Գործ թիվ ԵԿԴ/0327/01/


ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

ՆԱԽԱԳԱՀՈՂ ԴԱՏԱՎՈՐ՝ Գ. Ավետիսյան
ՔԱՐՏՈՒՂԱՐՈՒԹՅԱՄԲ՝ Հ.Հովհաննիսյանի
ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ՝ Ա.Հակոբյանի
ՊԱՇՏՊԱՆ` Ա.Մաթևոսյանի
ՏՈՒԺՈՂ` Մ.Փուրբաղերփիչայի
ՏՈՒԺՈՂԻ ՆԵՐԿԱՅԱՑՈՒՑԻՉՆԵՐ` Ա.Օհանյանի, Է.Մանասյանի
ԹԱՐԳՄԱՆԻՉ` Ռ.Թովմասյանի

2011թ. հունիսի 20-ին, դռնբաց դատական նիստում, դատարանում, քննեց քրեական գործն ըստ մեղադրանքի Սյուզաննա Արամի Ղարիբյանի ծնված` 1977թ. սեպտեմբերի 23-ին
Երևանում, ազգությամբ` հայ, ՀՀ քաղաքացի,
միջնակարգ կրթությամբ, նախկինում չդատված,
ամուսնալուծված, խնամքին` մեկ երեխա և մայրը, հաշվառված է Երևանի Ավան Առինջ, թիվ 2/8շենքի, թիվ 45 բնակարանում, բնակվում է Երևանի, Լալայանց փողոցի թիվ 57/4 տանը, մեղադրվում է ՀՀ քրեական օրենսգրքի 178-րդ հոդվածի 2-րդ մասի 2-րդ կետով։ Առաջադրված մեղադրանքում ամբաստանյալ Սյուզաննա Արամի Ղարիբյանն իրեն
մեղավոր չճանաչեց։

Թիվ 13147710 քրեական գործը Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ կետով հարուցվել է 2010թ. սեպտեմբերի 22-ին ՀՀ ոստիկանության քննչական գլխավոր վարչության Երևան քաղաքի քննչական վարչության Կենտրոնականի քննչական բաժնի կողմից։
Դատաքննությամբ և գործի տվյալներով դատարանը ապացուցված համարեց հետևյալը.
Ամբաստանյալ Սյուզաննա Ղարիբյանը զբաղվել է Իրանի Իսլամական Հանրապետությունից ժամանած պարսիկ զբոսաշրջիկների համար վարձու բնակարաններ գտնելով և նրանց համար Հայաստանի տեսարժան վայրեր էքսկուրսիաներ կազմակերպելով։
Ս.Ղարիբյանը 2010թ. մարտ ամսին ծանոթացել է զբոսաշրջիկ, ԻԻՀ քաղաքացի տուժող Մաջիտ Ռամեզանի Փուրբաղերփիչայի հետ։ Հայաստան կատարած երկու այցելությունների ընթացքում վերջինիս համար վարձու բնակարան է գտել, ուղեկցել է Սևանա լիճ, որի ընթացքում Ս.Ղարիբյանի և Մ.Փուրբաղերփիչայի մոտ ձևավորվել են նորմալ փոխհարաբերություններ։
2010թ. հունիսի 24-ին հերթական անգամ տուժող Մ.Փուրբաղերփիչան ժամանել է Հայաստան։ Ս.Ղարիբյանը նրան ուղեկցել է Երևանի Չարենցի թիվ 103 հասցեում գտնվող վարձու բնակարան։ Տեղեկանալով, որ Մ.Փուրբաղերփիչայի մոտ 5.500 ԱՄՆ դոլար գումար կա, նպատակադրվել է այն հափշտակել։ Հանցավոր մտադրությունն իրականացնելու նպատակով Ս.Ղարիբյանը Մ.Փուրբաղերփիչային հայտնել է, թե իբր բնակարանում գումար պահելն ապահով չէ, այն իր մոտ պահելու և հաջորդ օրը վերադարձնելու պատրվակով Մ.Փուրբաղերփիչայից վերցրել և խարդախությամբ հափշտակել է վերջինիս պատկանող խոշոր չափի` 2.031.040 ՀՀ դրամին համարժեք 5.500 ԱՄՆ դոլար գումարը։
