ հոդվածի 1-ին մասի սանկցիայով նախատեսված է պատիժ նաև կալանքի ձևով, գտնում է, որ նրա նկատմամբ պատիժ պետք է նշանակել կալանքի ձևով:
Համաձայն ՀՀ քրեական դատավարության օրենսգրքի 360-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե ամբաստանյալն արդյոք պետք է կրի իր նկատմամբ նշանակված պատիժը, թե` ոչ:
ՀՀ քրեական օրենսգրքի 70-րդ հոդվածի համաձայն` եթե դատարանը, կալանքի, ազատազրկման կամ կարգապահական գումարտակում պահելու ձևով պատիժ նշանակելով, հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մաuին: ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ ՀՀ քրեական օրենսգրքի 70-րդ հոդվածի կիրառման կապակցությամբ արտահայտել է այն իրավական դիրքորոշումը, որ վկայակոչված հոդվածի կիրառումը հանցագործության տեսակի հետ կապված որևէ սահմանափակման չի ենթարկվում և դրա կիրառումը սահմանափակված չէ նաև հանցավոր արարքի վտանգավորության աստիճանով ու բնույթով, ինչպես նաև անձանց շրջանակով, որոնց նկատմամբ այն չի կարող կիրառվել: ՀՀ վճռաբեկ դատարանը միաժամանակ նշել է. «ՀՀ քրեական օրենսգրքի 70-րդ հոդվածի կիրառման հիմնական պայմանը պատճառաբանված լինելն է: Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները: Կարևորն այն է, որ հանգի հիմնավոր եզրակացության, որ դատապարտյալի ուղղումը հնարավոր է առանց նշանակված պատիժը կրելու»:
ՀՀ վճռաբեկ դատարանը մեկ այլ` 2008 թվականի փետրվարի 1-ի թիվ ՎԲ-01/08 որոշմամբ նշել է, որ պատիժը պայմանականորեն չկիրառելու իրավական հիմքերը բացահայտելու համար ՀՀ քրեական օրենսգրքի 70-րդ հոդվածում սահմանված իրավադրույթներն անհրաժեշտ է մեկնաբանել նաև ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում, այսինքն` պատիժը պայմանականորեն չկիրառելու մասին որոշում կայացնելիս իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը: ՀՀ վճռաբեկ դատարանը միաժամանակ նշել է, որ սոցիալական արդարությունը վերականգնելու և պատժի ենթարկված անձի ուղղվելու մասին կարող է վկայել հանցագործությունից հետո հանցավորի դրսևորած վարքագիծը, մասնավորապես` տուժողին պատճառած վնասը հարթելը կամ այն հարթելուն ուղղված ողջամիտ միջոցներ ձեռնարկելը:
ՀՀ վճռաբեկ դատարանը, վերոհիշյալ որոշմամբ անդրադառնալով հանցանքի կատարումից հետո հանցավորի դրսևորած վարքագծին, հատկապես կարևորել է տուժողին պատճառած վնասը հարթելը կամ դրան ուղղված ողջամիտ միջոցներ ձեռնարկելը, սակայն տվյալ հանգամանքը չի դիտել պատիժը պայմանականորեն կիրառելու պարտադիր պայման, ինչի մասին վկայում է որոշման մեջ տեղ գտած «մասնավորապես» եզրույթը: Տվյալ դեպքում ամբաստանյալ Արման Հակոբյանը զղջացել է իր կատարած արարքի համար և հաշտվել Սամվել Սարգսյանի հետ, իսկ Սամվել Սարգսյանը հայտնել է, որ ներել է Արման Հակոբյանին, հանցագործությունից հետո զերծ է մնացել այլ հանացավոր արարքներ կատարելուց, չլինելով կալանավորված` չի խուսափել քննությունից ու դատից:
Հանցագործությունից հետո ամբաստանյալ Արման Հակոբյանի դրսևորած վարքագիծը, նրան դրականորեն բնութագրող և պատասխանատվությունն ու պատիժը մեղմացնող վերը նշված հանգամանքները, հիմք են տալիս գալ հետևության, որ ամբաստանյալ Արման Հակոբյանի ուղղվելը հնարավոր է առանց պատիժը կրելու:
Այսպիսով, Դատարանը գտնում է, որ պատժի նպատակներին կարելի է հասնել առանց ամբաստանյալի կողմից ազատազրկման ձևով նշանակված պատիժը կրելու, այսինքն` կիրառելի է ՀՀ քրեական օրենսգրքի 70-րդ հոդվածը:
Դատարանը գտնում է, որ Արման Հակոբյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Վերոգրյալ փաստերի հիման վրա Դատարանը գալիս է այն եզրահանգման, որ Սամվել Սարգսի Սարգսյանը, հանդիսանալով ՀՀ ՊՆ թիվ 95532 զորամասի պայմանագրային զինծառայող, կոչումով շարքային, 2010 թվականի հոկտեմբերի 20-ին` ժամը 14:30-ի սահմաններում, զորամասի լսարանում, ստորադասության հարաբերությունների բացակայության պայմաններում խախտելով զինծառայողների փոխհարաբերությունների կանոնագրքային կանոնները, իրեն հայհոյելու կապացությամբ հարվածել է ՀՀ ՊՆ թիվ 95532 զորամասի պայմանագրային զինծառայող, շարքային Արման Արմենակի Հակոբյանի ծնոտին` վերջինի առողջությանը պատճառելով միջին ծանրության վնաս` առողջության տևական քայքայումով: Այսինքն` Սամվել Սարգսի Սարգսյանը կատարել է արարք, որը համապատասխանում է ՀՀ քրեական օրենսգրքի 359-րդ հոդվածի 2-րդ մասի 4-րդ կետի հատկանիշներին:
