Գործ թիվ ԵԿԴ 0314/01


ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

ՆԱԽԱԳԱՀՈՂ ԴԱՏԱՎՈՐ՝ Գ. Ավետիսյան
ՔԱՐՏՈՒՂԱՐՈՒԹՅԱՄԲ՝ Հ.Հովհաննիսյանի

ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ՝ Ս. Մկրտչյանի
ՊԱՇՏՊԱՆՆԵՐ՝ Ա. Հոբոսյանի
ՏՈՒԺՈՂԻ ՆԵՐԿԱՅԱՑՈՒՑԻՉ` Ա. Քերոբյանի
ՏՈՒԺՈՂ` Ա. Աֆրիկյանի

2011թ. ապրիլի 4-ին, դռնբաց դատական նիստում, դատարանում, քննեց քրեական գործն ըստ մեղադրանքի Գագիկ Մկրտչի Մանգասարյանի ` ծնված 1991թ. դեկտեմբերի
24-ին, Երևանում, ՀՀ քաղաքացի, ազգությամբ` հայ, միջնակարգ կրթությամբ, ամուրի, խնամքին` ոչ ոք, նախկինում չդատված, ֆիզիկապես վատառողջ, հաշվառված և բնակվել է Երևան, Տիգրան Մեծի նրբանցք 15-րդ շենք 6-րդ բնակարանում, կալանքի տակ է 2010թ. հունիսի 3-ից, մեղադրվում է Հայաստանի Հանրապետության քրեական օրենսգրքի 175-րդ հոդվածի 2-րդ մասի 1-ին, 4-րդ և 5-րդ կետերով։ Առաջադրված մեղադրանքում Գագիկ Մկրտչի Մանգասարյանն իրեն մեղավոր ճանաչեց մասնակի։

Թիվ 12100610 քրեական գործը Հայաստանի Հանրապետության քրեական օրենսգրքի 175-րդ հոդվածի 2-րդ մասի 1-ին, 3-րդ և 4-րդ մասի հատկանիշներով հարուցվել է 2010թ. հունվարի 11-ին ՀՀ Ոստիկանության քննչական գլխավոր վարչության Էրեբունու քննչական բաժնի կողմից։
2010 մարտի 31-ին որոշում է կայացվել թիվ 12100610 քրեական գործից մասն անջատելու մասին, որին շնորհվել է թիվ 12114310 համարը։
Թիվ 12137909 քրեական գործը Հայաստանի Հանրապետության քրեական օրենսգրքի 175-րդ հոդվածի 2-րդ մասի 1-ին, 3-րդ և 4-րդ մասի հատկանիշներով հարուցվել է 2009թ. դեկտեմբերի 11-ին ՀՀ Ոստիկանության քննչական գլխավոր վարչության Էրեբունու քննչական բաժնի կողմից։
2010թ. հունիսի 3-ին որոշում է կայացվել թիվ 12137909 քրեական գործը թիվ 12114310 քրեական գործին միացնելու մասին և նախաքննությունը շարունակվել է թիվ 12114310 քրեական գործի վարույթում։
Թիվ 12146209 քրեական գործը Հայաստանի Հանրապետության քրեական օրենսգրքի 175-րդ հոդվածի 2-րդ մասի 3-րդ և 4-րդ կետերով հարուցվել է 2009թ. դեկտեմբերի 31-ին ՀՀ Ոստիկանության Էրեբունու քննչական բաժնի կողմից, որի վարույթը 2010թ. մարտի 28-ի որոշմամբ կասեցվել է որպես մեղադրյալ ներգրավման ենթակա անձի պարզված չլինելու հիմքով։
2010թ. ապրիլի 28-ի որոշմամբ թիվ 12146209 քրեական գործի կասեցված վարույթը վերսկսվել է։
2010թ մայիսի 12-ի որոշմամբ թիվ 12146209 քրեական գործը միացվել է թիվ 12114310 քրեական գործի հետ մեկ վարույթում։
2010թ մայիսի 27-ի որոշմամբ թիվ 12114310 քրեական գործի վարույթը կասեցվել է։
2010թ. հունիսի 3-ի որոշմամբ թիվ 12114310 քրեական գործի վարույթը վերսկսվել է։
2010թ. հունիսի 3-ի որոշմամբ թիվ 12137909 քրեական գործը միացվել է թիվ 12114310 քրեական գործին։
Խաչատուր Հովհաննեսի Քիշմիրյանի վերաբերյալ` Հայաստանի Հանրապետության քրեական օրենսգրքի 175-րդ հոդվածի 2-րդ մասի 1-ին և 4-րդ կետերով և Վահագն Հովհաննեսի Քիշմիրյանի վերաբերյալ` Հայաստանի Հանրապետության քրեական օրենսգրքի 175-րդ հոդվածի 2-րդ մասի 1-ին և 4-րդ կետերով` թիվ ԵԿԴ 0090/01 քրեական գործով Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից 2010թ. հուլիսի 17-ին կայացվել է մեղադրական դատավճիռ։
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գ.Ավետիսյանի 2010թ. նոյեմբերի 24-ի որոշմամբ Գագիկ Մանգասարյանի վերաբերյալ ՀՀ քրեական օրենսգրքի 175-րդ հոդվածի 2-րդ մասի 1-ին, 4-րդ և 5-րդ կետերով թիվ ԵԿԴ 0314/01 /12114310/ քրեական գործը ընդունվել է վարույթ, 2010թ. դեկտեմբերի 2-ի որոշմամբ` նշանակվել դատաքննության։
Դատաքննությամբ և գործի տվյալներով դատարանը ապացուցված համարեց հետևյալը.