Վերոհիշյալ արարքը կատարելու համար ամբաստանյալ Սյուզաննա Ղարիբյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով։
Առաջադրված մեղադրանքում ամբաստանյալ Սյուզաննա Ղարիբյանն իրեն մեղավոր չճանաչեց և ցուցմունք տվեց, որ ինքը Մ.Փուրբաղերփիչայից ընդհանրապես գումար չի վերցրել, այլ 2010թ. հունիսի 24-ին իր գործընկերոջ` Յաղուբ Մորթազապուր Մամաղանիի հետ Իրանից ժամանած Մաջիտ Փուրբաղերփիչային ուղեկցել է Երևանի Չարենցի թիվ 103 հասցեում գտնվող, Գայանե Դավթյանին պատկանող տուն, որտեղ օրավարձով պետք է մնար Մ.Փուրբաղերփիչան, ապա պայմանավորվել են հանդիպել մի քանի ժամ անց, որից հետո ինքը Յ.Մորթազապուրի հետ հեռացել է այդ տանից։ Երեկոյան Մ.Փուրբաղերփիչանի և Յ.Մորթազապուրի հետ գնացել են բար և ռեստորան։ Ռեստորանում ամեն մեկը փակել է իր բաժինը։ Գայանե Դավթյանը հաջորդ օրը իրեն ընդամենը մեկ անգամ է զանգահարել։ Վթարի մասին նրա հետ խոսակցություն չի եղել, տղան Գայանե Դավթյանի հետ չի խոսել։ Վթարը կապված է եղել Յ. Մորթազապուրի ազգականի հետ։ Յ. Մորթազապուրն է Գայանե Դավթյանին վթարի մասին ասել։ Հնարավոր է Գայանե Դավթյանն իր ասածները ճիշտ չի հասկացել, որ տուժողի հետագա մնալու վարձը ինքն է վճարելու։ Տուժողը ուսանելու նպատակով Հայաստան գալու մասին չի նշել, նա ցանկացել է իր հետ միասին աշխատել, իր հետ իր տանը մնալ։ Քանի որ Մաջիտ Փուրբաղերփիչան իրեն սիրահետել է, առաջարկել է միասին աշխատել, ինքը մերժել է, դրա համար է նա իրենից վրեժխնդիր լինում։ Ինքը ոչ թե հաջորդ օրը փախել է Վրաստան, այլ պարսիկ զբոսաշրջիկների է տարել Թբիլիսի։ Վերջին անգամ, երբ Մաջիտ Փուրբաղերփիչան զանգահարել է իրեն, ինքը չի խոսել, հեռախոսը փոխանցել է տղային, տղան նրան չի ասել, որ ինքը վթարի է ենթարկվել։ Տուժողին միասին ապրելու և աշխատելու հարցն է հուզել, դրա համար է այդքան զանգահարել իրեն։ Վրաստան գնալու ժամանակ իր մոտ եղել է մոտ 500 ԱՄՆ դոլար։ Այն պարսիկները, որոնց ինքը տարել է Վրաստան, սահմանը ոտքով են հատել, երևի այդ պատճառով նրանք իր մեքենայի վրա գրանցված չեն։ Յ.Մորթազապուրին Վրաստանում 2-րդ օրը վռնդել է։ Յ. Մորթազապուրիի հետ իր վեճը եղել է իրենց համատեղ ձեռք բերած ավտոմեքենայի առիթով։ Մ.Փուրբաղերփիչան և Յ.Մորթազապուրն իրեն զրպարտում են։ /քրեական գործ, էջ 22-24, 25, 30-32, 62-67, 73-75, 76-77, 99, 104, դատական նիստի արձանագրություն/։
Ամբաստանյալ Սյուզաննա Արամի Ղարիբյանի պատճառաբանություններն անհիմն են, նպատակ են հետապնդում խուսափել քրեական պատասխանատվությունից, դրանք հերքվում են, իսկ նրան մեղսագրված արարքները հիմնավորվում` գործի քննությամբ ձեռք բերված և դատաքննության ժամանակ հետազոտված հետևյալ ապացույցներով.
