Գործ թիվ ԵԿԴ 0365/01


ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

ՆԱԽԱԳԱՀՈՂ ԴԱՏԱՎՈՐ՝ Գ. Ավետիսյան
ՔԱՐՏՈՒՂԱՐՈՒԹՅԱՄԲ՝ Հ.Հովհաննիսյանի

ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ՝ Վ.Գևորգյանի
ՊԱՇՏՊԱՆ` Ռ.Սաֆարյանի
ՏՈՒԺՈՂԻ ՆԵՐԿԱՅԱՑՈՒՑԻՉ` Ն.Միքայելյանի
2011թ. հուլիսի 28-ին, դռնբաց դատական նիստում, դատարանում, քննեց քրեական գործն ըստ մեղադրանքի Եփրեմ Գագիկի Սարգսյանի` ծնված 1981թ.
սեպտեմբերի 3-ին, Երևանում, ՀՀ քա¬¬ղա¬քացի, ազգությամբ` հայ, միջնակարգ կրթությամբ, ամուսնացած, խնամքին` երկու երեխա, անհատ-ձեռներեց, հաշվառված և բնակվել է Երևանի Երկաթուղայինների 7-րդ փողոցի թիվ 3 տանը, նախկինում 2 անգամ դատված` 1. Կոտայքի մարզի առաջին ատյանի դատարանի 2005թ. հուլիսի 18-ի դատավճռով` ՀՀ քրեական օրենսգրքի 375-րդ հոդվածի 1-ին մասով` դատապարտվել է ազատազրկման` երկու տարի վեց ամիս ժամկետով, ՀՀ քրեական օրենսգրքի 70-րդ հոդվածի կիրառմամբ` ազատազրկման ձևով նշանակված պատիժը պայմանականորեն չի կիրառվել է սահմանվել է փորձաշրջան` երկու տարի վեց ամիս ժամկետով, ՀՀ ԱԺ «ՀՀ անկախության հռչակման 15-րդ տարեդարձի կապակցությամբ համաներում հայտարարելու մասին» 07.07.2006թ. որոշման 1-ին կետի «բ» ենթակետի կիրառմամբ, Էրեբունի և Նուբարաշեն համայնքների առաջին ատյանի դատարանի 30.08.2006թ. որոշմամբ ազատվել է պատժից, 2. Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. ապրիլի 21-ի դատավճռով ՀՀ քրեական օրենսգրքի 179-րդ հոդվածի 2-րդ մասի 3-րդ կետով դատապարտվել է` ազատազրկման` երկու տարի ժամկետով, ներկայումս պատիժ է կրում «Նուբարաշեն» ՔԿՀ-ում, կալանքի տակ է 2010թ. հոկտեմբերի 25-ից, մեղադրվում է Հայաստանի Հանրապետության քրեական օրենսգրքի 179-րդ հոդվածի 2-րդ մասի 2-րդ և 3-րդ կետերով։
Առաջադրված մեղադրանքում Եփրեմ Գագիկի Սարգսյանն իրեն մեղավոր ճանաչեց։


Թիվ 69105910 քրեական գործը Հայաստանի Հանրապետության քրեական օրենսգրքի 179-րդ հոդվածի 2-րդ մասի 3-րդ և 4-րդ կետերի հատկանիշներով հարուցվել է 2010թ. հուլիսի 23-ին ՀՀ ոստիկանության ՔԳՎ ՀԿԳ քննության վարչության կողմից։
2010թ. դեկտեմբերի 10-ին թիվ 69105910 քրեական գործից մաս է անջատվել և շնորհվել 69105910/1 համարը։
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գ.Ավետիսյանի 2010թ. դեկտեմբերի 30-ի որոշմամբ թիվ ԵԿԴ 0365/01 /69105910/ քրեական գործն ըստ մեղադրանքի Եփրեմ Գագիկի Սարգսյանի` ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ, 3-րդ կետերով և 179-րդ հոդվածի 2-րդ մասի 2-րդ, 3-րդ, 4-րդ կետերով ընդունվել է վարույթ։ Նույն դատավորի 2011թ. հունվարի 14-ի որոշմամբ նշված քրեական գործը նշանակվել է դատաքննության։
Քրեական գործի դատաքննության ընթացքում մեղադրողի 2011թ. հուլիսի 28-ի առաջադրված մեղադրանքից հրաժարվելու մասին որոշման համաձայն` Եփրեմ Գագիկի Սարգսյանին ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով առաջադրված մեղադրանքից մեղադրողը հրաժարվել է։ 2011թ. մայիսի 23-ին ՀՀ Ազգային Ժողովի կողմից ընդունված «Հայաստանի Հանրապետության քրեական օրենսգրքում փոփոխություններ և լրացումներ կատարելու մասին» ՀՀ օրենքի համաձայն. ուժը կորցրած է ճանաչվել ՀՀ քրեական օրենսգրքի 179-րդ հոդվածի 2-րդ մասի 4-րդ կետը, որի պայմաններում ամբաստանյալ Եփրեմ Գագիկի Սարգսյանին ՀՀ քրեական օրենսգրքի 179-րդ հոդվածի 2-րդ մասի 2-րդ, 3-րդ և 4-րդ կետերով առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 179-րդ հոդվածի 2-րդ մասի 2-րդ և 3-րդ կետերով։
Երևանի Էրեբունի և Նուբարաշեն վարչական շրջանների ընդհանուր իրավասության դատարանի 2010թ. սեպտեմբերի 9-ի վճռով հայցվոր «Ինդ Քոմփ» ՍՊ ընկերության քաղաքացիական հայցը բավարարվել է, վճռվել է պատասխանող Ա/Ձ Եփրեմ Սարգսյանից հօգուտ հայցվոր «Ինդ Քոմփ» ՍՊ ընկերության բռնագանձել 2.380.000 ՀՀ դրամ և 910.177 ՀՀ դրամ պարտավորագրի և լիազորագրի համաձայն «Հայբիզնեսբանկ» ՓԲԸ-ի «Կենտրոն» մասնաճյուղից ստացված և չմարված վարկի գումարը, որի մարումը նշված չափով Ա/Ձ Եփրեմ Սարգսյանի փոխարեն կատարել է «Ինդ Քոմփ» ՍՊ ընկերությունը` ընդամենը 3.290.177 ՀՀ դրամ։
Դատաքննությամբ և գործի տվյալներով դատարանը ապացուցված համարեց հետևյալը.