Ամբաստանյալ Գագիկ Մանգասարյանը 2009թ. դեկտեմբերի 31-ին ժամը 04։20-ի սահմաններում քննությամբ չպարզված անձի հետ հանցավոր համաձայնությամբ տուժողի առողջության համար վտանգավոր բռնություն գործադրելու միջոցով ավազակային հարձակում կատարելու նպատակով բաց դռնից մտել է Երևանի Մ.Խորենացի փողոցի թիվ 165/2 հասցեում գտնվող «Ապրինադա» ՍՊ ընկերությանը պատկանող «5x5» բենզալցակայանի տաղավար, իսկ քննությամբ չպարզված անձը սպասել է բենզալցակայանի մոտակայքում գտնվող կամրջի մոտ։ Նշված տաղավարում ամբաստանյալ Գ.Մանգասարյանը որպես զենք օգտագործվող առարկան` դանակը, պահել է լցակայանի լիցքավորող Կարեն Մկրտչյանի ուղղությամբ, տվել` կյանքի և առողջության համար վտանգավոր բռնություն գործադրելու սպառնալիքներ և պահանջել լցակայանում եղած ամբողջ գումարը։ Սպառնալիքների ներքո Կ.Մկրտչյանը մետաղյա պահարանից հանել և ամբաստանյալ Գ.Մանգասարյանին է տվել զգալի չափի` 420.000 ՀՀ դրամ գումար, ով վերցնելով գումարը` դիմել է փախուստի։
Բացի այդ սույն գործով դատապարտյալ Վահագն Քիշմիրյանի առաջարկությամբ ամբաստանյալ Գ.Մանգասարյանը հանցավոր համաձայնության է եկել նաև նրա եղբոր, սույն գործով դատապատյալ Խաչատուր Քիշմիրյանի հետ ավազակային հրաձակմամբ տուժող Աշոտ Աֆրիկյանին պատկանող, Երևանի Մ.Խորենացի փողոցի թիվ 47 հասցեում գտնվող պարենային ապրանքների խանութի գույքը տուժողի առողջության համար վտանգավոր բռնություն գործադրելու միջոցով հափշտակելու շուրջ։
Այդ նպատակով 2010թ. հունվարի 10-ին ներկայումս դատապարտյալներ Վահագն և Խաչատուր Քիշմիրյան եղբայրները և ամբաստանյալ Գ.Մանգասարյանը հանդիպել են Մ.Խորենացի փողոցի թիվ 47 հասցեի մոտ։ Նրանք գլխարկներով և շարֆերով քողարկել են դեմքերը, զինվել դանակներով և նույն գիշերը` 2010թ. հունվարի 11-ին ժամը 01։00-ի սահմաններում, բաց դռնից մտել են Ա.Աֆրիկյանին պատկանող խանութ։ Գ.Մանգասարյանը և Խ.Քիշմիրյանը որպես զենք օգտագործվող առարկա` դանակներով, կյանքի և առողջության համար վտանգավոր բռնություն գործադրելու սպառնալիքներ են տվել տուժող Ա.Աֆրիկյանին` պահանջելով հանգիստ մնալ և չշարժվել։ Այդ ժամանակ տուժող Ա.Աֆրիկյանի կինը` տուժող Թ.Փափազյանը խանութի ցուցափեղկի ետևից նկատել է նրանց և օգնություն կանչել։ Վ.Քիշմիրյանը, Թ.Փափազյանին, դանակի սպառնալիքով նստեցրել է մուտքի դռան առջև դրված աթոռին և պահանջել հանգիստ մնալ։ Իսկ Խ.Քիշմիրյանը դանակով հարվածել է Ա.Աֆրիկյանի ձեռքին, տարել խանութում գտնվող սառնարանի մոտ, Գ.Մանգասարյանի հետ միասին ծնկի են իջեցրել և կպչուն ժապավենով փակել բերանը, կապել ձեռքերը։ Ավազակային հարձակման ժամանակ տուժող Ա.Աֆրիկյանին պատճառվել է առողջության կարճատև քայքայումով թեթև մարմնական վնասվածք։ Որից հետո խանութի վաճառասեղանի տակ դրված արկղից վերցրել են զգալի չափի` 300.000 ՀՀ դրամ գումարը և դիմել փախուստի։
Գագիկ Մկրտչի Մանգասարյանին մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 1-ին, 4-րդ և 5-րդ կետերով։
Առաջադրված մեղադրանքում Գագիկ Մանգասարյանն իրեն մեղավոր ճանաչեց մասնակի և հայտնեց, որ 2010թ. հունվարի 10-ին Քիշմիրյան եղբայրների հետ պայմանավորվել են ավազակություն կատարել նրանց թաղամասի խանութներից մեկից։ Ժամը 23։00-ի սահմաններում հանդիպել է Վահագն և Խաչատուր Քիշմիրյան եղբայրներին, գլխարկներով և շարֆերով քողարկել են իրենց դեմքերը, մեկական դանակներ վերցնելով` մտել են խանութ։ Խանութում Խ.Քիշմիրյանը իր մոտ եղած դանակը Ա.Աֆրիկյանի ուղղելով՝ պահանջել է լռել։ Վ.Քիշմիրյանը Թ. Փափազյանին բերել է դռան մոտ, նստեցրել աթոռին։ Ա.Աֆրիկյանը փորձել է վերցնել դանակը։ Ինքը ձեռքը մեկնելով, վերջինիս կողմը վնասվել է մատը։ Խ.Քիշմիրյանը ցուցափեղկի տակից վերցրել է գումարը, դրել գրպանը և իր հետ վերցրած պարկի մեջ լցրել խանութում եղած ծխախոտները։ Խ.Քիշմիրյանը դանակով հարվածել է Ա.Աֆրիկյանի ձեռքին։ Անմիջապես դուրս են եկել խանութից և փախել Սարի-Թաղի ուղղությամբ։
Գագիկ Մանգասարյանը նաև հայտնեց, որ քննության սկզբում` ձերբակալելու ժամանակ իր նկատմամբ դրսևորած ֆիզիկական և հոգեբանական ճնշման ազդեցության ներքո ընդունել է դեղատան և բենզալցակայանի վերաբերյալ ավազակային հարձակումներ կատարելու դրվագները, Նախաքննության ժամանակ դեղատան դրվագով իրեն առաջադրված մեղադրանքը հանվել է։ Իր նախաքննական ցուցմունքներում դեպքի մասին նշված մանրամասնությունները կողքից հուշելով է գրել։ Անձամբ քննիչը իր նկատմամբ բռնություն չի գործադրել։ Քանի որ գտնվել է ոստիկանություն բաժանմունքում, վախեցել է, որ իր նկատմամբ կրկին բռնություն կգործադրեն, այդ պատճառով քննիչին չի ասել, որ իր նկատմամբ բռնություն է գործադրվել և տվել է խոստովանական ցուցմունքներ։ «Ապրինադա» ՍՊ ընկերությանը պատկանող «5x5» բենզալցակայանից ինքը հափշտակություն չի կատարել /դատական նիստի արձանագրություն/
Ամբաստանյալ Գագիկ Մկրտչի Մանգասարյանի պատճառաբանություններն անհիմն են, դրանք հերքվում են, իսկ նրան մեղսագրված հանցագործությունը, բացի նրա մասնակի խոստովանական ցուցմունքներից հիմնավորվում, իսկ բերված պատճառաբանությունները հերքվում են գործով ձեռք բերված հետևյալ ապացուցներով։