Տուժող Մաջիտ Ռամեզանի Փուրբաղերփիչայի ցուցմունքներով, այն մասին, որ 2010թ. մարտին որպես զբոսաշրջիկ ժամանել է Հայաստան, ծանոթացել ամբաստանյալ Սյուզաննա Ղարիբյանի հետ, ով իր համար վարձու բնակարան է գտել, տվել է բջջային հեռախոսահամարը, հետագայում ևս իր ծառայություններից օգտվելու համար։ Հաջորդ անգամ` 2010թ. հունիս ամսվա սկզբներին Հայաստան գալով, կրկին դիմել է Ս.Ղարիբյանին, որը նրա համար վարձու բնակարան է գտել, ուղեկցել է Սևանա լիճ։ 2010թ. հունիսի 24-ին ինքը երրորդ անգամ ժամանել է Հայաստան։ Նախապես պայմանավորվածության համաձայն ավտոկայանում հանդիպել Ս.Ղարիբյանին և նրա ընկերոջը` Յաղուբ Մորթազապուրին, միասին գնացել են Երևանի Չարենցի թիվ 103 տուն, ինքը տանտիրուհուն վճարել է մեկ օրվա սենյակի վարձը` 20 ԱՄՆ դոլար, որից հետո տանտիրուհին գնացել է։ Սենյակում մնացել են ինքը, Ս.Ղարիբյանը և Յ.Մորթազապուրը։ Իր մոտ եղած 5.500 ԱՄՆ դոլար գումարը դրել է պայուսակի մեջ գտնվող տաբատի գրպանում և մտել սանհանգույց։ Լվացվելու ընթացքում Սյուզաննա Ղարիբյանը վերցրել է այդ գումարը և հաշվել։ Երբ Ս.Ղարիբյանին հարցրել է, թե ինչու է նա իր գումարը հաշվում, վերջինս պատասխանել է, որ այդ տանը գումար պահելն ապահով չէ, հնարավոր է այն գողանան, վստահեցրել է, որ գումարը կպահի իր մոտ, իսկ հաջորդ օրն այն միասին կտանեն բանկ։ Հաջորդ օրն ինքը բազմիցս զանգահարել է Ս.Ղարիբյանին, բայց վերջինս զանգերին չի պատասխանել։ Դրանից հետո Ս.Ղարիբյանն իրեն չի հանդիպել, իր գումարը չի վերադարձրել։ Ինքը մի քանի անգամ ռեստորանում էլ է պնդել, որ Ս. Ղարիբյանը իր գումարը վերադարձնի, բայց չի վերադարձրել։ Ռեստորանի հաշիվը փակել է Ս. Ղարիբյանը։ Իր մոտ մնացել է միայն Գայանե Դավթյանի տված 80 ԱՄՆ դոլարին համարժեք դրամը։ 5500 ԱՄՆ դոլարը բերել էր Հայաստանում ուսանելու համար։ Չի հիշում Յաղուբ Մորթազապուրին հարցրել է, թե Ս. Ղարիբյանի մոտ իր գումարը մնալը ապահով է, թե ոչ։ Գայանե Դավթյանի տանը մնացել է 5-7 օր և նրան բազմիցս խնդրել է, որ վերջինս կապնվի Ս. Ղարիբյանի հետ։ Երբ Ս.Ղարիբյանի հեռախոսակապը դադարել է, ինքը Գայանե Դավթյանին ասել է, որ գումար չունի` դա Հայաստան գալու հաջորդ օրը կամ դրա հաջորդ օրն է եղել։ Ս.Ղարիբյանի կողմից գումարը վերցնելու և հաշվելու ժամանակ սենյակում միայն Յաղուբ Մորթազապուրին է եղել։ Ս.Ղարիբյանը սպառնացել է և իրեն և Յաղուբ Մորթազապուրին, վերջինս էլ է Ս.Ղարիբյանից վախեցել։ Ըստ Յ.Մորթազապուրի, վերջինս և Ս.Ղարիբյանը Վրաստանում կռվել են նրա համար, որ Ս.Ղարիբյանը իր գումարը ետ չի տվել։ Հույսով է եղել, որ Ս.Ղարիբյանը գումարը կբերի, այդ պատճառով է ուշ դիմել ոստիկանություն։ Գայանե Դավթյանը սուտ է ասել, որ ինքը նրան 20 դոլարանոց է տվել։ Ս.Ղարիբյանին տվել է 100 դոլարը, Ս.