Ամբաստանյալ անհատ-ձեռնարկատեր Եփրեմ Գագիկի Սարգսյանը 2007թ. ընթացքում իրականացրել է գազի կաթսաների տեղադրման և մոնտաժման աշխատանքներ։ Իր գործունեության ընթացքում ճանաչել է գազի կաթսաների վաճառք իրականացնող «Ինդ Քոմփ» ՍՊ ընկերության փոխտնօրեն, գործով մյուս մեղադրյալ Արմեն Խաչատրյանին, տնօրեն Կարեն Ալավերդյանին։
2007թ. նոյեմբերի 3-ին, Եփրեմ Սարգսյանը «Ինդ Քոմփ» ՍՊ ընկերության փոխտնօրեն Արմեն Խաչատրյանի հետ ձեռնարկատիրական գործունեություն ծավալելու նպատակով, վերջինիս միջնորդությամբ, «Եփրեմ Սարգսյան» Ա/Ձ անունից «Ինդ Քոմփ» ՍՊ ընկերության հետ կնքել են թիվ 19 կոմիսիայի պայմանագիրը, որի համաձայն պարտավորվել են կոմիսիոն հիմունքներով վաճառել նույն պայմանագրով իրենց վստահված, «Ինդ Քոմփ» ՍՊ ընկերությանը պատկանող թվով 10 գազի կաթսաները` դրանց փաստացի վաճառքի և նվազագույն գնի տարբերությունը որպես միջնորդավճար շահույթ ստանալու պայմանով։ Նույն օրը «Ինդ Քոմփ» ՍՊ ընկերության նշված վաճառասրահից ստացել են ընդհանուր` 3.400.000 ՀՀ դրամ առավելագույն արժողությամբ 10 հատ գազի կաթսաներ, որոնց մի մասն իրացնելուց հետո` 2007թ. նոյեմբերի 23-ին, թվով 3 կաթսաների արժեքը կազմող 990.000 ՀՀ դրամը փոխանցել են ՍՊ ընկերության հաշվին, իսկ նույն պայմանագրի հիման վրա իրենց վստահությանը հանձնված` մնացած 7 հատ գազի կաթսաները մինչև նույն թվականի դեկտեմբերի 31-ն իրացնելուց հետո, Արմեն Խաչատրյանի հետ նախնական համաձայնությամբ, կրկին անգամ հափշտակություն կատարելու դիտավորությամբ, դրանց վաճառքից գոյացած, ընդհանուր` խոշոր չափի` 2.380.000 ՀՀ դրամ գումարն «Ինդ Քոմփ» ՍՊ ընկերությանը չեն վճարել և յուրացնելու միջոցով հափշտակել են։
Հետագայում, գումարները վճարելու վերաբերյալ «Ինդ Քոմփ» ՍՊ ընկերության տնօրեն Կարեն Ալավերդյանի կողմից ներկայացված պահանջներին ի պատասխան, Եփրեմ Սարգսյանն ու Արմեն Խաչատրյանը պատճառաբանել են, թե իբրև գնորդներն այդ գումարները դեռ չեն վճարել, իսկ ավելի ուշ` 2008թ. մարտ-ապրիլ ամիսներին, մեկնել են հանրապետությունից։
Վերոհիշյալ արարքները կատարելու համար ամբաստանյալներ Եփրեմ Սարգսյանին մեղադրանք է առաջադրվել Հայաստանի Հանրապետության քրեական օրենսգրքի 179-րդ հոդվածի 2-րդ մասի 2-րդ և 3-րդ կետերով։
Առաջադրված մեղադրանքում ամբաստանյալ Եփրեմ Սարգսյանն իրեն մեղավոր չճանաչեց և ցուցմունք տվեց, որ ինքը և Արմեն Խաչատրյանը որոշել են զբաղվել կաթսաների վաճառքով ու մոնտաժման աշխատանքներով, ինչի համար «Ինդ Քոմփ» ՍՊ ընկերության հետ կնքել են կոմիսիոն պայմանագիր, որի հիման վրա ստացել են 10 հատ գազի կաթսաներ` ստանձնելով դրանք հետագայում վաճառելու և գումարները վճարելու պայմանագրային պարտավորություններ։ Կոմիսիայի պայմանագրի պարտքը մարելու մասին է եղել խոսակցությունը իր և Կարենի միջև, ոչ թե բանկի գումարի։ Ինքը ծանրաբեռնված է եղել ֆիրմայի մնացած հարցերով, չի իմացել Արմենը գումարը վճարել է, թե ոչ։ 10 հատ կաթսան ինքն է վերցրել, բայց 10 հատն էլ մի անգամից չի վերցրել, մաս-մաս է վերցրել։ Քանի որ այդ գումարը Արմենին պետք է եղել, զուտ մարդկային առումով օգնել է, եթե իմանար, որ նա վարկը չի մարի, չէր վերցնի այդ վարկը, բայց և չի բացառում, որ Արմենը այդ գումարները մարած լինի։ Յուրացնելու ոչ մի նպատակ չի եղել, քանի որ այդ 10 կաթսաների գումարի դիմաց պատրաստ է եղել իր ՋԻՊ մակնիշի մեքենան տրամադրել։ Նրանք գումարի կոնկրետ չափ երբեք չեն նշել, միշտ ասել են պարտք ունի։ Իր մոտ այդ կաթսաները վերցնելու և գումարը չտալու միտում չի եղել։ Իր հաշվարկով նրանց պարտք մնացել է 600.000 ՀՀ դրամի չափով։ Կարենին տեղյակ է պահել, որ մեկնում է Ռուսաստան։ Պայմանագրով նշված երեք հատ կաթսաները ինքը չի վերցրել։
