Գործ թիվ ԵԿԴ 0350/01

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

ՆԱԽԱԳԱՀՈՂ ԴԱՏԱՎՈՐ՝ Գ. Ավետիսյան
ՔԱՐՏՈՒՂԱՐՈՒԹՅԱՄԲ՝ Հ.Հովհաննիսյանի
ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ՝ Ա. Աֆանդյանի
ՊԱՇՏՊԱՆՆԵՐ՝ Ա. Փարսադանյանի, Վ. Խաչատրյանի
ՏՈՒԺՈՂ` Ա. Մելքոնյանի

2011թ. մայիսի 4-ին, դռնբաց դատական նիստում, դատարանում, քննեց քրեական գործն ըստ մեղադրանքի Արմեն Արթուրի Սարգսյանի ծնված` 1987թ.
հոկտեմբերի 26-ին, Գերմանիայի Ֆեդերատիվ Հանրապետության Բագդենբուրգ քաղաքում, ազգությամբ` հայ, ՀՀ քաղաքացի, սովորում է Երևանի պետական Ագրարային համալսարանի 5-րդ կուրսում, ամուրի, խնամքին` երեք անձ, աշխատում է Երևանի Կենտրոնական ավտոկայանում որպես պետ, նախկինում չդատված, հաշվառված և բնակվում է Երևանի, Նորագյուղի թիվ 119 տանը, սույն քրեական գործով նախնական կալանքի տակ է գտնվել 2010թ սեպտեմբերի 24-ից մինչև 2010թ սեպտեմբերի 27-ը, մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով։ Առաջադրված մեղադրանքում Արմեն Արթուրի Սարգսյանն իրեն մեղավոր չճանաչեց։

Արսեն Ռաֆիկի Բաղդասարյանի ծնված` 1986թ. դեկտեմբերի 26-ին, Երևանում, ազգությամբ` հայ, ՀՀ քաղաքացի, միջնակարգ կրթությամբ, ամուրի, խնամքին` ոչ ոք, աշխատում է Երևանի Կիլիկիա գարեջրի գործարանում որպես բանվոր, նախկինում չդատված, հաշվառված և բնակվում է` Երևանի, Նորագյուղի թիվ 330 տանը, մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով։ Առաջադրված մեղադրանքում Արսեն Ռաֆիկի Բաղդասարյանն իրեն մեղավոր չճանաչեց։

Թիվ 13148210 քրեական գործը ՀՀ քրեական օրենսգրքի 258-րդ հոդվածի 3-րդ մասի 1-ին կետով հարուցվել է 2010թ-ի սեպտեմբերի 24-ին ՀՀ ոստիկանության ՔԳՎ Երևանի ՔՎ Կենտրոնականի Քննչական բաժնի կողմից։
Դատաքննությամբ և գործի տվյալներով դատարանը ապացուցված համարեց հետևյալը.
Ամբաստանյալներ Արմեն Արթուրի Սարգսյանն ու Արսեն Ռաֆիկի Բաղդասարյանը, քննությամբ չպարզված մի խումբ անձանց հետ, 2010թ. սեպտեմբերի 24-ին, ժամը 01։00-02։00-ն ընկած ժամանակահատվածում, գտնվելով ոգելից խմիչք օգտագործած վիճակում, շուրջ 10 րոպե տևողությամբ դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության` Երևանի Հյուսիսային պողոտա 4-րդ հասցեում գործող «Այսբերգ» բար-սրճարանի հաճախորդների և աշխատակիցների նկատմամբ, վիճաբանել են հաճախորդ, տուժող Արսեն Էդուարդի Մելքոնյանի հետ` քաշքշել, ծաղրել են նրան, հայհոյանքներ հնչեցրել վերջինիս հասցեին, որից հետո դուրս են եկել բար-սրճարանի ավտոկայանատեղի և այնտեղ հավաքված հասարակության անդամների նկատմամբ իրենց արհամարհական վերաբերմունքը բացահայտորեն ցույց տալով, չնչին շարժառիթով շարունակել են վիճաբանել տուժող Ա.Մելքոնյանի հետ, բարձրաձայն հնչեցրել սեռական բնույթի հայհոյանքներ, որի ընթացքում բռնություն գործադրելով ձեռքերով և ոտքերով հարվածներ են հասցրել վերջինիս մարմնի տարբեր հատվածներին` դիտավորությամբ պատճառել նրա առողջությունը կարճատև քայքայող թեթև մարմնական վնասվածք` ձախ աչքի վերին և ստորին կոպերի շրջանների արյունազեղումների, գլխուղեղի ցնցման ձևով։