Ղարիբյանն էլ այդ գումարը տվել է Գայանե Դավթյանին /միգուցե ինքը նախաքննության ժամանակ ասել է, որ ինքն է այդ գումարը տվել Գայանե Դավթյանին, նկատի ունենալով, որ իր գումարն է տվել Գայանե Դավթյանին/։ Մինչև դիմում ներկայացնելը Ս.Ղարիբյանին չի հանդիպել։ Ինքը նրա որդուն էլ է ասել, որ փոխանցի մորը իր գումարը վերադարձնելու մասին։ /քրեական գործ, էջ 3, 7, 11, 44-47, 73-75, դատական նիստի արձանագրություն/։
Վկա Գայանե Արամի Դավթյանի ցուցմունքով, այն մասին, որ նախկինում իր` Երևանի Չարենցի թիվ 103 հասցեում գտնվող բնակարանի սենյակներից մեկը վարձակալությամբ տրամադրել է Սյուզաննա Ղարիբյանի ուղեկցած պարսիկ զբոսաշրջիկներին։ 2010թ. հունիսի 24-ին Սյուզաննա Ղարիբյանը և նրա գործընկեր Յաղուբ Մորթազապուրը, որին ինքը ճանաչում է Արսեն անունով, մի պարսիկ զբոսաշրջիկի հետ, որի անունը ինչպես հետագայում իմացել է, Մաջիտ է, եկել են իր տուն։ Մաջիտ Փուրբաղերփիչայինը իր գոտկատեղից կապած դրամապանակից հանել է 20 ԱՄՆ դոլար, անձամբ վճարել մեկ օրվա սենյակի վարձը, որից հետո ինքը հեռացել է` Սյուզաննա Ղարիբյանին և Մաջիտ Փուրբաղերփիչային սենյակում թողնելով միայնակ։ Դրանից հետո Մաջիտ Փուրբաղերփիչայինը շուրջ 15 օր մնացել է իր տանը, սակայն Սյուզաննա Ղարիբյանն այդպես էլ չի եկել և սենյակի վարձակալության գումարը չի վճարել։
Մոտ 3-4 օր հետո տուժողն իրեն ասել է, որ գումար չունի, գումարը Սյուզաննա Ղարիբյանը վերցրել է և փախել։ Տուժողը իր վարձավճարը` 20 դոլարանոցը հանել է գոտկատեղից կախված «պորտմանչիկից»։ Ինքը թղթադրամների կապոց տուժողի ձեռքին չի տեսել։ Եթե նրա ձեռքին կապոցով գումար լիներ, կտեսներ։ Ինքը անձամբ զանգահարել է Ս. Ղարիբյանին, բայց նրա բջջային հեռախոսը անհասանելի է եղել։ Տուժողը իր տանը արդեն մնում էր 2-3 օր, երբ ինքը զանգահարել է Ս. Ղարիբյանին։ Տուժողին իր տանը տեղավորելու հաջորդ օրը Ս. Ղարիբյանը զանգահարել է իրեն և ասել, եթե Մաջիթը ուզում է, թող մնա, եթե ոչ` թող գնա։ Սյուզաննա Ղարիբյանին ասել է թող Մաջիտ Փուրբաղերփիչայինը մնա, եթե նա գումարը չտա` ինքը կվճարի։ Տուժողն իրեն ասել է, որ ինքն է այդ գումարը տվել Սյուզաննա Ղարիբյանին, որ վերջինս իր համար վարձով բնակարան գտնի։ Սյուզաննա Ղարիբյանի տղան զանգահարել է իրեն և ասել, որ Սյուզաննա Ղարիբյանի հետ դեպք է պատահել, վթար է եղել, ինքը չի կարող գալ։ Մաջիտ Փուրբաղերփիչայինը իրեն ասել է, որ ուզում է Սյուզաննա Ղարիբյանի հետ աշխատել /քրեական գործ, էջ 17, 18-19, 57-59, դատական նիստի արձանագրություն/։
Տուժողի ներկայացուցիչ Էդուարդ Մանասյանի ցուցմունքով, այն մասին, որ 2010թ. սեպտեմբեր-հոկտեմբեր ամիսներին Իրանի քաղաքացի, իր ծանոթ Մաջիտ Փուրբաղերփիչան հայտնել է, որ Սյուզաննա Ղարիբյանը, ով նախկինում մի քանի անգամ իր համար Երևանում վարձու բնակարաններ է գտել, 2010թ. հունիսի 24-ին պատճառաբանելով, թե այդ տանը գումար պահելն ապահով չէ, իրենից վերցրել է 5.500 ԱՄՆ դոլար, և հետագայում խարդախությամբ հափշտակել` այն։