Հենց ամբաստանյալ Գ.Մանգասարյանի նախաքննության ժամանակ իր ձեռքով գրված բացատրությամբ և 03.06.2010թ. ցուցմունքով, որտեղ առաջադրված մեղադրանքում իրեն մեղավոր է ճանաչել և հայտնել նաև, որ 2009թ. դեկտեմբերի 30-ի երեկոյան իր ընկերներ Վահագն և Խաչատուր Քիշմիրյանների հետ, համաձայնության են եկել ավազակային հարձակում կատարելու Սարի-Թաղի կամրջի մոտ գտնվող «5x5» բենզալցակայանի վրա։ Ապա գլխարկով ու շարֆով քողարկելով դեմքը։ Ժամը 02։00-03։00-ն ընկած ժամանակահատվածում իր մոտ եղած ծալովի դանակը բացելով` մտել է բենզալցակայանի պահակասենյակ, այնտեղ գտնվող երկու տղամարդկանցից պահանջել է իրենց մոտ եղած գումարը։ Նրանցից երիտասարդը պահարանից գումար է հանել և տվել իրեն, որը լցրել է սեղանի վրայից վերցրած տոպրակի մեջ։ Իսկ եղբայրներից մեկը կանգնել է բենզալցակայանի պահակասենյակից մոտ 20մ հեռավորության վրա, մյուսը` բենալցակայանի դիմաց` հակառակ մայթին։ Գումարը վերցնելուց հետո դուրս է եկել ու Քիշմիրյան եղբայրների հետ փախել Սարի-Թաղի ուղղությամբ։ Հափշտակված գումարը կիսել են։ /քրեական գործ հատոր 2 էջ 5-7, 14-17, դատական նիստի արձանագրություն/։
Վերոհիշյալ երկու փաստաթղթերում ամբաստանյալ Գ.Մանգասարյանը իր ձեռքով գրել, ընդունել ու մանրամասն նկարագրել է իր գործողությունները` բենզալցակայանի վրա կատարած ավազակային հարձակման ընթացքում։
Դատարանը արժանահավատ է համարում ամբաստանյալ Գ.Մանգասարյանի վերոհիշյալ` նախաքննության ժամանակ տված ցուցմունքները, նկատի ունենալով, որ դրանք համապատասխանում են գործի քննությամբ ձեռք բերված փաստական հանգամանքներին։ Ամբաստանյալ Գ.Մանգասարյանի պատճառաբանությունները, որ այդ ցուցմունքը, բացատրությունը տվել է բռնության, քննությանը խորթ մեթոդների ազդեցության տակ, դատարանը հիմնավոր չի համարում։ Նրա այդ պատճառաբանությունները գործի նյութերով չեն հիմնավորվել։ Նախաքննության և դատաքննության ընթացքում նրա փաստարկը չի հաստատվել։ Իսկ խոստովանական ցուցմունքը Գ.Մանգասարյանը տվել է դեպքից տևական ժամանակ անց, նորմալ պայմաններում։ Բացի այդ դատարանում էլ ընդունեց, որ ցուցմունքը քննիչին տվել է կամովին։ Իսկ Նուբարաշենի հոգեբուժարանում գտնվելու ժամանակ իրեն վնասելու մասին հայտնել է, որ նման արարք է կատարել հուզված և անգիտակից վիճակում։ Իրեն ոչ ոք չի վնասել, չի ստիպել վնասել իրեն /քրեական գործ, հատոր 2, էջ 93/։ Հատկանշական է, որ ամբաստանյալ Գ.Մանգասարյանը իր հետագա նախաքննական ցուցմունքներում չի ընդունել նաև Ա.Աֆրիկյանի խանութի վրա ավազակային հարձակում կատարելու փաստը։ Որը դատարանին համոզման է բերում, որ Գ.Մանգասարյանը հակասական ցուցմունքներ տալով ցանկացել է խուսափել քրեական պատասխանատվությունից։
Ամբաստանյալ Գ.Մանգասարյանի դատարանում տված ցուցմունքը «Ապրինադա» ՍՊ ընկերությանը պատկանող «5x5» բենզալցակայանի ավազակային հարձակման դրվագի մասով, դատարանը համարում է անարժանահավատ, որովհետև այն չի համապատասխանում գործի փաստական մյուս հանգամանքներին։
Սույն գործով դատապարտյալներ Վահագն և Խաչատուր Քիշմիրյանները ցուցմունքներ տվեցին, որ ավազակային հարձակումը կատարել են իրենք եղբայրներով և ոմն Արթուրի հետ միասին, Գ.Մանգասարյանին չեն ճանաչում /դատական նիստի արձանագրություն/։
Դատապարտյալներ Վահագն և Խաչատուր Քիշմիրյանները նախաքննության ժամանակ ցուցմունքներ են տվել, որ 2010թ. հունվարի 10-ին գումար ձեռք բերելու համար նպատակադրվել են ավազակությամբ հափշտակել Աշոտ Աֆրիկյանին պատկանող խանութի գույքը և հանցանքը համատեղ կատարելու շուրջ նախնական համաձայնության են եկել միմյանց և Գագիկ Մանգասարյանի հետ։ 2010թ. հունվարի 11-ին ժամը 01։00-ի սահմաններում իրենք Գ.Մանգասարյանի հետ միասին, պայմանավորվածության համաձայն հանդիպել են Երևան քաղաքի Մ.Խորենացի փողոցի թիվ 47 հասցեի մոտ, ստուգել և համոզվել են, որ խանութում և շրջակայքում այլ անձինք չկան, իրենց մոտ եղած շարֆերով և գլխարկներով քողարկել են դեմքերը, ապա` դռնից մուտք գործել Ա.Աֆրիկյանին պատկանող խանութ, որտեղ Գ.Մանգասարյանը և Խ.Քիշմիրյանը իրենց հետ նախապես վերցրած դանակներով սպառնալիքներ են տվել Ա.Աֆրիկյանին` պահանջելով հանգիստ մնալ և չշարժվել։ Այդ պահին Ա.Աֆրիկյանի կինը` Թ.Փափազյանը խանութի ցուցափեղկի ետևից, նկատել է իրենց և սկսել օգնություն կանչել։ Թ.Փափազյանին դանակի սպառնալիքով նստեցրել է մուտքի դռան առջև դրված աթոռին և պահանջել հանգիստ մնալ։ Խ.Քիշմիրյանը դանակով հարվածել է Ա.Աֆրիկյանի ձեռքին, նրան տարել խանութում գտնվող սառնարանի մոտ, Գ.Մանգասարյանի հետ միասին ծնկի են իջեցրել և կպչուն ժապավենով փակել բերանը, կապել ձեռքերը։ Դրանից հետո խանութի վաճառասեղանի տակ դրված արկղից վերցրել են գումարը և նկատելով խանութ մտնող հաճախորդի` փախել են Սարի Թաղի ուղղությամբ /քրեական գործ հատոր 1 էջ 47-50, 53-55, 78, դատական նիստի արձանագրություն/։
Իրենց վերաբերյալ քրեական գործի դատաքննության ժամանակ դատարանում` Խաչատուր և Վահագն Քիշմիրյանները առաջադրված մեղադրանքում, այդ թվում նաև Գ.Մանգասարյանի հետ հանցավոր համաձայնությամբ ավազակային հարձակում կատարելու համար` լիովին մեղավոր են ճանաչել, համաձայնվել են առաջադրված մեղադրանքի հետ և միջնորդել են կիրառել արագացված դատական քննության կարգ։
Դատական քննության արագացված կարգի կիրառմամբ նրանց նկատմամբ կայացվել է մեղադրական դատավճիռ։ Ամբաստանյալ Գ.Մանգասարյանը դատարանում ցուցմունք տվեց և ընդունեց, որ տուժող Ա.Աֆրիկյանի խանութի վրա ավազակային հարձակումը կատարել է Խաչատուր և Վահագն Քիշմիրյան եղբայրների հետ հանցավոր համաձայնությամբ։
Նման պայմաններում դատարանը դատապարտյալներ Խաչատուր և Վահագն Քիշմիրյանների սույն քրեական գործով դատարանում տված ցուցմունքները համարում է անարժանահավատ, նկատի ունենալով, որ դատապարտվելուց հետո, ճիշտ ցուցմունքներ տալու պարտականություն և կաշկանդվածություն չունենալով, նրանք իրականությունը չեն ներկայացնում` դրանով ցանկանալով հովանավորության տակ վերցնել իրենց հանցակից` մտերիմ ընկերոջը։ Դատարանը արժանահավատ է համարում Խաչատուր և Վահագն Քիշմիրյանների նախաքննական խոստովանական և հանցագործության կատարման մեջ Գ.Մանգասարյանին մերկացնող ցուցմունքները, որոնք համապատասխանում են գործի քննությամբ հաստատված փաստական հանգամանքներին։