Ապրանքները լրիվ ինքն է վերցրել, Արմեն Խաչատրյանը այդ ապրանքների հետ կապ չունի։ Իր մոտ գտնվող գումարը ծախսել է, մտածել է կաշխատի, վարկը կմարի։ Արմեն Խաչատրյանի հետ գտնվել է ընկերական հարաբերությունների մեջ։ «Ինդ քոմփ» ՍՊԸ-ի գումարները ինքը չի տվել, որ Արմեն Խաչատրյանը մարի։ 3 կաթսաների գումարը վերականգնել է, մնացած 7-ինը չի ստացվել մարել, քանի որ այդ ընթացքում վթարի է ենթարկվել, այդ գումարներից մեքենա է գնել և տվել մյուս մեքենայի վարորդին։ Յուրացում չի արել, վերցրել է, չի կարողացել մարել։ Արմեն Խաչատրյանը իր հետ չի աշխատել, ինքն է եղել անհատ ձեռներեցը, նա ուղղակի իրեն օգնել է` երբեմն գնացել է գումարն է բերել, մի տեղից գնացել է ապրանք է բերել և այլն։ Նախկինում ճիշտ չի ասել, որ Արմեն Խաչատրյանի անունը տվել է։ Վարկի տրամադրման հարցում Արմեն Խաչատրյանը որևէ կապ չունի։ Ձեռք բերած բոլոր կաթսաները վաճառել են մինչև 2007թ. դեկտեմբերի 31-ը, ստացել են դրանց գումարները, որոնք տնօրինել է Արմեն Խաչատրյանը և իր ներկայացմամբ վճարել է ընկերության դրամարկղ։ Կարեն Ալավերդյանն իրենից պահանջել է միայն պարտք մնացած մոտ 600.000 ՀՀ դրամ գումարը, որը ևս Արմեն Խաչատրյանի միջոցով մարել է։ Ինքը երբեք չի խուսափել Կարեն Ալավերդյանի հետ հանդիպելուց և գումարները վճարելուց։/քրեական գործ, հատոր 1 էջ 54, 84, 85-89, 154, 193-194, հատոր 2 էջ 7-8, 33-34, 154-156, դատական նիստի արձանագրություն/։
Ամբաստանյալ Եփրեմ Սարգսյանի պատճառաբանություններն անհիմն են, դրանք հերքվում են, իսկ նրան մեղսագրված արարքները հիմնավորվում` գործի քննությամբ ձեռք բերված և դատաքննության ժամանակ հետազոտված հետևյալ ապացույցներով.
Վկա, «Ինդ Քոմփ» ՍՊ ընկերության տնօրեն Կարեն Ալավերդյանի ցուցմունքներով այն մասին, որ մինչև 2008թ. ապրիլ ամիսն ընկերության փոխտնօրենն է հանդիսացել իր քրոջ ներկայումս նախկին ամուսին Արմեն Խաչատրյանը։ 2007թ. նոյեմբերի 3-ին գումարները վճարելու խոստումով, ամբաստանյալ Ե.Սարգսյանին և Ա.Խաչատրյանին կոմիսիոն հիմունքներով տրամադրել է 10 հատ գազի կաթսա, որոնց գումարներից մարել են ընդամնեը 3 կաթսայի` 990.000 ՀՀ դրամ գումարը, իսկ մնացած կաթսաները վաճառել են մինչև նույն թվականի դեկտեմբերի 31-ը, սակայն վճարում չեն կատարել։ Հետագայում նրանք չեն կատարել նաև իրենց վարկային պարտավորությունները, իսկ վարկը մարվել է ընկերության հաշվից։ Իր պահանջներին նրանք պատճառաբանել են, թե իբրև նրանք էլ իրենց հերթին գնորդներից գումարները չեն ստացել, իսկ ստանալու դեպքում խոստացել են մարել գումարները։ Ավելի ուշ նրանց չի կարողացել հանդիպել, քանի որ բացակայել են հանրապետությունից և հասկացել է, որ կաթսաների գումարները հափշտակել են։
Հակառակ Եփրեմ Սարգսյանի այն պատճառաբանություններին, թե Կարեն Ալավերդյանն իրենից պահանջել է միայն 600.000 ՀՀ դրամ գումարի չափով մնացած պարտքը, վերջինս հայտնել է, որ թե նրանից և թե Արմեն Խաչատրյանից միշտ պահանջել է նրանց ընկերությանն ունեցած ընդհանուր պարտք գումարը` մոտ 3.000.000 ՀՀ դրամի չափով։
Կարեն Ալավերդյանն իր այս ցուցմունքները պնդեց նաև Եփրեմ Սարգսյանին առերես /քրեական գործ, հատոր 1 էջ 22-23, 96-99, 142-152, հատոր 2 էջ 29-31, 128-129, դատական նիստի արձանագրություն/։
Վկաներ, «Ինդ Քոմփ» ՍՊ ընկերության մենեջերներ Արման Էդիկի Գյոզալյանի և Մերուժան Վազգենի Աբրահամյանի ցուցմունքներով այն մասին, որ 2008թ. մարտ-մայիս ամիսների ընթացքում տնօրեն Կարեն Ալավերդյանի հանձնարարությամբ տարբեր օրերի և ժամերի այցելել են կոմիսիոներ, անհատ-ձեռներեց Եփրեմ Սարգսյանի գործունեության վայր, որը գտնվել է Եր. Քոչար թիվ 11 հասցեում, սակայն նրան երբեք այնտեղ չեն հանդիպել, քանի որ գործունեություն չի իրականացրել, իրենց ընկերությունից վերցված ապրանքները` կաթսաները, նույնպես չեն հայտնաբերել։ Նույն ժամանակահատվածում կրկին տնօրենի հանձնարարությամբ, ընկերությունից վերցված ապրանքները վերադարձնելու վերաբերյալ գրավոր պահանջ են տարել Եփրեմ Սարգսյանի բնակության վայր, որտեղ ևս նրան չեն հանդիպել, իսկ նամակը թողել են նրա ընտանիքի անդամների մոտ։ /քրեական գործ, հատոր 1 էջ 30-31, 44-45, դատական նիստի արձանագրություն/։