Տուժողի ներկայացուցիչ Էդուարդ Մանասյանը դատարանում պնդել է իր կողմից ներկայացրած հայցադիմումը և պահանջել ամբաստանյալ Սյուզաննա Ղարիբյանից հօգուտ տուժող Մաջիտ Փուրբաղերփիչայի բռնագանձել 2.031.040 ՀՀ դրամ, ինչպես նաև ՀՀ քաղաքացիական օրենսգրքի 411-րդ հոդվածով սահմանված տոկոսներ` հաշվարկած սկսած պատասխանողի կողմից թույլ տրված կետանցի օրվանից, այն է` 2010թ. հունիսի 26-ից մինչև պարտավորության ամբողջությամբ դադարման օրը /քրեական գործ, էջ 83-84, դատական նիստի արձանագրություն/։
Վկա, Յաղուբ Էսմայելի Մորթաապուր Մամաղանիի դատարանում հետազոտված նախաքննական ցուցմունքներով, այն մասին, որ մոտ երկու տարի ամբաստանյալ Սյուզաննա Ղարիբյանի հետ միասին զբաղվել են Իրանից ժամանած պարսիկ զբոսաշրջիկների համար վարձու բնակարաններ գտնելով, նրանց Հայաստանի տեսարժան վայրեր էքսկուրսիաներ կազմակերպելով։ 2010թ. մարտին ծանոթացել են Իրանի քաղաքացի Մաջիտ Փուրբաղերփիչայի հետ, այդ և հաջորդ այցելությունների ընթացքում Ս.Ղարիբյանի հետ նրան վարձու բնակարան են տրամադրել։
2010թ. հունիսի 24-ին Սյուզաննա Ղարիբյանի հետ ավտոկայանում դիմավորել են Մ.Փուրբաղերփիչային, նրան ուղեկցել Երևանի Չարենցի թիվ 103 հասցեում գտնվող, Գայանե Դավթյանին պատկանող բնակարան։ Մ.Փուրբաղերփիչան Գ.Դավթյանին վճարել է բնակարանի օրավարձը, որից հետո Գ.Դավթյանը հեռացել է, ապա, Մ.Փուրբաղերփիչան իր մնացած գումարը դրել է պայուսակի մեջ գտնվող տաբատի գրպանը և մտել սանհանգույց։ Այդ ժամանակ Սյուզաննա Ղարիբյանը իր ներկայությամբ վերցրել է Մ.Փուրբաղերփիչայի գումարը, հաշվել այն և դրել իր գրպանը, պատճառաբանելով, որ այդ տանը գումար պահելն ապահով չէ, այն կգողանան, Մ.Փուրբաղերփիչային խոստանալով հաջորդ օրը վերադարձնել։ Հաջորդ օրը` հունիսի 25-ին Ս.Ղարիբյանն իրեն կարգադրել է պատրաստել մեքենան, հայտնելով, որ իրենք մեկնում են Վրաստան, իսկ երբ նրան հարցրել է, թե երբ է վերադարձնելու Մ.Փուրբաղերփիչայի գումարը, Ս.Ղարիբյանը պատասխանել է, որ դա իրեն չի վերաբերվում։ Նույն օրն ինքը, Սյուզաննա Ղարիբյանը, վերջինիս մայրն ու որդին միասին մեկնել են Վրաստան` հանգստանալու, իսկ մեկ շաբաթ անց ինքը միայնակ Վրաստանից մեկնել է Իրան։ Հետագայում Մ.Փուրբաղերփիչան Հայաստանից զանգահարել է իրեն և հայտնել, որ Սյուզաննա Ղարիբյանը չի վերադարձրել իր գումարը։ /քրեական գործ, էջ 48-51, դատական նիստի արձանագրություն/։
Ամբաստանյալ Ս.Ղարիբյանի հետ վկա Յաղուբ Մորթազապուրի առերես հարցաքննության ժամանակ, վերջինս իր ցուցմունքը պնդել է Ս.Ղարիբյանին առերես /քրեական գործ, էջ 27-29, 48-51, 52, 76-77/։