Տուժողի ներկայացուցիչ, «Ապրինադա» ՍՊ ընկերության փոխտնօրեն Արթուր Ժորայի Քերոբյանի ցուցմունքներով, այն մասին, որ 2009թ. դեկտեմբերի 31-ին առավոտյան ժամը 05։00-ի սահմաններում իրեն է զանգահարել ընկերության փոխտնօրեն Պետրոս Ուլիկյանը և հայտնել, որ իրենց ընկերությանը պատկանող` Մ.Խորենացի թիվ 165/2 հասցեում գտնվող բենզալցակայանի վրա ավազակային հարձակում է կատարվել։ Անմիջապես գնացել է բենզալցակայան, որտեղ պարզվել է, որ լիցքավորման քարտ գնելու պատրվակով ժամը 04։20-ի սահմաններում բենզալցակայանի տաղավար է մտել մի անծանոթ երիտասարդ, ով դանակի սպառնալիքով պահանջել է դրամարկղի գումարը։ Կարեն Մկրտչյանը տվել է ամբողջ գումարը, որից հետո այդ երիտասարդը դիմել է փախուստի։ Կատարված վերահաշվարկով պարզվել է, որ այդ երիտասարդը հափշտակել է 420.000 ՀՀ դրամ գումար, հետագայում իմացել է, որ հափշտակությունը կատարել է ամբաստանյալ Գ.Մանգասարյանը իր հանցակից ընկերների հետ/քրեական գործ հատոր 1 էջ 229-230, դատական նիստի արձանագրություն/
Տուժող Աշոտ Աֆրիկյանի ցուցմունքներով, այն մասին, որ 2010թ. հունվարի 11-ին ժամը 01։00-ի սահմաններում, Երևանի Մ.Խորենացի փողոցի թիվ 47 շենքի բակում գտնվող իրենց մթերային խանութ են մտել դիմակավորված երկու միջահասակ և մեկ բարձրահասակ անձինք` հետագայում իմացել է, որ ամբաստանյալ Գ.Մարգարյանն ու դատապարտյալներ Խաչատուր և Վահագն Քիշմիրյաններն են։ Երեքի ձեռքին էլ եղել են գաղտնի փականով դանակներ` բաց վիճակում։ Դիմակավորված անձանցից բարձրահասակը կանգնել է մուտքի դռան մոտ, միջահասակներից մեկը` վաճառասեղանի հակառակ կողմում, իսկ մյուս միջահասակը մոտեցել է իրեն և դանակը պահելով իր ուղղությամբ պահանջել է նստել և ձայն չհանել։ Այդ պահին ինքը վերցրել է վաճառասեղանի ապակու տակ դրված խոհանոցային դանակը։ Դա նկատելով դիմակավորված անձանցից մեկը բռնել է դանակի շեղբից և իր մոտ եղած դանակով մի քանի անգամ հարվածել աջ ձեռքի դաստակին, որի պատճառով ինքը բաց է թողել դանակը։ Այդ ժամանակ կնոջը բարձրաձայն ասել է, որ հարևանների պատը ծեծի։ Միջահասակներից մեկը Թ.Փափազյանին քաշ տալով բերել է և նստեցրել դռան առջևի աթոռին։ Դրանից հետո իր մոտ կանգնած միջահասակը դանակի գործադրմամբ ստիպել է, որ ինքը դուրս գա նստած տեղից և իրեն տանելով սառնարանի մոտ ստիպել է կքանստել, որից հետո սառնարանի վրա դրված վաճառքի համար նախատեսված կպչուն ժապավենով կապել է իր բերանը, իսկ բարձրահասակը` Գ.Մանգասարյանը վերցրել է 300.000 ՀՀ դրամը և իր մոտ եղած պարկի մեջ լցրել ծխախոտները։ Այդ ժամանակ հաճախորդներից մեկը ցանկացել է մտնել խանութ, Թ.Փափազյանը նրան նկատելով բղավել է, որ շուտ զանգահարի 1-02։ Հաճախորդը՝ հեռացել է։ Դրանից հետո դիմակավորված անձինք դուրս են եկել խանութից և փախել՝ խանութում թողնելով ծխախոտով լցված պարկը /քրեական գործ հատոր 1 էջ 11, 21-23, 152, 176-179, 183-184, դատական նիստի արձանագրություն/
Վկա, «Ապրինադա» ՍՊ ընկերության օպերատոր Պետրոս Էդուարդի Ուլիկյանի ցուցմունքներով, այն մասին, որ 2009թ. դեկտեմբերի 31-ին ժամը 05։00-ի սահմաններում իրեն է զանգահարել վկա Կարեն Մկրտչյանը և հայտնել, որ մի անծանոթ երիտասարդ դանակի սպառնալիքով հափշտակել է բենզալցակայանում եղած գումարը և դիմել փախուստի։ Զանգահարել է Արթուր Քերոբյանին։ Նրա հետ միասին գնացել են բենզալցակայան։ Կատարված հաշվարկներով պարզվել է, որ հափշտակվել է 420.000 ՀՀ դրամ գումար։ հետագայում իմացել է, որ հափշտակությունը կատարել է ամբաստանյալ Գ.Մանգասարյանը իր հանցակից ընկերների հետ/քրեական գործ հատոր 1 էջ 251-252, դատական նիստի արձանագրություն/
Տուժող Թագուհի Փափազյանի դատարանում հետազոտված նախաքննական ցուցմունքներով, այն մասին, որ 2010թ. հունվարի 11–ին ժամը 01։00-ի սահմաններում Երևանի Մ.Խորենացի փողոցի թիվ 47 շենքի բակում գտնվող իրենց մթերային խանութում լսելով ամուսնու ձայնը, վեր է կացել և ցուցապահարանի հետևից նկատել դիմակավորված երեք անձանց, որոնցից մեկը վաճառասեղանի տակ գտնվող արկղից գումարները վերցնելով, սկսել է ծխախոտները լցնել պարկի մեջ։ Մեկը մոտեցել, իրենից պահանջել է չաղմկել։ Անցնելով ցուցապահարանի մոտ ինքը սկսել է ծեծել պատը։ Սակայն նրանցից մեկը իրեն քաշելով բերել է վաճառասրահ և նստեցրել աթոռին։ Նկատել է, որ ամուսնու ձեռքը արյունոտ է, հետագայում իմացել է, որ այդ անձանցից մեկը դանակով հարվածել է ամուսնու ձեռքին և վնասել։ Դիմակավորված անձինք ամուսնուն նստեցրել են գետնին և պահանջել, որ չաղմկի։ Այդ ժամանակ հաճախորդ է մտել խանութ։ Ինքը նրան խնդրել է զանգահարել ոստիկանություն։ Դրանից հետո այդ անձինք անմիջապես դիմել են փախուստի` խանութում թողնելով ծխախոտով լցված պարկը։ Այդ անձինք հափշտակել են իրենց 300.000 ՀՀ դրամ գումարը /քեական գործ հատոր 1 էջ 159-160, 186, դատական նիստի արձանագրություն/
Տուժող, «Ապրինադա» ՍՊ ընկերությանը պատկանող «5x5» բենզալցակայանի լիցքավորող Կարեն Ավետիքի Մկրտչյանի դատարանում հետազոտված նախաքննական ցուցմունքներով, այն մասին, որ 2009թ. դեկտեմբերի 31-ին բենզալցակայանի լիցքավորող Լյովա Սահակյանի և Արտյոմ Խաչատրյանի հետ գտնվել է բենզալցակայանում։ Ժամը 04։20-ի սահմաններում, վճարումների սենյակ է մտել մի անծանոթ երիտասարդ և խնդրել` լիցքավորման քարտ։ Երկաթյա պահարանից վերցրել է լիցքավորման քարտ և նկատել, որ անծանոթը իր մոտ եղած մոտ 40սմ երկարությամբ դանակը պահել է Ա.Խաչատրյանի ուղղությամբ և գումար է պահանջում։ Ա.Խաչատրյանը հայտնել է, որ գումար չունի։ Անծանոթը շրջվել է իր ուղղությամբ և պահանջել երկաթյա պահարանում եղած գումարը, ինքը հրաժարվել է։ Վերջինս մոտենալով, դանակը պահել է իր վրա և սպառնացել, որ կհարվածի։ Վախենալով, որ կարող է իրեն վնասել, նրան է տվել երկաթյա պահարանում եղած ամբողջ 420.000 ՀՀ դրամ գումարը։ Վերցնելով գումարը անծանոթը դուրս է եկել սենյակից և դիմել փախուստի։ Արթնացնելով Լ.Սահակյանին, նրա և Ա.Խաչատրյանի հետ հետապնդել են անծանոթին, ով հատելով ճանապապարհը անցել է փողոցի մյուս մայթ։ Նկատել են մյուս մայթում կանգնած մի քաղաքացու, ով անծանոթի հետ միասին փախել է կամուրջի ուղղությամբ։ Հայտնել է նաև, որ ավազակային հարձակում կատարած անձի դիմագծերը տեսել է, նրան ճանաչել է լուսանկարով ճանաչման ներկայացնելու ժամանակ, նկարագրել է նրա արտաքին տվյալները և նշել, որ կճանաչի նաև անձնապես։