Տուժողի ներկայացուցիչ «Ինդ Քոմփ» ՍՊ ընկերության` Նորայր Գաբրիելի Միքայելյանի ցուցմունքով այն մսաին, որ 2007թվականի նոյեմբերի 3-ին, կոմիսիոն հիմունքներով տրամադրվել է 10 հատ գազի կաթսա, որոնց գումարներից մինչև 30.11.2007թ. մարվել է ընդամենը 3 կաթսայի` 990.000 ՀՀ դրամ գումարը, իսկ մնացած կաթսաների գումարները մինչ օրս չի մարվել։ Գումարները վճարելու համար իրենց աշխատակիցները բազմիցս փորձել են զանգահարել կամ հանդիպել Եփրեմ Սարգսյանին, սակայն ապարդյուն` վերջինս խուսափել է իրենց հետ հանդիպումներից /քրեական գործ, հատոր 1 էջ 38-40, դատական նիստի արձանագրություն/։
Վկա, Եփրեմ Սարգսյանի մայր Սիրուշ Վոլոդյայի Սարգսյանի ցուցմունքներով այն մասին, որ 2007թ. աշնանից մինչև 2008թ. սկզբները որդին Բոշ ֆիրմայի փոխտնօրեն Արմեն Խաչատրյանի հետ զբաղվել է նույն ֆիրմայից վերցված գազի կաթսաների վաճառքով և մոնտաժման աշխատանքներով։ 2008թ. մայիսի 17-ին որդին մեկնել է Սոչի քաղաք, որից հետո իրենց տուն են եկել Բոշ ֆիրմայի աշխատակիցները և հայտնել են, որ որդին իրենց ֆիրմային բավականին մեծ գումար է պարտք, այդ կապակցությամբ իր մոտ թողել են նաև գրություն։ Ինքն այդ մասին հեռախոսային կապի միջոցով տեղյակ է պահել Եփրեմ Սարգսյանին /քրեական գործ, հատոր 1 էջ 90-93, դատական նիստի արձանագրություն/։
Վկա Նորիկ Ժորայի Մովսեսյանի ցուցմունքով այն մասին, որ հանդիսանում է Կոտայքի մարզի Արզական համայնքի ղեկավարը։ 2007թ. նոյեմբեր ամսին գյուղապետարանի շենքի և իր սեփական տան համար գազի կաթսաներ է գնել Եփրեմ Սարգսյանից։ Այդ առիթով ճանաչել է նաև նրա գործընկերոջը` Արմենին։ Երկու տեղում էլ կաթսաների մոնտաժման աշխատանքները կազմակերպել են նրանք։ Գյուղապետարանի աշխատանքների և կաթսայի համար գումարը` 1.045.000 ՀՀ դրամ, 2007թ. նոյեմբերի 22-ին փոխանցել է Եփրեմ Սարգսյանի հաշվին, իսկ իր տան կաթսայի և աշխատանքների գումարը` ընդհանուր մոտ 1.200.000 ՀՀ դրամ, մինչև 2007թ. դեկտեմբեր ամիսը մաս-մաս տվել է թե Եփրեմ Սարգսյանին, թե Արմենին, նրանց պարտք չի մնացել /քրեական գործ, հատոր 1 էջ 155-156, դատական նիստի արձանագրություն/։
Վկա Ռոբերտ Ժորայի Միրզոյանի ցուցմունքով այն մասին, որ Եփրեմ Սարգսյանին ճանաչել է որպես բարեկամի, իսկ նրա միջոցով ճանաչել է Արմեն Խաչատրյանին։ 2007թ. նոյեմբեր ամսին իր բնակարանի համար նրանցից գնել է «Յույնկերս» ֆիրմայի գազի կաթսա, որի մոնտաժման աշխատանքները կազմակերպել են իրենք։ Կաթսայի և աշխատանքների ամբողջ գումարը կազմել է մոտ 3.000 ԱՄՆ դոլար, որը մաս-մաս ամբողջությամբ նույն ժամանակահատվածում տվել է թե Եփրեմ Սարգսյանին և թե Արմենին, նրանց պարտք չի մնացել /քրեական գործ, հատոր 2 էջ 1-2, դատական նիստի արձանագրություն/։
Վկա Արթուր Աշոտի Նամալյանի ցուցմունքով այն մասին, որ 2006թ.-ից շուրջ 2 տարի աշխատել է «Ինդ Քոնփ» ՍՊ ընկերությունում որպես մենեջեր։ Իր աշխատանքի ընթացքում ճանաչել է Եփրեմ Սարգսյանին, որը ընկերության փոխտնօրեն Արմեն Խաչատրյանի հետ 2007թ. նոյեմբեր ամսին Եր. Քոչար փողոցում, ընկերության խանութի դիմաց խանութ են բացել և «Ինդ Քոմփ»ՍՊԸ-ից վերցրել գազի կաթսաներ ու վաճառել։ Ինքը ևս համապատասխան փաստաթղթերի հիման վրա նրանց տվել է գազի կաթսաներ, սակայն չի հիշում, թե ինչ տեսակի ու քանակության /քրեական գործ, հատոր 2 էջ 5-6, դատական նիստի արձանագրություն/։