Ապացուցված է Սամվել Սարգսի Սարգսյանի մեղավորությունը ՀՀ քրեական օրենսգրքի 359-րդ հոդվածի 2-րդ մասի 4-րդ կետով նախատեսված արարքը կատարելու մեջ:
Սամվել Սարգսյանի անձը դրականորեն բնութագրող հանգամանքներ են վատառողջ մորը խնամելը, ՀՀ զինված ուժերում ծառայելը, ինքնախոստովանական ցուցմունքներ տալը և կատարածի համար զղջալը:
Սամվել Սարգսյանի պատասխանատվությունն ու պատիժը մեղմացնող հանգամանք է Արման Հակոբյանի վարքագծի հակաօրինականությունը և հակաբարոյականությունը, որով պայմանավորվել է Սամվել Սարգսյանի կատարած արարքը:
Դատարանը գտնում է, որ Սամվել Սարգսյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Սամվել Սարգսյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Սամվել Սարգսյանը ենթակա է քրեական պատասխանատվության և պատժի:
Դատարանը, հաշվի առնելով Սամվել Սարգսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Սամվել Սարգսյանի կողմից կատարված արարքի համար ՀՀ քրեական օրենսգրքի 359-րդ հոդվածի 2-րդ մասի սանկցիայով նախատեսված է պատիժ նաև ազատազրկման ձևով, գտնում է, որ նրա նկատմամբ պատիժ պետք է նշանակել ազատազրկման ձևով:
Դատարանը, հիմք ընդունելով սույն գործով ՀՀ քրեական օրենսգրքի 70-րդ հոդվածի կիրառման վերաբերյալ վերը նշված հիմնավորումները և հաշվի առնելով ամբաստանյալ Սամվել Սարգսյանի կատարած արարքի` հանրության համար վտանգավորության աստիճանը և բնույթը, այդ թվում հանցագործության կատարման հանգամանքներն ու գործողությունների վտանգավորության աստիճանը, Սամվել Սարգսյանի անձը դրականորեն բնութագրող և պատասխանատվությունն ու պատիժը մեղմացնող վերը նշված հանգամանքները, ինչպես նաև այն, որ ամբաստանյալ Սամվել Սարգսյանը զղջացել է իր կատարած արարքի համար և հաշտվել Արման Հակոբյանի հետ, իսկ Արման Հակոբյանը հայտնել է, որ ներել է Սամվել Սարգսյանին, հանգում է այն հետևության, որ ամբաստանյալ Սամվել Սարգսյանի ուղղվելը հնարավոր է առանց նրա կողմից ազատազրկման ձևով նշանակված պատիժը կրելու, այսինքն` կիրառելի է ՀՀ քրեական օրենսգրքի 70-րդ հոդվածը:
ՀՀ քրեական դատավարության օրենսգրքի 374-րդ հոդվածի համաձայն` ամբաստանյալի նկատմամբ պատիժը պայմանականորեն չկիրառելու դեպքում, եթե ամբաստանյալը կալանքի տակ է գտնվում, դատարանը նրան անհապաղ ազատում է կալանքից դատական նիստի դահլիճում: Քանի որ ամբաստանյալ Սամվել Սարգսյանի նկատմամբ նշանակված պատիժը վերոգրյալ հիմնավորմամբ պետք է պայմանականորեն չկիրառվի, ուստի նրա նկատմամբ ընտրված խափանման միջոցը` կալանավորումը, պետք է վերացնել և նրան անհապաղ ազատ արձակել:
ՀՀ քրեական դատավարության օրենսգրքի 360-րդ հոդվածի 1-ին մասի 14-րդ կետի համաձայն` դատավճիռ կայացնելիս դատարանը լուծում է այն հարցը, թե դատական ծախսերն ում վրա և ինչ չափով պետք է դրվեն:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-6-րդ կետերով նախատեսված դատական ծախսերն ամբաստանյալներ Արման Հակոբյանից և Սամվել Սարգսյանից ենթակա չեն բռնագանձման, քանի որ 1-ին, 4-6-րդ կետերով նախատեսված դատական ծախսեր ընդհանրապես չկան, իսկ 2-րդ և 3-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Արման Արմենակի Հակոբյանին մեղավոր ճանաչել ՀՀ քրեական օրենսգրքի 359-րդ հոդվածի 1-ին մասով և պատիժ նշանակել կալանք` 1 (մեկ) ամիս ժամկետով:
ՀՀ քրեական օրենսգրքի 70-րդ հոդվածի կիրառմամբ Արման Արմենակի Հակոբյանի նկատմամբ նշանակված պատիժը պայմանականորեն չկիրառել և սահմանել փորձաշրջան` 1 (մեկ) տարի ժամկետով:
Արման Արմենակի Հակոբյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Սամվել Սարգսի Սարգսյանին մեղավոր ճանաչել ՀՀ քրեական օրենսգրքի 359-րդ հոդվածի 2-րդ մասի 4-րդ կետով և պատիժ նշանակել ազատազրկում` 1 (մեկ) տարի ժամկետով` պատժի ժամկետին հաշվակցելով արգելանքի տակ գտնվելու ժամկետը` 2 (երկու) ամիս 10 (տաս) օրը:
ՀՀ քրեական օրենսգրքի 70-րդ հոդվածի կիրառմամբ Սամվել Սարգսի Սարգսյանի նկատմամբ նշանակված պատիժը պայմանականորեն չկիրառել և սահմանել փորձաշրջան` 1 (մեկ) տարի ժամկետով:
Սամվել Սարգսի Սարգսյանի նկատմամբ ընտրված խափանման միջոցը` կալանավորումը, վերացնել և նրան անհապաղ ազատել կալանքից:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