Վերոհիշյալ արարքի համար ամբաստանյալներ Արմեն Արթուրի Սարգսյանին և Արսեն Ռաֆիկի Բաղդասարյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով։
Առաջադրված մեղադրանքում ամբաստանյալ Արմեն Արթուրի Սարգսյանն իրեն մեղավոր չճանաչեց և ցուցմունքներ տվեց այն մասին, որ 2010թ. սեպտեմբերի 24-ին ժամը 01։00- 02։00-ն ընկած ժամանակահատվածում ընկերոջ, ամբաստանյալ` Արսեն Բաղդասարյանի հետ գտնվել են Երևանի Հյուսիսային պողոտայում գտնվող «Այսբերգ» բար-սրճարանում։ Նկատել է, որ բարի հաճախորդներից մեկը` տուժող Արսեն Մելքոնյանը, որոշ ժամանակ անընդհատ իրեն է նայում, մոտեցել և հարցրել է նայելու պատճառը, պատասխանել է` արի դուրս` ասեմ, թե որտեղից եմ ճանաչում և առաջարկել է դուրս գալ սրճարանից։ Տուժողը եղել է ոգելից խմիչք օգտագործած վիճակում։ Դուրս գալով սրճարանի ավտոկայանատեղի` սկսել են միմյանց քաշքշել, տուժողին ասել է` դու ով ես, որ ինձ դուրս ես հրավիրում, այնուհետև մոտեցել է ընկերը` ամբաստանյալ Արսեն Բաղդասարյանն ու նույնպես սկսել է քաշքշել Ա.Մելքոնյանին և մեկ ապտակ հասցրել տուժողին։ Իրենք նրան էլ չեն հարվածել, այդտեղ ոչ մի հայհոյանք չի հնչել։ Հնարավոր է տուժողին ուրիշները ծեծած լինեն։ Եթե ինքը նրան չի ճանաչում, ինչու պետք է նրան ծաղրեր։ Դրանից հետո ժամանել են ոստիկաններն ու իրեն ու ընկերոջը բերման ենթարկել ոստիկանության Կենտրոնականի բաժին։ /քրեական գործ էջ 71, 90-92, 117-118, դատական նիստի արձանագրություն/։
Առաջադրված մեղադրանքում ամբաստանյալ Արսեն Ռաֆիկի Բաղդասարյանն իրեն մեղավոր չճանաչեց և ցուցմունքներ տվեց, որ ժամանակ անցկացնելու նպատակով ընկերոջ, ամբաստանյալ` Արմեն Սարգսյանի հետ 2010թ. սեպտեմբերի 24-ին` ժամը 01։00-ի սահմաններում գտնվել են Երևանի Հյուսիսային պողոտայում գտնվող «Այսբերգ» բար-սրճարանում։ Քիչ անց Ա.Սարգսյանը դուրս է եկել ակումբի ավտոկայանատեղի, որին հետևել է նաև ինքը։ Այնտեղ նկատել է, որ Ա.Սարգսյանը և գործով տուժող Ա. Մելքոնյանը քաշքշում են միմյանց, մոտեցել և բռունցքով մեկ անգամ հարվածել է վերջինիս դեմքի շրջանին։ Նշել է նաև, որ այդ ամենը տևել է մոտ 2 րոպե, որին ներկա են եղել ավտոկայանատեղիում հավաքված անծանոթ մի խումբ անձինք։ Իրենք տուժողին չեն ծեծել։ Ոչ ինքը, ոչ Ա. Սարգսյանը չեն հայհոյել։ Արմեն Սարգսյանի և տուժողի դուրս գալուց մեկ րոպե հետո ինքն էլ է դուրս եկել։ Տուժողին հեռացնում էր, իսկ նա չէր հեռանում, դրա համար է հարվածել նրան։ Հնարավոր է ապտակած կամ բռունցքով խփած լիներ։ Ինքը հայհոյանքներ չի լսել։ Ա.Սարգսյանը տուժողին չի հարվածել։ Այդ ամենը տևել է ընդամենը երկու րոպե։ Այդ քաշքշուկի պահին Ա.Սարգսյանը տուժողին հրել է, բայց բռունցքով չի հարվածել։ Հնարավոր է նախաքննության ժամանակ այդ պահը շփոթել է։ Վիճաբանությունն ավարտվելուց հետո ժամանել են ոստիկաններն ու իրենց բերման են ենթարկել ոստիկանության Կենտրոնականի բաժին։ /քրեական գործ էջ 104-106, 137, դատական նիստի արձանագրություն/
Ամբաստանյալներ Արմեն Սարգսյանի և Արսեն Բաղդասարյանի պատճառաբանություններն անհիմն են, դրանք հերքվում, իսկ նրանց մեղսագրված արարքը հիմնավորվում է գործի քննությամբ ձեռք բերված և դատաքննության ժամանակ հետազոտված հետևյալ ապացույցներով.