Վկա Գևորգ Թորգոմի Պողոսյանի ցուցմունքով այն մասին, որ 2007թ. հոկտեմբերի 15-ից աշխատում է «Ինդ Քոմփ» ՍՊԸ-ում, սկզբնական շրջանում որպես տնօրենի օգնական ֆինանսական գծով, գլխավոր հաշվապահ, այնուհետև փոխտնօրեն։ 2007թ. նոյեմբերի 3-ին գումարները վճարելու խոստումով, Ա.Խաչատրյանին և Ե.Սարգսյանին կոմիսիոն հիմունքներով տրամադրել է 10 հատ գազի կաթսա, որոնց գումարներից մինչև 2007թ. նոյեմբերի 30-ը մարել են ընդամենը 3 կաթսայի` 990.000 ՀՀ դրամ գումարը։ Մնացած կաթսաները վաճառել են և իրենց պայմանագրային պարտավորությունները չեն կատարել։ Տնօրենի բազմաթիվ պահանջներին Եփրեմ Սարգսյանն ու Արմեն Խաչատրյանը պատճառաբանել են, թե իբրև գնորդներից գումարները չեն ստացել, ինչի պատճառով չեն կարողանում մարել ընկերության պարտքը։ Ինքը ևս նրանցից պահանջել է ընկերության պարտք մնացած ամբողջ գումարը` նշելով դրա չափը, սակայն որևէ առարկություն պարտքի չափի վերաբերյալ չեն ներկայացրել։ Հիշում է, որ այդ գումարների դիմաց տղաներից մեկը մեքենա է առաջարկել /քրեական գործ, հատոր 2 էջ 70-72, դատական նիստի արձանագրություն/։

Քրեական գործով ապացույցներ ճանաչված, այլ փաստաթղթեր հանդիսացող «Ինդ Քոմփ» ՍՊ ընկերության և Ա/Ձ Եփրեմ Սարգսյանի միջև 03.11.2007թ. կնքված թիվ 19 կոմիսիայի պայմանագրով, նույն պայմանագրին կից կոմիսիոն վաճառքի ապրանքատեսակի ցանկով, կոմիսիայի ընդունված ապրանքների վաճառքի վերաբերյալ 30.11.2007թ. թիվ 1 տեղեկանքով, որոնցով ևս հաստատվում են քրեական գործի համար նշանակություն ունեցող տվյալներ /քրեական գործ, հատոր 1 էջ 100-104, հատոր 2, էջ 75-100, 103/։
Երևանի Էրեբունի և Նուբարաշեն վարչական շրջանների ընդհանուր իրավասության դատարանի 2010թ. սեպտեմբերի 9-ի վճռով հայցվոր «Ինդ Քոմփ» ՍՊ ընկերության քաղաքացիական հայցը բավարարվել է, վճռվել է պատասխանող Ա/Ձ Եփրեմ Սարգսյանից հօգուտ հայցվոր «Ինդ Քոմփ» ՍՊ ընկերության բռնագանձել 2.380.000 ՀՀ դրամ և 910.177 ՀՀ դրամ պարտավորագրի և լիազորագրի համաձայն «Հայբիզնեսբանկ» ՓԲԸ-ի «Կենտրոն» մասնաճյուղից ստացված և չմարված վարկի գումարը, որի մարումը նշված չափով Ա/Ձ Եփրեմ Սարգսյանի փոխարեն կատարել է «Ինդ Քոմփ» ՍՊ ընկերությունը` ընդամենը 3.290.177 ՀՀ դրամ։
Նախաքննական մարմնի կողմից Ե.Սարգսյանին ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով մեղադրանք է առաջադրվել, այն բանի համար, որ 2007թ. օգոստոս-սեպտեմբեր ամիսներին ուրիշի գույքի խոշոր չափերի յուրացում կատարելուց հետո, կրկին անգամ, Արմեն Խաչատրյանի հետ նախնական համաձայնությամբ, խարդախությամբ ուրիշի գույքի` «Ինդ Քոմփ» ՍՊ ընկերությանը պատկանող գազի կաթսաների, խոշոր չափերի հափշտակություն կատարելու դիտավորությամբ, ընկերության հետ փոխշահավետ համագործակցության պատրվակով, չարաշահելով տնօրեն Կարեն Ալավերդյանի վստահությունը, պայմանավորվածություն են ձեռք բերել վերջինիս հետ` ընկերության երաշխավորությամբ բանկից վարկ ստանալու և վարկի գումարով նույն ՍՊԸ-ից թվով 3 գազի կաթսաներ ձեռք բերելու վերաբերյալ։ Այդ նպատակով, 2007թ. նոյեմբերի 1-ին, «Ինդ Քոմփ» ՍՊ ընկերության երաշխավորությամբ «Հայբիզնեսբանկ» ՓԲ ընկերության «Կենտրոն» մասնաճյուղից Եփրեմ Սարգսյանի անվամբ, հետագա 12 ամիսների ընթացքում մարելու պայմանով, ստացել են թվով 3 գազի կաթսաների արժեքը կազմող 930.000 ՀՀ դրամ գումարի չափով վարկ, որը նույն ՍՊԸ-ի հաշվարկային հաշվին փոխանցելուց հետո, հաջորդ օրը` նոյեմբերի 2-ին, ընկերության վաճառասրահից ստացել են գազի կաթսաները։
Հանցավոր մտադրությունն ավարտին հասցնելու նպատակով, գազի կաթսաներն իրացնելու համար պահանջվող ժամանակահատվածում դրսևորելով իբրև վստահելի գործընկերոջ վարքագիծ, 2007թ. դեկտեմբերի 4-ին, կաթսաների վաճառքի հասույթից կատարել են բանկի կողմից սահմանված վարկի մարման ժամանակացույցով միակ` դեկտեմբեր ամսվա համար 77.500 ՀՀ դրամի չափով վճարումը, ապա հետագա մարման պարտավորությունը թողնելով բանկում որպես երաշխավոր հանդես եկած «Ինդ Քոմփ» ՍՊ ընկերության վրա, խաբեությամբ տիրացել են վերջինիցս հափշտակված գազի կաթսաների վաճառքից գոյացած մնացած խոշոր չափի` 852.500 ՀՀ դրամ, գումարին։