Հարկ է նշել նաև, որ անձին ճանաչման ներկայացնելու ժամանակ իրեն ներկայացրած անձանց մեջ` հանձինս ձախից աջ երրորդը կանգնած անձի ճանաչել է իրենից հափշտակություն կատարած անձին, սակայն առաջին անգամ լինելով քրեակատարողական հիմնարկում` շփոթմունքի, չկենտրոնանալու, կաշկանդվածության, անորոշության պատճառով, չնայած դեմքը ծանոթ է եղել, նշել է, որ ոչ մեկին չի ճանաչում։ Քրեակատարողական հիմնարկից դուրս գալուց հետո համոզվել է, որ դանակի սպառնալիքով իրենից գումար հափշտակողը հենց այդ անձնավորությունն է` Գ.Մանգասարյանը։ /քրեական գործ հատոր 1 էջ 221-222, 224-225, 242-243, 266, հատոր 2 էջ 109, 114, դատական նիստի արձանագրություն/։
Վկա Արտյոմ Գուրգենի Խաչատրյանի դատարանում հետազոտված նախաքննական ցուցմունքներով, այն մասին, որ աշխատում է Մ.Խորենացի փողոցում գտնվող «5x5» բենզալցակայանին կից ավտովերանորոգման կետում։ 2009թ. դեկտեմբերի 31-ին ժամը 04։20-ի սահմաններում, տաղավար է մտել մի երիտասարդ, ով Կ.Մկրտչյանից խնդրել է լիցքավորման քարտ։ Կ. Մկրտչյանը բացել է երկաթյա պահարանի դուռը։ Այդ ժամանակ երիտասարդը իր հագին եղած բաճկոնի թևքի միջից հանել է մոտ 40սմ երկարությամբ դանակը և այն ուղղելով իրեն` գումար է պահանջել։ Նրան պատասխանել է, որ գումար չունի։ Վերջինս շրջվելով Կ.Մկրտչյանի կողմը, դանակով հարվածելու սպառնալիքով պահանջել է երկաթյա պահարանից հանել գումարը։ Կ. Մկրտչյանը երկաթյա պահարանից հանել է գումարը և տվել երիտասարդին, ով վերցնելով այն` կրկին գումար է պահանջել և համոզվելով, որ այլ գումար չկա, դիմել է փախուստի։ Կ. Մկրտչյանը արթնացրել է մյուս աշխատակցին և միասին հետապնդել են երիտասարդին, ով վազելով անցել է մյուս մայթ և բենզալցակայանից մոտ 100մ հեռավորությամբ գտնվող կամրջի մոտից թեքվելով կորել իրենց տեսադաշտից։ Այդ ընթացքում լսվել է նաև մի տղամարդու ձայն, ով կանչել է այդ երիտասարդին։ Հետագայում անձին ճանաչման ներկայացնելու ժամանակ` հանձինս ամբաստանյալ Գ.Մանգասարյանի ճանաչել է իրենց վրա 2009թ. դեկտեմբերի 31-ին ավազակային հարձակում կատարած անձնավորությանը։ /քրեական գործ հատոր 1 էջ 219-220, հատոր 2 էջ 41 դատական նիստի արձանագրություն/
Վկա Դավիթ Մկրտչյանի դատարանում հետազոտված նախաքննական ցուցմունքներով, այն մասին, որ 2010թ. հունվարի 11–ին ժամը 01։00-ի սահմաններում Ա.Աֆրիկյանի խանութի մոտակայքում տեսել է վերջինիս և նրա դիմացից վազող երեք տղաների։ Մոտեցել է Ա.Աֆրիկյանին` տեսել, որ նրա ձեռքերից մեկն արյունոտ է։ Ա.Աֆրիկյանը խնդրել է հետապնդել հեռացող տղաներին և բռնել նրանց։ Մինչև Ծխախոտագործների փողոցի վերջնամաս հետապնդել է նրանց, սակայն չի կարողացել բռնել և վերադարձել է։ Ա.Աֆրիկյանը իրեն պատմել է, որ այդ տղաները մտել են խանութ և փող հափշտակել։ 2010թ. հունվարի 14-ին իրենց բակում հանդիպել է Վահագ և Խաչիկ Քիշմիրյաններին, խոսակցության ժամանակ իմացել է, որ նրանք են եղել Ա.Աֆրիկյանի խանութից փախչողները /քրեական գործ հատոր 1 էջ 79-81, 151 դատական նիստի արձանագրություն/։
Վկա Լյովա Հմայակի Սահակյանի դատարանում հետազոտված նախաքննական ցուցմունքներով, այն մասին, որ 2009թ. դեկտեմբերի 31-ին ժամը 04։30-ի սահմաններում Կ.Մկրտչյանը արթնացրել է իրեն և հայտնել, որ բենզալցակայանի գումարը հափշտակել են։ Կ.Մկրտչյանի և Ա. Խաչատրյանի հետ դուրս են վազել, սակայն փողոցում ոչ-ոք չի եղել։ Կ.Մկրտչյանը իրեն պատմել է, որ մի անծանոթ տղա լիցքավորման քարտ է ուզել։ Երբ Կ.Մկրտչյանը քարտը հանել է, այդ երիտասարդը գումար է պահանջել և իր ձեռքին եղած մոտ 40սմ երկարությամբ դանակով սպառնացել է հարվածել։ Կ.Մկրտչյանը վախեցել և երկաթյա պահարանի մեջ եղած ամբողջ գումարը տվել է նրան, ով վերցնելով այն դիմել է փախուստի։ /քրեական գործ հատոր 1 էջ 236-237 դատական նիստի արձանագրություն/։
Ամբաստանյալ Գ.Մանգասարյանին մեղսագրված հանցանքը հիմնավորվել է նաև.
Լուսանկարով անձին ճանաչման ներկայացնելու մասին 01.04.2010թ. արձանագրությամբ` համաձայն որի տուժող Կարեն Մկրտչյանը ճանաչելով Գագիկ Մանգասարյանի լուսանկարը, հայտնել է, որ նա է 2009թ. դեկտեմբերի 31-ին ժամը 04։20-ի սահմաններում «5x5» բենզալցակայանում դանակի սպառնալիքով իրենից պահանջել և հափշտակել 420.000 դրամ գումարը և դիմել փախուստի /քրեական գործ հատոր 1 էջ 258/։
Լուսանկարով անձին ճանաչման ներկայացնելու մասին 01.04.2010թ. արձանագրությամբ` համաձայն որի վկա Արտյոմ Խաչատրյանը ճանաչելով Գագիկ Մանգասարյանի լուսանկարը, հայտնել է, որ նրան տեսել է 2009թ. դեկտեմբերի 31-ին ժամը 04։20-ի սահմաններում «5x5» բենզալցակայանի տաղավարում, որտեղ նա դանակի սպառնալիքով Կ.Մկրտչյանից պահանջել է գումար և գումարը հափշտակելով դիմել փախուստի /քրեական գործ հատոր 1 էջ 260/։
Անձին ճանաչման ներկայացնելու մասին 04.06.2010թ. արձանագրությամբ` համաձայն որի վկա Արտյոմ Խաչատրյանը հանձինս Գագիկ Մանգասարյանի ճանաչել է 2009թ. դեկտեմբերի 31-ին ժամը 04։20-ի սահմաններում, Մ.Խորենացի փողոցում գտնվող «5x5» բենզալցակայանի տաղավարում դանակի սպառնալիքով իրենից և Կարեն Մկրտչյանից բենզալցակայանում եղած գումարը հափշտակած և փախուստի դիմած անձնավորությանը։ /քրեական գործ հատոր 2 էջ 35/։