Տուժող` Արսեն Էդուարդի Մելքոնյանի ցուցմունքով այն մասին, որ 2010թ. սեպտեմբերի 24-ին ժամանակ անցկացնելու համար ընկերոջ, վկա` Արամ Հովհաննեսի Խաչիկյանի հետ ժամը 00։30-ի սահմաններում գտնվել են Երևանի Հյուսիսային պողոտայում գտնվող «Այսբերգ» բար-սրճարանում։ Որոշ ժամանակ անց ակումբ են մտել 4 երիտասարդներ և ցանկացել նստել իրենց հետևի սեղանի շուրջ։ Նրանցից ամբաստանյալ Արմեն Սարգսյանը ում մինչ այդ չի ճանաչել եղել է սպորտային համազգեստով։ Ա.Սարգսյանի դեմքը ծանոթ է եղել, դրա համար է տևական ժամանակ նայել։ Ա.Սարգսյանը մոտեցել և հարցրել է իր ուղղությամբ նայելու պատճառը։ Ներսում երաժշտության ձայնը բարձր է եղել, մի բանը մի քանի անգամ են ասել։ Որ իրար հասկանան, այդ պատճառով է Ա.Սարգսյանին հրավիրել դուրս, որտեղ ավելի մանրամասն կբացատրեր նրա վրա նայելու պատճառը։ Այդ պահին իրեն են մոտեցել նաև Ա.Սարգսյանի ընկերներն ու սկսել զազրախոսել։ Բարում հայհոյանքներ չի եղել, միայն եղել է տհաճ խոսկացություն 1-2 րոպե։ Ա.Խաչիկյանին ասել է, որ ներսում սպասի և Ա.Սարգսյանի ու նրա ընկերների հետ դուրս է եկել սրճարանի ավտոկայանատեղի, որտեղ Ա.Սարգսյանն առաջինը բռունցքով հարվածել է իր դեմքին, իսկ հետո էլ նրա ընկերները։ Չի տեսել Բաղդասարյանը իրեն հարվածել է, թե ոչ։ Սկսել են ոտքերով ու ձեռքերով հարվածել իր մարմնի տարբեր մասերին` շուրջ երկու րոպե ծեծի ենթարկելով իրեն։ Ա. Սարգսյանը մեկ անգամ սեռական բնույթի հայհոյանք է տվել։ Չի նկատել Ա.Բաղդասարյանը հայհոյել է, թե ոչ, 10 հոգի հաստատ եղել են իրեն ծեծողները։ Մի պահ դադարել են իրեն հարվածելուց և ինքը կարողացել է դուրս գալ ավտոկայանատեղիից և օգնություն կանչել ոստիկանության ՊՊԾ հատուկ գնդի իր աշխատակից ընկերներին։ Իր կողմից մատնացույց արված անձանց բերման են ենթարկել ոստիկանության Կենտրոնականի բաժին։ Ա.Մելքոնյանը նշել է նաև, որ երբ ակումբից դուրս են եկել ավտոկայանատեղիում ներկա են եղել 30-ից ավելի մարդիկ։ /քրեական գործ էջ 80-84, 221, 131-133, 277-278, դատական նիստի արձանագրություն/։
Վկա, «Այսբերգ» բար-սրճարանի մատուցող Էրիկ Արտուշի Հակոբջանյանի ցուցմունքով այն մասին, որ 2010թ. սեպտեմբերի 24-ին` ժամը 02։00-ի սահմաններում աշխատանքային պարտականությունների կատարման ընթացքում լսել է վիճաբանության ձայներ, այնուհետև շեղվելով աշխատանքից նկատել է, որ ակումբի հաճախորդներից մոտ 5 անձիք վիճաբանում, բարձրաձայն բղավում և հայհոյանքներ են տալիս, ինչը տևել է մոտ 5 րոպե, դրանից հետո նրանք դուրս են եկել ակումբից ավտոկայանատեղի տանող ելքով /քրեական գործ էջ 63-64 դատական նիստի արձանագրություն/