Քրեական գործի դատաքննության փուլում մեղադրող Վ.Գևորգյանի դատարան ներկայացրած 2011թ. հուլիսի 28-ի առաջադրված մեղադրանքից հրաժարվելու մասին որոշման համաձայն` Ե.Սարգսյանին ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով մեղսագրված մեղադրանքը չի հիմնավորվել, վերջինիս գործողությունները կրել են քաղաքացիաիրավական բնույթ, մեղադրողը հրաժարվեց ամբաստանյալ Ե.Սարգսյանին` ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով առաջադրված մեղադրանքից։
ՀՀ քրեական դատավարության օրենսգրքի 35-րդ հոդվածի 2-րդ մասի համաձայն քրեական հետապնդումը ենթակա է դադարեցման, իսկ գործի վարույթը ենթակա է կարճման` կատարված հանցագործությանը կասկածյալի կամ մեղադրյալի մասնակցությունն ապացուցված չլինելու արդյունքում, եթե սպառված են նոր ապացույցներ ձեռք բերելու բոլոր հնարավորությունները։
ՀՀ քրեական դատավարության օրենսգրքի 35-րդ հոդվածի 4-րդ մասի համաձայն ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է։
ՀՀ քրեական դատավարության օրենսգրքի 366-րդ հոդվածի 1-ին մասի համաձայն արդարացման դատավճիռը ճանաչում և հռչակում է հանցանքի կատարման մեջ ամբաuտանյալի անմեղությունը` այն մեղադրանքով, որով նա ներգրավվել է որպեu մեղադրյալ։ Նույն հոդվածի 2-րդ մասի համաձայն` դատարանը պարտավոր է սույն օրենսգրքի 35-րդ հոդվածի առաջին մասի 1-3-րդ կետերով և երկրորդ մասով նախատեսված հիմքերից որևէ մեկի առկայության դեպքում տվյալ դատական նիստում կայացնել արդարացման դատավճիռ։
ՀՀ քրեական դատավարության օրենսգրքի 366-րդ հոդվածի 4-րդ մասի համաձայն դատարանում մեղադրանքը պաշտպանող դատախազը մեղադրանքից հրաժարվելու դեպքում դատարանը մեղադրանքի այդ մասով կայացնում է արդարացնող դատավճիռ։
Մեղադրողը օրենքով սահմանված կարգով հայտարարել է ամբաստանյալ Ե.Սարգսյանի նկատմամբ ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով քրեական հետապնդում իրականացնելուց հրաժարվելու մասին։
Ղեկավարվելով ՀՀ քրեական դատավարության օրենսգրքի 366-րդ հոդվածի դրույթներով դատարանը գտավ, որ պետք է ամբաստանյալ Ե.Սարգսյանի նկատմամբ ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով կայացվի արդարացման դատավճիռ` Հայաստանի Հանրապետության քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով հանցանքի կատարման մեղադրանքով որպես մեղադրյալ ներգրավված ամբաստանյալ Եփրեմ Գագիկի Սարգսյանին պետք է ճանաչել անմեղ և դատարանով արդարացված` մեղադրողի կողմից ամբաստանյալի նկատմամբ քրեական հետապնդում իրականացնելուց հրաժարվելու հիմքով։
Դատարանը, վերլուծելով և գնահատելով քրեական գործի նյութերը, ապացուցված է համարում, որ ամբաստանյալ Եփրեմ Գագիկի Սարգսյանը «Ինդ Քոմփ» ՍՊ ընկերության փոխտնօրեն Արմեն Խաչատրյանի հետ ձեռնարկատիրական գործունեություն ծավալելու նպատակով, վերջինիս միջնորդությամբ, 2007թ. նոյեմբերի 3-ին «Եփրեմ Սարգսյան» Ա/Ձ անունից «Ինդ Քոմփ» ՍՊ ընկերության հետ կնքել են թիվ 19 կոմիսիայի պայմանագիրը, որի համաձայն պարտավորվել են կոմիսիոն հիմունքներով վաճառել նույն պայմանագրով իրենց վստահված, «Ինդ Քոմփ» ՍՊ ընկերությանը պատկանող թվով 10 գազի կաթսաները` դրանց փաստացի վաճառքի և նվազագույն գնի տարբերությունը որպես միջնորդավճար շահույթ ստանալու պայմանով։ «Ինդ Քոմփ» ՍՊ ընկերության` Երևանի Եր. Քոչար փողոցի թիվ 2/2 շենքում գործող վաճառասրահից ստացել են ընդհանուր` 3.400.000 ՀՀ դրամ առավելագույն արժողությամբ 10 հատ գազի կաթսաներ, որոնց մի մասն իրացնելուց հետո` 2007թ. նոյեմբերի 23-ին, 3 հատ կաթսաների արժեքը կազմող 990.000 ՀՀ դրամը փոխանցել են ՍՊ ընկերության հաշվին։ Այնուհետև, հիշյալ պայմանագրի հիման վրա իրենց վստահությանը հանձնված մնացած 7 հատ գազի կաթսաները մինչև նույն թվականի դեկտեմբերի 31-ը իրացնելուց հետո, Արմեն Խաչատրյանի հետ նախնական համաձայնությամբ, կրկին անգամ հափշտակություն կատարելու դիտավորությամբ, դրանց վաճառքից գոյացած, ընդհանուր խոշոր չափի` 2.380.000 ՀՀ դրամ, գումարը «Ինդ Քոմփ» ՍՊ ընկերությանը չեն վճարել և յուրացնելու միջոցով հափշտակել են։