Դատաբժշկական փորձաքննության 2010թ. հունվարի 11-ի թիվ 46 եզրակացությամբ, համաձայն որի Ա.Աֆրիկյանի ստացած մարմնական վնասվածքները` ձախ հոնքի շրջանի, արյունազեղման, ձախ նախաբազկի, աջ դաստակի թվով երկու ծակած-կտրած վերքերի ձևով, պատճառված են արյունազեղումը` բութ առարկայի, ծակած-կտրած վերքերը` միակողմանի սայր ունեցող ծակող-կտրող գործիքով, հնարավոր է գործի հանգամանքներում նշված ժամանակին և պատճառվել է առողջությանը թեթև վնաս` առողջության կարճատև քաքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը ոչ պակաս 6 օրից և ոչ ավել 21 օրից։ Ձախ հոնքի շրջանի արյունազեղումը, ձախ նախաբազկի շրջանի ծակած-կտրած վերքը ինչպես միասին, այնպես ել առանձին-առանձին վերցված առողջության թեթև վնասի հատկանիշներ չեն պարունակում։ Աջ դաստակի թվով երկու ծակած-կտրած վերքը ինչպես միասին, այնպես ել առանձին-առանձին վերցված առաջացրել են առողջությանը թեթև վնաս` առողջության կարճատև քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը ոչ պակաս 6 օրից և ոչ ավել 21 օրից /քրեական գործ հատոր 1 էջ 44/։
Քննչական փորձարարության մասին 16.01.2010թ. արձանագրությամբ` համաձայն որի Վահագն Քիշմիրյանը մատնացույց անելով Երևանի Մ.Խորենացի փողոցի 47-րդ և 49-րդ շենքերին հարակից թիվ 112 ավտոտնակի ետնամասում գտնվող տարածքը հայտնել է, որ նշված վայրում 2010թ. հունվարի 11-ին ժամը 00։10-ին եղբոր` Խաչատուր Քիշմիրյանի և Գագիկ Մանգասարյանի հետ նախապատրաստվել են հարձակում կատարելու համար, որից հետո մոտեցել են Մ.Խորենացի փողոցի 47 շենքի մոտ գտնվող Ա.Աֆրիկյանի խանութին և պատուհանից տեսնելով, որ բացի Ա.Աֆրիկյանից այնտեղ ուրիշ մարդ չկա, մտել են ներս։ Սկզբում խանութ է մտել Գ.Մանգասարյանը, ով կագնելով դռան մոտ փակել է մուտքը։ Խանութում դանակով սպառնալիքներ են տվել Ա.Աֆրիկյանին, պահանջել են ձայն չհանել և խանութում եղած գումարը տալ իրենց։ Երբ Ա.Աֆրիկյանը փորձել է պաշտպանվել, Խ.Քիշմիրյանը դանակով հարվածել է Ա.Աֆրիկյանի ձեռքին, նրան տարել խանութում գտնվող սառնարանի մոտ, ծնկաչոք է արել և կպչուն ժապավենով փակել բերանը, իսկ ինքը, նկատելով խանութի ցուցափեղկի հետևից դուրս եկած Թ.Փափազյանին, նրան դանակի սպառնալիքով նստեցրել է մուտքի դռան առջև դրված աթոռին, որից հետո հափշտակել են խանութում եղած 35.000 ՀՀ դրամ գումարը և նկատելով խանութ մտնող մի կնոջ` դիմել են փախուստի /քրեական գործ հատոր 1 էջ 67-68/։
Քննչական փորձարարության մասին 16.01.2010թ. արձանագրությամբ, համաձայն որի Խաչատուր Քիշմիրյանը մատնացույց անելով Երևանի Մ.Խորենացի փողոցի 47-րդ և 49-րդ շենքերին հարակից թիվ 112 ավտոտնակի ետնամասում գտնվող տարածքը հայտնել է, որ նշված վայրում 2010թ. հունվարի 11-ին ժամը 00։10-ին եղբոր` Վահագն Քիշմիրյանի և մյուս հանցակից Գագիկ Մանգասարյանի հետ նախապատրաստվել են հարձակում կատարելու համար։ Որից հետո մոտեցել են Մ.Խորենացի փողոցի 47 շենքի մոտ գտնվող Ա.Աֆրիկյանի խանութին և մտել ներս։ Սկզբում խանութ է մտել Գ.Մանգասարյանը, ով կագնելով դռան մոտ փակել է մուտքը։ Խանութում դանակով սպառնալիքներ են տվել Ա.Աֆրիկյանին, պահանջել են չշարժվել և խանութում եղած գումարը տալ իրենց։ Խանութում դանակով հարվածել է Ա.Աֆրիկյանի ձեռքին, նրան տարել սառնարանի մոտ և կպչուն ժապավենով փակել բերանը, որից հետո հափշտակել են խանութում եղած 35.000 ՀՀ դրամ գումարը, դուրս եկել խանութից և վազելով հեռացել Սարի-Թաղի ուղղությամբ /քրեական գործ հատոր 1 էջ 69-70/։
Քննչական փորձարարության մասին 03.06.2010թ. արձանագրությամբ և հավելված լուսանկարներով համաձայն որի Գագիկ Մանգասարյանը մատնացույց անելով Մ.Խորենացի թիվ 165/5 հասցեում գտնվող «5x5» բենզալցակայնի տաղավարը, հայտնել է, որ 2009թ. դեկտեմբերի 30-ի լույս 31-ի գիշերը իր հանցակից ընկերներ Խաչատուր և Վահագն Քիշմիրյանների հետ համաձայնությամբ, ինքը դանակով զինված և գլխարկով ու շարֆով դեմքը քողարկած մտել է այնտեղ և բենզալցակայանի աշխատակիցներից դանակի գործադրման սպառնալիքով գումար է պահանջել։ Մատնացույց անելով տաղավարում գտնվող երկաթյա պահարանը, Գ.Մանգասարյանը նշել է, որ բենզալցակայանի աշխատակիցը այդ պահարանից է իրեն գումար տվել, որից հետո փախել է Սարի-Թաղի ուղղությամբ։
Այնուհետև մատնացույց անելով Մ.Խորենացի փողոցի 47 շենքի մոտ գտնվող Ա.Աֆրիկյանի խանութը հայտնել է, որ 2010թ. հունվարի 11-ին ժամը 01։00-ի սահմաններում Քիշմիրյան եղբայրների հետ միասին շարֆերով և գլխարկներով քողարկված, մեկական դանակներով զինված մտել են ներս, որտեղ Խ.Քիշմիրյանը դանակով սպառնալիքներ է տվել Ա.Աֆրիկյանին, պահանջել է ձայն չհանել և ցուցափեղկի ներքևի մասից վերցրել է խանութի գումարը։ Վ.Քիշմիրյանը խանութի ցուցափեղկի հետևից Թ.Փափազյանին քաշելով բերել և նստեցրել է մուտքի դռան մոտ դրված աթոռին։ Ա.Աֆրիկյանը ցանկացել է դանակով վնասել իրեն, սակայն Խ.Քիշմիրյանը Ա.Աֆրիկյանից վերցրել է դանակը և այդ ընթացքում վնասել նրա ձեռքը։ Այնուհետև Քիշմիրյան եղբայրների հետ դուրս են եկել խանութից և դիմել փախուստի /քրեական գործ հատոր 2 էջ 18-32/։
Այլ փաստաթուղթ հանդիսացող և որպես ապացույց ճանաչված` Գագիկ Մանգասարյանի բացատրությամբ, որտեղ ընդունել է վերոհիշյալ դրվագներով կատարած ավազակային հարձակման փաստը /քրեական գործ հատոր 2 էջ 5-7/։