Վկա, ոստիկանության Կենտրոնական բաժնին կից պահպանության բաժնի աշխատակից Սամվել Մկրտչի Գևորգյանի ցուցմունքով այն մասին, որ 2010թ. սեպտեմբերի 23-ին ծառայություն է իրականացրել Հյուսիսային պողոտայում գտնվող «Այսբերգ» բար-սրճարանում, արդեն սեպտեմբերի 24-ին` ժամը 01։50-ի սահմաններում նկատել է, որ 4-5 երիտասարդներ բարձրաձայն զրուցում են, նրանց մեջ են եղել նաև ամբաստանյալներ Արմեն Սարգսյանը, Արսեն Բաղդասարյանը, տուժող Արսեն Մելքոնյանը, որոնց նա տեսել է առաջին անգամ։ Քիչ անց նրանք դուրս են եկել ակումբի ավտոկայանատեղի։ Մտածելով, որ կարող է վիճաբանություն տեղի ունենալ, ինքը նույնպես դուրս է եկել ավտոկայանատեղի, որտեղ տեսել է, որ Ա.Սարգսյանն ու Ա.Բաղդասարյանը իրենց ընկերների հետ ծեծում են Ա. Մելքոնյանին։ Լինելով ոստիկանի համազգեստով մոտեցել և փորձել է բաժանել նրանց, սակայն քանի որ Ա.Մելքոնյանին ծեծողները մեծաթիվ են եղել, դա իրեն չի հաջողվել։ Ստիպված օգնություն է կանչել։ Հայհոյանքներ լսել է։ Տուժողին գետնին ընկած ժամանակ չի տեսել։ Նշել է նաև, որ ծեծն ու հայհոյանքները տևել են 2-3 րոպե, որին ականատես են եղել ավտոկայանատեղիում հավաքված մի խումբ անձիք։ Այնուհետև ժամանել են ոստիկանության աշխատակիցներն ու Ա.Մելքոնյանի մատնացույց արած անձանց բերման են ենթարկել ոստիկանության Կենտրոնականի բաժին։ /քրեական գործ էջ 95-97, 266-267, 268-269, դատական նիստի արձանագրություն/։
Վկա Արամ Հովհաննեսի Խաչիկյանի ցուցմունքով այն մասին, որ 2010թ. սեպտեմբերի 24-ին` ժամը 24։45-ի սահմաններում ընկերոջ` տուժող Արսեն Մելքոնյանի հետ գտնվել են Հյուսիսային պողոտայում գտնվող «Այսբերգ» բար-սրճարանում, 20-30 րոպե անց ակումբ են մտել 4-5 երիտասարդներ, որոնցից Արմեն Սարգսյանը մոտեցել է իրենց և բացատրություն պահանջել իր ուղղությամբ տևական ժամանակ նայելու համար։ Ընկերոջ հետ փորձել են բացատրել, թե ինչու են նայում։ Ակումբի ներսում հայհոյանքներ չեն եղել։ Ա.Մելքոնյանը Ա.Սարգսյանի հետ զրուցելու նպատակով դուրս են գնացել ավտոկայանատեղի, իսկ Ա.Մելքոնյանն իրեն ասել է, որ մնա ակուբում և սպասի իրեն։ 5-10 րոպե անց դուրս է եկել ակումբի ավտոկայանատեղի և նկատել ընկերոջը` ծեծված վիճակում, վերջինս իրեն պատմել է, որ յոթ հոգով, այդ թվում ամբաստանյալներ Ա.Սարգսյանն ու Ա.Բաղդասարյանը ծեծի են ենթարկել իրեն։ Այդ պահին ժամանել են ոստիկանության աշխատակիցներն ու Ա.Մելքոնյանի կողմից մատնացույց արված անձանց բերման են ենթարկել ոստիկանության Կենտրոնականի բաժին /քրեական գործ էջ 192-193, դատական նիստի արձանագրություն/