Ամբաստանյալ Եփրեմ Գագիկի Սարգսյանի կատարած արարքը համապատասխանում է` Հայաստանի Հանրապետության քրեական օրենսգրքի 179-րդ հոդվածի 2-րդ մասի 2-րդ, 3-րդ և 4-րդ կետերին։
Դատարանը պատիժ սահմանելիս հաշվի է առնում Եփրեմ Գագիկի Սարգսյանի կատարած հանցանքի` մի խումբ անձանց կողմից նախնական համաձայնությամբ, խոշոր չափերով կատարված յուրացման` հանրության համար վտանգավորության աստիճանը և բնույթը ու ամբաստանյալ Ե.Սարգսյանի անձնավորությունը։
Նկատի ունենալով, որ ամբաստանյալ Եփրեմ Սարգսյանն իրեն մեղսագրվող արարքը կատարել է 2007թ. նոյեմբեր ամսին` նախքան Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. ապրիլի 21-ի դատավճռի կայացումը, դատարանը գտնում է, որ նրա նկատմամբ կիրառելի է ՀՀ քրեական օրենսգրքի 66-րդ հոդվածի 6-րդ մասը, համաձայն որի պատիժ նշանակվում է սույն հոդվածի կանոններով, եթե դատավճիռը կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը։ Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը, իսկ նույն հոդվածի 3-րդ մասը սահմանում է, որ եթե հանցանքների համակցություն ընդգրկում է միայն միջին ծանրության կամ միջին ծանրության և ոչ մեծ ծանրության հանցանքներ, ապա վերջնական պատիժը նշանակվում է պատիժները լրիվ կամ մասնակի գումարելու միջոցով։
ՀՀ վճռաբեկ դատարանը 2010թ. օգոստոսի 27-ի թիվ ԵԷԴ0124 որոշմամբ իր դիրքորոշումն է արտահայտել ՀՀ քրեական օրենսգրքի 66-րդ հոդվածի 6-րդ մասի կանոնների միատեսակ կիրառության վերաբերյալ։ Մասնավորապես, հիշյալ որոշմամբ վճռաբեկ դատարանն արձանագրել է. «ՀՀ քրեական օրենսգրքի 66-րդ հոդվածի 6-րդ մասի կանոններով առաջին դատավճռով նշանակված պատժի կրած մասը վերջնական պատժի ժամկետին հաշվակցումը կարող է իրականացվել երկու եղանակով`
1.դատարանը, վերջնական պատիժ նշանակելով, նշանակված պատժից հանում է առաջին դատավճռով նշանակված պատժի կրած մասը` պատժի սկիզբը հաշվելով այդ դատավճիռը կայացնելու օրվանից։
2. դատարանը, վերջնական պատիժ նշանակելով, հաշվակցում է առաջին դատավճռով նշանակված պատժի կրած մասը` պատժի կրման սկիզբը հաշվելով առաջին դատավճռով սահմանված ժամկետից։
Թեև նշված երկու եղանակներից ցանկացածի ընտրության դեպքում նշանակված պատժի ժամկետները լրանալու առումով հետևանքները նույնն են` պատժի ժամկետները լրանալու օրերը համընկնում են, այնուհանդերձ, Վճռաբեկ դատարանը գտնում է, որ պատժի կրած մասը վերջնական պատժի ժամկետին հաշվակցելու եղանակի ընտրությունը կարևորվում է նաև նրանով, որ կախված եղանակի ընտրությունից, կարող են վրա հասնել դատապարտյալի համար անբարենպաստ և նրա վիճակը վատթարացնող այլ իրավական հետևանքներ։ Մասնավորապես, այն դեպքում, երբ հիշյալ հոդվածի կանոնները կիրառվում են այնպիսի անձի նկատմամբ, ով առաջին գործով կայացված դատավճռից հետո անընդմեջ գտնվում է անազատության մեջ, ապա վերը նշված երկու եղանակներից առաջինի կիրառման դեպքում դատապարտյալի` պայմանական վաղաժամկետ ազատվելու իրավունքը ծագում է ավելի ուշ, քան այն դեպքում, երբ երկրորդ կանոնի կիրառմամբ նրա նկատմամբ նշանակված պատժի ժամկետի սկիզբը հաշվվում է առաջին դատավճռով սահմանված ժամկետից...»։