Ամբաստանյալ Գագիկ Մանգասարյանին առաջադրված մեղադրանքը հիմնավորվել է նաև դեպքի վայրի զննության արձանագրություններով, որտեղ մանրամասն նկարագրվել է Մ.Խորենացի փողոցի թիվ 47 շենքի մոտ գտնվող տուժող Ա.Աֆրիկյանի խանութը, որտեղ կատարվել է ավազակային հարձակումը, այնտեղից վերցվել են բամբակյա խծուծով արյան հետքեր և տուժող Ա.Աֆրիկյանից առգրավվել է նրա հագուստները։ Մանրամասն նկարագրվել է Մ.Խորենացի թիվ 165/5 հասցեում գտնվող «5x5» բենզալցակայնի տաղավարը, որտեղ կատարվել է ավազակային հարձակումը։ Տուժող Կ.Մկրտչյանը հայտնել է, որ անծանոթ երիտասարդը մտել է սենյակ և խնդրել լիցքավորման քարտ, մինչև ինքը երկաթյա պահարանից հանել է լիցքավորման քարտը, այդ երիտասարդը մոտ 50 սմ երկարությամբ դանակի սպառնալիքով գումար է պահանջել, որը ստանալուց հետո դիմել է փախուստի։ /քրեական գործ հատոր 1 էջ 6-7, 215-216/ ։
Անձին լուսանկարով ճանաչման ներկայացնելու արձանագրություններով որտեղ ներկայումս դատապարտյալներ Վահագն և Խաչատուր Քիշմիրյանները հանձինս ամբաստանյալ Գ.Մանգասարյանի ճանաչել են իրենց հետ Մ.Խորենացի փողոցի թիվ 47 շենքի մոտ գտնվող տուժող Ա.Աֆրիկյանի խանութից ավազակային հարձակում կատարած անձին։ /քրեական գործ հատոր1 էջ 82, 86/։
Ստացիոնար դատահոգեբուժական փորձաքննության թիվ 135 եզրակացությամբ` համաձայն որի Գագիկ Մանգասարյանը տառապում է անձի էմոցիոնալ անկայունության խանգարում հիվանդությամբ, իրեն մեղսագրված արարքի նկատմամբ ճանաչվել է մեղսունակ, խորհուրդ է տրվել նյարդահոգեբուժի հսկողություն /քրեական գործ հատոր 2 էջ 97-100/։
Պաշտպանական կողմի այն պատճառաբանությունները, որ «Ապրինադա» ՍՊ ընկերությանը պատկանող «5x5» բենզալցակայանի վրա ավազակային հարձակում կատարելու դրվագով ամբաստանյալ Գ.Մանգասարյանի հանցանքը ապացուցված չէ, նկատի ունենալով, որ մեղադրանքը հիմնավորվել է միայն տուժող Կ.Մկրտչյանի և վկա Ա.Խաչատրյանի ցուցմունքներով, լուսանկարով և անձին ճանաչման ներկայացնելու մասին արձանագրություններով, որոնք կատարվել են օրենքի խախտմամբ, որպես ապացույց չթույլատրվող նյութ պետք է ճանաչել ամբաստանյալ Գ.Մանգասարյանի որպես կասկածյալ տված ցուցմունքը և քննչական փորձարարություն կատարելու մասին արձանագրությունը, նկատի ունենալով, որ այդ ցուցմունքը ամբաստանյալ Գ.Մանգասարյանը տվել է բռնության, սպառնալիքի ազդեցության տակ` անհիմն են և հերքվել են հենց ամբաստանյալ Գ.Մանգասարյանի դատարանի կողմից արժանահավատ համարված ցուցմունքով և բացատրությամբ, որտեղ ընդունել է, որ ցուցմունքը քննիչին տվել է կամովին։ Գործի նյութերով չի հիմնավորվել, որ նա ցուցմունքը և բացատրությունը տվել է բռնության, քննությանը խորթ մեթոդների ազդեցության տակ։ Այդ կապակցությամբ պաշտպանական կողմը որևէ հիմնավորում չներկայացրեց։ Քրեական գործում այդ մասին փաստ չկա` բացի Գ.Մանգասարյանի դատարանում ոչնչով չհիմնավորված ցուցմունքից։ Լուսանկարով և անձին ճանաչման ներկայացնելու մասին արձանագրությունների համաձայն` դատավարական այդ գործողությունների ժամանակ պաշտպանական ճառում մատնանշված անձինք հանձինս Գ.Մանգասարյանի անձնապես ճանաչել են բենզալցակայանի վրա ավազակային հարձակում կատարած անձին։ Այդ հանգամանքը նրանք հաստատել են իրենց ցուցմունքներում։ Դատավարական այդ գործողությունների և նշված վկաների ցուցմունքներում Գ.Մանգասարյանին նկարագրելու վերաբերյալ հակասությունները դատարանը էական չի համարում։ Չնայած անձին ճանաչման ներկայացնելու ժամանակ Կարեն Մկրտչյանը չի ճանաչել իրեն ճանաչման ներկայացրած անձանցից ոչ մեկին, 2010թ. սեպտեմբերի 3-ին լրացուցիչ ցուցմունքում հայտնել է, որ հանձինս ամբաստանյալ Գ.Մանգասարյանի ճանաչել է իրենց վրա ավազակային հարձակում կատարած անձին, և հիմնավոր պատճառաբանել անձին ճանաչման ներկայացնելու ժամանակ Գ.Մանգասարյանին չճանաչելու պատճառներն ու պայմանները։ Պաշտպանական կողմի այն պատճառաբանությունը, որ նախաքննական մարմինը չի կատարել ամբաստանյալի առերես հարցաքննություն` իր դեմ ցուցմունք տված վկաների հետ` հիմնավոր չէ։ Ամբաստանյալ Գ.Մանգասարյանը 2010թ. սեպտեմբերի 3-ին ցուցմունք է տվել, որտեղ հենց ինքը` ամբաստանյալ Գ.Մանգասարյանը հրաժարվել է, ինչպես ցուցմունք տալուց, այնպես էլ որևէ մեկի հետ առերես հարցաքննվելուց/քրեական գործ, հատոր 2, էջ 112/։ Հետագա բոլոր ցուցմունքներում էլ ամբաստանյալ Գ.Մանգասարյանը հրաժարվել է ցուցմունքներ տալուց։
Դատարանը« հետազոտելով նախաքննության« դատաքննության ընթացքում ձեռք բերված ապացույցները« դրանցից յուրաքանչյուրը գնահատելով վերաբերելիության« թույլատրելիության« իսկ ամբողջ ապացույցները իրենց համակցությամբ` գործի լուծման համար բավարարության տեսանկյունից« հանգում է այն հետևության« որ «Ապրինադա» ՍՊ ընկերությանը պատկանող «5x5» բենզալցակայանի վրա ավազակային հարձակում կատարելու դրվագով ամբաստանյալ Գ.Մանգասարյանի կատարած հանցանքը հիմնավորված է։
Դատարանը, վերլուծելով և գնահատելով քրեական գործի նյութերը, ապացուցված է համարում, որ ամբաստանյալ Գագիկ Մկրտչի Մանգասարյանը 2009թ. դեկտեմբերի 31-ին ժամը 04։20-ի սահմաններում քննությամբ չպարզված անձի հետ հանցավոր համաձայնությամբ բաց դռնից մտել է «Ապրինադա» ՍՊ ընկերությանը պատկանող «5x5» բենզալցակայանի տաղավար, որտեղ, որպես զենք օգտագործվող առարկայի` դանակի գործադրմամբ, լցակայանի լիցքավորող Կարեն Մկրտչյանին տալով կյանքի և առողջության համար վտանգավոր բռնություն գործադրելու սպառնալիքներ, պահանջել և ստացել է զգալի չափի` 420.000 ՀՀ դրամ գումարը։