Ապացույց ճանաչված այլ փաստաթուղթ հանդիսացող Մ.Փուրբաղերփիչայի կողմից «Մելլաթ» փոխանակման կետից 5600 ԱՄՆ դոլար փոխանակելու վճարման անդորրագրով, նրա անվամբ ավտոբուսի տոմսով /քրեական գործ, էջ 14-17/։
Ամբաստանյալ Ս.Ղարիբյանի` 094-32-44-04 և 094-32-06-29, տուժող Մ.Փուրբաղերփիչայի` 098-02-90-48, վկա Յ. Մորթազապուրի` 094-85-08-40 հեռախոսահամարների վերծանումներով/քրեական գործ, էջ 86-87/։ Որտեղից երևում է, որ 2010թ. հունիսի 25-ին նրանք միմյանց հետ հեռախոսակապի մեջ են եղել։

ՀՀ պետական եկամուտների կոմետեի տեղեկանքի համաձայն` Ս.Ղարիբյանը, նրա որդին` Ա.Ղարիբյանը, մայրը` Ս.Դանիելյանը և վկա Յ. Մորթազապուրին են 2010թ. հունիսի 26-ին ժամը 10-ին հատել ՀՀ սահմանը/քրեական գործ, էջ 721/։ Նշվածով հերքվում է Ս.Ղարիբյանի այն պատճառաբանությունը, որ տուժողին հանդիպելու հաջորդ օրը Վրաստան է գնացել Իրանցի զբոսաշրջիկների հետ։
Դատարանը անհիմն է համարում պաշտպանական կողմի պատճառաբանությունները այն մասին, որ տուժող Մ.Փուրբաղերփիչային և վկա Յ. Մորթազապուրին տվել են հակասական, իրարամերժ ցուցմունքներ, որ տուժողը Երևան է եկել ուսանելու նպատակով, վկա Գ. Դավթյանին հայտնել է, որ եկել է Հայաստան` աշխատելու նպատակով, իր հետ վերցրել 5.600 ԱՄՆ դոլար գումար։ Դատարանում հետազոտված ապացույցներով Սյուզաննա Ղարիբյանին մեղսագրված արարքը հաստատվել է, իսկ բերած պատճառաբանությունների մի մասը մեղադրանքի հետ կապ չունեն։ ՀՀ պետական եկամուտների կոմետեի տեղեկանքից երևում է, որ ամբաստանյալ Ս.Ղարիբյանը, նրա մայրը` Ա.Ղարիբյանը, որդին` Ս.Դանիելյանը և վկա` Յ. Մորթազապուրին 2010թ. հունիսի 26-ին ժամը 10-ին հատել են ՀՀ սահմանը, նրանց հետ այլ քաղաքացիներ, այդ թվում պարսիկ զբոսաշրջիկներ Վրաստանի սահմանը չեն հատել։ Ամբաստանյալ Ս.Ղարիբյանը դեպքից անմիջապես հետո գնացել է Վրաստան, հեռացել տուժողից, որպեսզի վերջինս նրան գտնել չկարողանա, իսկ հետագայում էլ իր համար այլուրեքություն ստեղծի` թե իբր տուժողի մատնանշած ժամանակ բացակայել է հանրապետությունից։
Դատարանը, վերլուծելով և գնահատելով քրեական գործի նյութերը, ապացուցված է համարում, որ ամբաստանյալ Սյուզաննա Ղարիբյանը խարդախությամբ 2010թ. հունիսի 24-ին հափշտակել է տուժող Մաջիտ Ռամեզանի Փուրբաղերփիչային պատկանող խոշոր չափի` 2.031.040 ՀՀ դրամին համարժեք 5.500 ԱՄՆ դոլար գումարը։
Ամբաստանյալ Սյուզաննա Ղարիբյանի կատարած արարքը համապատասխանում է ՀՀ քրեական օրենսգրքի 178-րդ հոդվածի 2-րդ մասի 2-րդ կետին։
Դատարանը պատիժ սահմանելիս հաշվի է առնում նրա կատարած հանցանքի` խոշոր չափերով կատարված խարդախության` հանրության համար վտանգավորության աստիճանը և բնույթը ու ամբաստանյալ Ս. Ղարիբյանի անձը բնութագրող տվյալները։