Տվյալ դեպքում, ամբաստանյալ Եփրեմ Սարգսյանն իրեն մեղսագրվող հանցավոր արարքը կատարել է 2007թ. նոյեմբեր ամսին` նախքան Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. ապրիլի 21-ի դատավճռով դատապարտվելը, ընդ որում նշված դատավճռով Եփրեմ Սարգսյանը ՀՀ քրեական օրենսգրքի 179-րդ հոդվածի 2-րդ մասի 3-րդ կետով դատապարտվել է` ազատազրկման` երկու տարի ժամկետով` պատժի կրման սկիզբը հաշվելով 2010թ. մարտի 18-ից։
Այսպիսով, հիմք ընդունելով ՀՀ վճռաբեկ դատարանի վերլուծությունը և նկատի ունենալով, որ ամբաստանյալ Եփրեմ Սարգսյանը նախորդ դատավճռով դատապարտվելուց հետո անընդմեջ գտնվում է անազատության մեջ, ինչպես նաև դատապարտյալի համար անբարենպաստ և նրա վիճակը վատթարացնող այլ իրավական հետևանքներ հասնելուց խուսափելու նպատակով, դատարանը հանգեց այն հետևության, որ ՀՀ քրեական օրենսգրքի 66-րդ հոդվածի մասի 6-րդ մասի հիմունքներով պատժի կրած մասը վերջնական պատժի ժամկետին հաշվակցելու երկու եղանակից Եփրեմ Սարգսյանի նկատմամբ նպատակահարմար է ընտրել երկրորդ տարբերակը, այն է` վերջնական պատիժ նշանակելով, պետք է հաշվակցել առաջին դատավճռով նշանակված պատժի կրած մասը` պատժի կրման սկիզբը հաշվելով առաջին դատավճռով սահմանված ժամկետից` 2010թ. մարտի 18-ից։
Դատարանը որպես պատասխանատվությունը և պատիժը մեղմացնող ու անձը բնութագրող հանգամանք դիտում է այն, որ ամբաստանյալ Եփրեմ Գագիկի Սարգսյանը երիտասարդ է, խնամքին են գտնվում երկու երեխաները, մասամբ ընդունում է կատարած հանցանքը և զղջում դրա համար։
Պատասխանատվությունը և պատիժը ծանրացնող հանգամանքներ չկան։
Կատարած արարքների համար ամբաստանյալ Եփրեմ Գագիկի Սարգսյանը ենթակա է պատժի` ազատազրկման ձևով։
Դատարանը գտավ, որ ամբաստանյալ Եփրեմ Գագիկի Սարգսյանի նկատմամբ ընտրված խափանման միջոց կալանավորումը պետք է թողնել անփոփոխ մինչև դատավճռի օրինական ուժի մեջ մտնելը։
Քաղաքացիական հայցի հարցը պետք է համարել լուծված, այն քաղաքացիական դատավարության կարգով լուծված լինելու հիմքով։
Ղեկավարվելով Հայաստանի Հանրապետության քրեական դատավարության օրենսգրքի 357-360-րդ, 364-365-րդ, 366-րդ, 369-372-րդ հոդվածներով՝ դատարանը

Վ Ճ Ռ Ե Ց
Հայաստանի Հանրապետության քրեական օրենսգրքի 178-րդ հոդվածի 2-րդ մասի 1-ին, 2-րդ, 3-րդ կետերով հանցանքի կատարման մեղադրանքով որպես մեղադրյալ ներգրավված ամբաստանյալ Եփրեմ Գագիկի Սարգսյանին ճանաչել անմեղ և դատարանով արդարացված` մեղադրողի կողմից ամբաստանյալի նկատմամբ քրեական հետապնդում իրականացնելուց հրաժարվելու հիմքով։
Ամբաստանյալ Եփրեմ Գագիկի Սարգսյանին մեղավոր ճանաչել Հայաստանի Հանրապետության քրեական օրենսգրքի 179-րդ հոդվածի 2-րդ մասի 2-րդ և 3-րդ կետերով և դատապարտել ազատազրկման` երկու տարի ժամկետով` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով։
ՀՀ քրեական օրենսգրքի 66-րդ հոդվածի 6-րդ կետի հիմունքներով նշանակված պատիժները մասնակի գումարելու միջոցով` սույն դատավճռով նշանակված ` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` երկու տարի ժամկետով ազատազրկում պատժին մասնակի գումարել Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. ապրիլի 21-ի դատավճռով նշանակված երկու տարի ժամկետով ազատազրկում պատժից` երեք ամիս ժամկետով ազատազրկումը` Եփրեմ Գագիկի Սարգսյանի նկատմամբ վերջնական պատիժ սահմանել ազատազրկում` երկու տարի երեք ամիս ժամկետով` առանց որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով։
Ամբաստանյալ Եփրեմ Գագիկի Սարգսյանը պատիժը կրելու է ՀՀ արդարադատության նախարարության համապատասխան քրեակատարողական հիմնարկում։
Ամբաստանյալ Եփրեմ Գագիկի Սարգսյանի պատիժը կրելու սկիզբը հաշվել 2010թ. մարտի 18-ից ։
Քաղաքացիական հայցի հարցը համարել լուծված, այն քաղաքացիական դատավարության կարգով լուծված լինելու հիմքով։
Դատավճիռը հրապարակման օրվանից մեկամսյա ժամկետում կարող է բողոքարկվել Հայաստանի Հանրապետության վերաքննիչ քրեական դատարան։
ԴԱՏԱՎՈՐ՝ Գ.ԱՎԵՏԻՍՅԱՆ