Վկաներ, ոստիկանության ՊՊԾ գնդի 3-րդ հատուկ գումարտակի 1-ին վաշտի ոստիկաններ Արթուր Ռոբերտի Եղինյանի, Պատվական Աշոտի Կարապետյանի և Արման Ռաֆայելի Մելքոնյանի ցուցմունքներով այն մասին, որ 2010թ. սեպտեմբերի 24-ին պարեկային ավտոմեքենայով ծառայություն են իրականացրել Կենտրոն վարչական շրջանի տարածքում։ Ժամը 02։00-ի սահմաններում Պ.Կարապետյանի բջջային հեռախոսին զանգահարել է նույն վաշտի ոստիկան, տուժող Արսեն Մելքոնյանն ու հայտնել, որ մի խումբ անձինք Հյուսիսային պողոտայում գտնվող «Այսբերգ» բար-սրճարանում իրեն ծեծի են ենթարկել և օգնություն է խնդրել։ Իրենց հերթին օգնության են կանչել թիվ 0350 պարեկային ավտոմեքենայի կարգախմբին ու շտապել նշված վայր։ Բար-սրճարանի մուտքի մոտ իրենց դիմավորել է Ա.Մելքոնյանն ու ուղեկցել ակումբի ստորգետնյա ավտոկայանատեղի, որտեղ հավաքված են եղել մի խումբ անձինք։ Նրանց մեջ Ա.Մելքոնյանը մատնացույց է արել իրեն ծեծի ենթարկած անձանց, որոնց էլ բերման են ենթարկել ոստիկանության Կենտրոնականի բաժին։ Նշել են նաև, որ երբ Ա.Մելքոնյանը դիմավորել է իրենց ակումբի մուտքի մոտ, նրա ձախ աչքի շրջանում նկատել են վնասվածք։ Բաժնում պարզվել է, որ Ա.Մելքոնյանին ծեծի ենթարկած անձինք հանդիսանում են Արմեն Սարգսյանն ու Արսեն Բաղդասարյանը /քրեական գործ էջ 225-226, 227-228, 229-230, դատական նիստի արձանագրություն/
Վկա, «Այսբերգ» բար-սրճարանի հնչյունային օպերատոր Էդգար Արտաշեսի Բադալյանի դատարանում հետազոտված նախաքննական ցուցմունքով այն մասին, որ 2010թ. սեպտեմբերի 24-ին` ժամը 02։00-ի սահմաններում աշխատանքային պարտականությունների կատարման ընթացքում լսել է վիճաբանության ձայներ։ Շեղվելով աշխատանքից նկատել է, որ ակումբի հաճախորդներից 5-7 անձինք բարձրաձայն վիճաբանում և քաշքշում են միմյանց։ Այնուհետև նրանք դուրս են եկել ակումբի ավտոկայանատեղի։ Մինչև ակումբի դուռը փակվելը նկատել է, որ նրանք դրսում նույնպես քաշքշում են միմյանց /քրեական գործ էջ 61-62, դատական նիստի արձանագրություն/
Դատաբժշկական փորձաքննության թիվ 1486/հ եզրակացությամբ, համաձայն որի Արսեն Մելքոնյանի մարմնական վնասվածքները` ձախ աչքի վերին և ստորին կոպերի շրջանների արյունազեղումների, գլխուղեղի ցնցման ձևով, պատճառվել են` բութ, կոշտ առարկայով, վերոհիշյալ ժամկետում և հանգամանքներում` Ա.Մելքոնյանի առողջությանը պատճառելով թեթև վնաս` առողջության կարճատև քայքայումով /քրեական գործ էջ 196-197/
Դատարանը, վերլուծելով և գնահատելով քրեական գործի նյութերը, ապացուցված է համարում, որ ամբաստանյալ Ա. Սարգսյանը, ոգելից խմիչք օգտագործած վիճակում, 2010թ. սեպտեմբերի 24-ին` ժամը 01։00-02։00-ն ընկած ժամանակահատվածում «Այսբերգ» բար-սրճարանի ավտոկայանատեղիում, ամբաստանյալ Արսեն Բաղդասարյանի և գործով չպարզված մի խումբ անձանց հետ, շուրջ 10 րոպե տևողությամբ կոպիտ կերպով խախտելով հասարակական կարգը, բացահայտ անհարգալից վերաբերմունք է ցուցաբերել հասարակության` ավտոկայանատեղիում հավաքված անձանց նկատմամբ, վիճաբանության մեջ է մտել Արսեն Մելքոնյանի հետ, որի ընթացքում հայհոյանքներ է տվել նրա հասցեին, բռնություն գործադրել նրա նկատմամբ, քաշքշել, ձեռքերով և ոտքերով հարվածներ է հասցրել նրա մարմնի տարբեր մասերին, պատճառել առողջությունը կարճատև քայքայող թեթև մարմնական վնաս։