Դատարանը որպես պատասխանատվությունը և պատիժը մեղմացնող և անձը բնութագրող հանգամանքներ դիտում է այն, որ ամբաստանյալ Սյուզաննա Ղարիբյանը կին է, հանցանքը կատարում է առաջին անգամ, խնամքին են գտնվում երեխան և մայրը։
Պատասխանատվությունը և պատիժը ծանրացնող հանգամանքներ չկան։
Կատարած արարքի համար ամբաստանյալ Սյուզաննա Ղարիբյանը ենթակա է պատժի։
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» Հայաստանի Հանրապետության Ազգային ժողովի 2011թ. մայիսի 26-ի որոշման առաջին կետի առաջին ենթակետի համաձայն` պահանջվում է պատժի կրումից ազատել առավելագույնը երեք տարի ժամկետով ազատությունից զրկելու հետ կապված պատիժների դատապարտված անձանց։
Դատարանը գտավ, որ Սյուզաննա Ղարիբյանի նկատմամբ պետք է կիրառել Հայաստանի Հանրապետության Ազգային ժողովի «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 2011թ. մայիսի 26-ի որոշման առաջին կետի առաջին ենթակետը և ազատել պատժից։
Սյուզաննա Արամի Ղարիբյանի նկատմամբ ընտրված խափանման միջոցը` ստորագրություն չհեռանալու մասին պետք է` վերացնել։
Դատարանը քննարկելով քաղաքացիական հայցի հարցը գտավ, որ քաղաքացիական հայցը պետք է բավարարել մասնակի` Ս. Ղարիբյանից հօգուտ տուժող Մաջիտ Փուրբաղերփիչայի պետք է բռնագանձվի 5500 ԱՄՆ դոլարին համարժեք ՀՀ դրամ` նկատի ունենալով, որ Ս. Ղարիբյանին մեղադրանք է առաջադրվել վերոհիշյալ գումարի հափշտակություն կատարելու համար։ Իսկ քաղաքացիական հայցի մնացած մասը պետք է թողնել առանց քննության` նկատի ունենալով, որ այն կարող է լուծվել քաղաքացիական դատավարության կարգով։
Ղեկավարվելով Հայաստանի Հանրապետության քրեական դատավարության օրենսգրքի 357-360-րդ, 364-365-րդ, 369-372-րդ հոդվածներով՝ դատարանը`
Վ Ճ Ռ Ե Ց
Ամբաստանյալ Սյուզաննա Արամի Ղարիբյանին մեղավոր ճանաչել Հայաստանի Հանրապետության քրեական օրենսգրքի 178-րդ հոդվածի 2-րդ մասի 2-րդ կետով և դատապարտել` ազատազրկման` երկու տարի ժամկետով։
Կիրառել Հայաստանի Հանրապետության Ազգային ժողովի «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» 2011թ. մայիսի 26-ի որոշման առաջին կետի առաջին ենթակետը և Սյուզաննա Արամի Ղարիբյանին ազատել պատժից։
Սյուզաննա Արամի Ղարիբյանի նկատմամբ ընտրված խափանման միջոցը` ստորագրություն չհեռանալու մասին` վերացնել։
Քաղաքացիական հայցը բավարարել մասնակի` Սյուզաննա Արամի Ղարիբյանից հօգուտ տուժող Մաջիտ Փուրբաղերփիչայի բռնագանձել 5500/հինգ հազար հինգ հարյուր/ ԱՄՆ դոլարին համարժեք ՀՀ դրամ։ Քաղաքացիական հայցի մնացած մասը թողնել առանց քննության։
Դատավճիռը հրապարակման օրվանից մեկամսյա ժամկետում կարող է բողոքարկվել Հայաստանի Հանրապետության վերաքննիչ քրեական դատարան։

ԴԱՏԱՎՈՐ՝ Գ. Ավետիսյան