Բացի այդ Գ.Մանգասարյանը կրկին անգամ տուժողի առողջության համար վտանգավոր բռնություն գործադրելու միջոցով ավազակային հարձակման եղանակով տուժողի գույքը հափշտակելու մասին Վահագն և Խաչատուր Քիշմիրյանների հետ նախնական համաձայնությամբ 2010թ. հունվարի 11-ին ժամը 0100-ի սահմաններում դանակներով զինված մուտք են գործել Երևանի Մ.Խորենացի փողոցի թիվ 47 հասցեում գտնվող Ա.Աֆրիկյանին պատկանող պարենային ապրանքների խանութ, որտեղ, որպես զենք օգտագործվող առարկա դանակներով` կյանքի և առողջության համար վտանգավոր բռնություն գործադրելու սպառնալիքներ են տվել Ա.Աֆրիկյանին և նրա կնոջը` Թագուհի Փափազյանին։ Խ.Քիշմիրյանը գործադրել է բռնություն` դանակով դիտավորյալ հարվածել է Ա.Աֆրիկյանի ձեռքի շրջանին և նրան պատճառել առողջության կարճատև քայքայումով թեթև մարմնական վնասվածք և հափշտակել զգալի չափի` 300.000 ՀՀ դրամ գումար։
Դատարանը գտավ, որ նախաքննական մարմինը Գ.Մանգասարյանին որպես մեղադրյալ ներգրավելու մասին որոշմամբ` նրան մեղսագրված արարքում ավազակային հարձակման ժամանակ տուժող Ա.Աֆրիկյանին միջին ծանրության վնաս պատճառած լինելու հանգամանքի մասին գործում ապացույցներ չկան։ Դատաբժշկական փորձաքննության եզրակացության համաձայն` նրան պատճառվել է առողջության կարճատև քայքայումով թեթև մարմնական վնասվածք և դա էլ հաստատված է համարում դատարանը։
Ամբաստանյալ Գագիկ Մկրտչի Մանգասարյանի կատարած արարքը համապատասխանում է Հայաստանի Հանրապետության քրեական օրենսգրքի 175-րդ հոդվածի 2-րդ մասի 1-ին, 4-րդ և 5-րդ կետերին ։
Դատարանը պատիժ սահմանելիս հաշվի է առնում ամբաստանյալ Գագիկ Մկրտչի Մանգասարյանի կրկին անգամ, որպեu զենք oգտագործվող առարկայի գործադրմամբ մի խումբ անձանց կողմից նախնական համաձայնությամբ ուրիշի գույքը հափշտակելու նպատակով հարձակումը, որը կատարվել է կյանքի կամ առողջության համար վտանգավոր բռնություն գործադրելու uպառնալիքով` հանրության համար վտանգավորության աստիճանը և բնույթը ու ամբաստանյալ Գ. Մանգասարյանի անձնավորությունը։
Դատարանը որպես պատասխանատվությունը և պատիժը մեղմացնող ու անձը բնութագրող հանգամանք դիտում է այն, որ ամբաստանյալ Գագիկ Մանգասարյանը երիտասարդ է, հանցանքը կատարում է առաջին անգամ, մասնակի ընդունում է կատարած հանցանքը, զղջում դրա համար, բնութագրվում է դրական, ֆիզիկապես վատառողջ է` տառապում է անձի էմոցիոնալ անկայունության խանգարում հիվանդությամբ։
Պատասխանատվությունը և պատիժը ծանրացնող հանգամանքներ չկան։
Կատարած արարքների համար ամբաստանյալ Գագիկ Մանգասարյանը ենթակա է պատժի` ազատազրկման ձևով։
2010թ. օգոստոսի 13-ի թիվ 135 ստացիոնար դատահոգեբուժական փորձաքննության եզրակացության համաձայն Գագիկ Մանգասարյանը տառապում է անձի էմոցիոնալ անկայունության խանգարում հիվանդությամբ, խորհուրդ է տրվել նյարդահոգեբուժի հսկողություն։ Հիմք ընդունելով ստացիոնար դատահոգեբուժական փորձաքննության եզրակացությունը, դատարանը գտավ, որ ամբաստանյալ Գագիկ Մանգասարյանի նկատմամբ պատիժը կրելու ընթացքում պետք է սահմանել նյարդահոգեբուժի հսկողություն։
Դատարանը գտավ, որ ամբաստանյալ Գագիկ Մկրտչի Մանգասարյանի նկատմամբ ընտրված խափանման միջոց կալանավորումը պետք է թողնել անփոփոխ մինչև` դատավճռի օրինական ուժի մեջ մտնելը։
Քննարկելով քաղաքացիական հայցի հարցը դատարանը գտավ, որ տուժողներ «Ապրինադա» ՍՊԸ-ի և Ա. Աֆրիկյանի քաղաքացիական հայցը պետք է բավարարել։
Ամբաստանյալ Գագիկ Մանգասարյանից հօգուտ «Ապրինադա» ՍՊԸ-ի պետք է բռնագանձել` 420.000 ՀՀ դրամ, որպես հանցագործությամբ պատճառված նյութական վնասի հատուցում։
Ամբաստանյալ Գագիկ Մկրտչի Մանգասարյանից, դատապարտյալներ Խաչատուր Հովհաննեսի Քիշմիրյանից, Վահագն Հովհաննեսի Քիշմիրյանից և վերջինիս ծնողներ` Հովհաննես Քիշմիրյանից և Հասմիկ Կարապետյանից համապարտության կարգով հօգուտ Աշոտ Աֆրիկյանի պետք է բռնագանձել 300 000 /երեք հարյուր հազար/ՀՀ դրամ, որպես հանցագործությամբ պատճառված նյութական վնասի հատուցում։
Դատարանը գտավ, որ ՀՀ քրեական օրենսգրքի 175-րդ հոդվածի 2-րդ մասի 1-ին, 4-րդ և 5-րդ կետերով սանկցիայով նախատեսված գույքի բռնագրավման ձևով լրացուցիչ պատիժը ամբաստանյալ Գագիկ Մկրտչի Մանգասարյանի նկատմամբ չպետք է կիրառել, նկատի ունենալով Գագիկ Մկրտչի Մանգասարյանի` նյութական վատ վիճակը և այն, որ մասնակի ընդունում է կատարած հանցանքը, զղջում դրա համար։
Ղեկավարվելով Հայաստանի Հանրապետության քրեական դատավարության օրենսգրքի 357-360-րդ, 364-365-րդ, 369-372-րդ հոդվածներով՝ դատարանը

Վ Ճ Ռ Ե Ց
Ամբաստանյալ Գագիկ Մկրտչի Մանգասարյանին մեղավոր ճանաչել Հայաստանի Հանրապետության քրեական օրենսգրքի 175-րդ հոդվածի 2-րդ մասի 1-ին, 4-րդ և 5-րդ կետերով և դատապարտել` ազատազրկման` վեց տարի վեց ամիս ժամկետով` առանց անձնական գույքի բռնագրավման։ Պատիժը կրելու ընթացքում Գագիկ Մկրտչի Մանգասարյանի նկատմամբ սահմանել նյարդահոգեբուժի հսկողություն։
Ամբաստանյալ Գագիկ Մկրտչի Մանգասարյանը պատիժը կրելու է ՀՀ արդարադատության նախարարության համապատասխան քրեակատարողական հիմնարկում։
Ամբաստանյալ Գագիկ Մկրտչի Մանգասարյանի պատիժը կրելու սկիզբը հաշվել 2010թ. հունիսի 3-ից։
Ամբաստանյալ Գագիկ Մկրտչի Մանգասարյանի նկատմամբ ընտրված խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Տուժողներ «Ապրինադա» ՍՊԸ-ի և Ա. Աֆրիկյանի քաղաքացիական հայցը բավարարել։
Ամբաստանյալ Գագիկ Մանգասարյանից հօգուտ «Ապրինադա» ՍՊԸ-ի բռնագանձել` 420.000 /չորս հարյուր քսան հազար/ ՀՀ դրամ, որպես հանցագործությամբ պատճառված նյութական վնասի հատուցում։
Ամբաստանյալ Գագիկ Մկրտչի Մանգասարյանից, դատապարտյալներ Խաչատուր Հովհաննեսի Քիշմիրյանից, Վահագն Հովհաննեսի Քիշմիրյանից և վերջինիս ծնողներ` Հովհաննես Քիշմիրյանից և Հասմիկ Կարապետյանից համապարտության կարգով հօգուտ Աշոտ Աֆրիկյանի բռնագանձել 300 000 /երեք հարյուր հազար/ՀՀ դրամ, որպես հանցագործությամբ պատճառված նյութական վնասի հատուցում։
Դատավճիռը հրապարակման օրվանից մեկամսյա ժամկետում կարող է բողոքարկվել Հայաստանի Հանրապետության վերաքննիչ քրեական դատարան։
ԴԱՏԱՎՈՐ՝ Գ.ԱՎԵՏԻՍՅԱՆ