Դատարանը ապացուցված է համարում, որ ամբաստանյալ Ա. Բաղդասարյանը ոգելից խմիչք օգտագործած վիճակում, 2010թ. սեպտեմբերի 24-ին` ժամը 01։00- 02։00-ն ընկած ժամանակահատվածում «Այսբերգ» բար-սրճարանի ավտոկայանատեղիում, ամբաստանյալ Արմեն Սարգսյանի և գործով չպարզված մի խումբ անձանց հետ, շուրջ 10 րոպե տևողությամբ կոպիտ կերպով խախտելով հասարակական կարգը, բացահայտ անհարգալից վերաբերմունք է ցուցաբերել հասարակության` ավտոկայանատեղիում հավաքված անձանց նկատմամբ, վիճաբանության մեջ է մտել Արսեն Մելքոնյանի հետ, որի ընթացքում հայհոյանքներ տվել նրա հասցեին, բռնություն գործադրել նրա նկատմամբ, քաշքշել, ձեռքերով և ոտքերով հարվածներ հասցրել նրա մարմնի տարբեր մասերին, պատճառել առողջությունը կարճատև քայքայող թեթև մարմնական վնաս։
Դատարանը պատիժ սահմանելիս հաշվի է առնում ամբաստանյալներ Ա. Սարգսյանի և Ա. Բաղդասարյանի կատարած հանցանքի` մի խումբ անձանց կողմից, անձի նկատմամբ բռնություն գործադրելով կատարված խուլիգանության` հանրության համար վտանգավորության աստիճանը և բնույթը ու ամբաստանյալներ Ա. Սարգսյանի և Ա. Բաղդասարյանի անձնավորությունը։
Դատարանը որպես պատասխանատվությունը և պատիժը մեղմացնող ու անձը բնութագրող հանգամանք դիտում է այն, որ ամբաստանյալներ Արմեն Սարգսյանն ու Արսեն Բաղդասարյանը երիտասարդ են, նախկինում դատված, արատավորված չեն եղել, հանցանք կատարում են առաջին անգամ, իրենց մեղավոր չեն ճանաչել, սակայն ցուցմունքներում ըստ էության մասնակի ընդունել են կատարած հանցանքը և զղջացել, տուժողը խնդրել է մեղմ վարվել, բնութագրվում են դրական, Ա.Սարգսյանը ուսանող է, խնամքին են գտնվում երեք անձ, նրանք զբաղվել են հանրօգուտ աշխատանքով, վիճաբանությանը իր վարքագծով նպաստել է նաև տուժող` Մելքոնյանը, ով նախ անհարկի ակնապիշ նայել է ամբաստանյալ Ա.Սարգսյանին, ապա առանց պատճառի դուրս հրավիրել։
Դատարանը պատասխանատվությունը և պատիժը ծանրացնող հանգամանք է դիտում հանցանքը ոգելից խմիչք օգտագործած վիճակում կատարելը։
Կատարած արարքների համար ամբաստանյալ Ա. Սարգսյանը և Ա. Բաղդասարյան ենթակա են պատժի։
Դատարանը գտավ, որ ամբաստանյալ Ա. Սարգսյանի նկատմամբ ընտրված այլընտրանքային խափանման միջոց գրավը պետք է թողնել անփոփոխ մինչև դատավճռի օրինական ուժի մեջ մտնելը։
Դատարանը գտավ, որ ամբաստանյալ Արմեն Արթուրի Սարգսյանի նկատմամբ կիրառված այլընտրանքային խափանման միջոց գրավը` 500.000 /հինգ հարյուր հազար/ ՀՀ դրամը, դատավճռի օրինական ուժի մեջ մտնելուց և դատավճիռն ի կատար ածելուց հետո պետք է վերադարձնել գրավատու` Արմեն Արթուրի Սարգսյանին։
Դատարանը գտավ, որ ամբաստանյալ Ա. Բաղդասարյանի նկատմամբ ընտրված խափանման միջոցը ստորագրություն չհեռանալու մասին պետք է թողնել անփոփոխ մինչև դատավճռի օրինական ուժի մեջ մտնելը։
ՀՀ քրեական օրենսգրքի 69-րդ հոդվածի 5-րդ մասի համաձայն` մինչև դատական քննությունը կալանքի տակ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու ձևով պատիժ նշանակելիu դատարանը, հաշվի առնելով կալանքի տակ պահելու ժամկետը, մեղմացնում է նշանակված պատիժը կամ լրիվ ազատում պատիժը կրելուց։ Տվյալ դեպքում Ա.Սարգսյանը երեք օր գտնվել է անազատության մեջ, ուստի ղեկավարվելով օրենքի վերոհիշյալ դրույթով դատարանը գտավ, որ հաշվի առնելով վերոհիշյալը Ա.Սարգսյանի նկատմամբ տուգանքի ձևով նշանակվելիք պատիժը համամասնորեն պետք է մեղմացնել։
Ղեկավարվելով Հայաստանի Հանրապետության քրեական դատավարության օրենսգրքի 357-360-րդ, 364-365-րդ, 369-372-րդ հոդվածներով՝ դատարանը

Վ Ճ Ռ Ե Ց

Ամբաստանյալ Արմեն Արթուրի Սարգսյանին մեղավոր ճանաչել Հայաստանի Հանրապետության քրեական օրենսգրքի 258-րդ հոդվածի 3-րդ մասի 1-ին կետով և դատապարտել` տուգանքի` նվազագույն աշխատավարձի հինգ հարյուրապատիկի` հինգհարյուր հազար ՀՀ դրամի չափով։ ՀՀ քրեական օրենսգրքի 69-րդ հոդվածի 5-րդ մասի հիմունքներով նշանակված պատժին հաշվակցել նախնական կալանքի տակ գտնվելու երեք օրը և մեղմացնել նշանակված պատիժը ու վերջնական պատիժ նշանակել տուգանք` նվազագույն աշխատավարձի չորսհարյուրհիսունապատիկի` չորս հարյուր հիսուն հազար ՀՀ դրամի չափով։
Ամբաստանյալ Արմեն Արթուրի Սարգսյանի նկատմամբ ընտրված այլընտրանքային խափանման միջոց գրավը թողնել անփոփոխ մինչև դատավճռի օրինական ուժի մեջ մտնելը։
Ամբաստանյալ Արմեն Արթուրի Սարգսյանի նկատմամբ կիրառված այլընտրանքային խափանման միջոց գրավը` 500.000 /հինգ հարյուր հազար/ ՀՀ դրամը, դատավճռի օրինական ուժի մեջ մտնելուց և դատավճիռն ի կատար ածելուց հետո վերադարձնել գրավատու` Արմեն Արթուրի Սարգսյանին։
Ամբաստանյալ Արսեն Ռաֆիկի Բաղդասարյանին մեղավոր ճանաչել Հայաստանի Հանրապետության քրեական օրենսգրքի 258-րդ հոդվածի 3-րդ մասի 1-ին կետով և դատապարտել` տուգանքի` նվազագույն աշխատավարձի հինգ հարյուրապատիկի` հինգ հարյուր հազար ՀՀ դրամի չափով։
Ամբաստանյալ Արսեն Ռաֆիկի Բաղդասարյանի նկատմամբ ընտրված խափանման միջոցը ստորագրություն չհեռանալու մասին թողնել անփոփոխ մինչև դատավճռի օրինական ուժի մեջ մտնելը։
Դատավճիռը հրապարակման օրվանից մեկամսյա ժամկետում կարող է բողոքարկվել Հայաստանի Հանրապետության վերաքննիչ քրեական դատարան։

ԴԱՏԱՎՈՐ՝ Գ.ԱՎԵՏԻՍՅԱՆ