Ո Ր Ո Շ ՈՒ Մ

28 դեկտեմբերի 2011թ. ԵԿԴ/0311/01/10 ք.Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ` Մ.ՊԵՏՐՈՍՅԱՆ
ՔԱՐՏՈՒՂԱՐՈՒԹՅԱՄԲ` Ռ.ԴԱՎՈՅԱՆԻ

դռնբաց դատական նիստում ՀՀ ԱՆ <<Կոշ>> ՔԿՀ-ի դատապարտյալ Թաթուլ Ժորայի Գրիգորյանի վերաքննիչ բողոքի հիման վրա դատական ստուգման ենթարկելով Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի /այսուհետ` դատարան/ 22.12.2010թ. դատավճիռը վերջինիս մասով վերանայելու մասին 2011 թվականի հուլիսի 21-ի որոշման օրինականությունը և հիմնավորվածությունը

ä²ð¼ºò

Գործի դատավարական նախապատմությունը և փաստական հանգամանքները
2010 թվականի դեկտեմբերի 22-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի ԵԿԴ/0311/01/10 դատավճռով Թաթուլ Ժորայի Գրիգորյանը մեղավոր է ճանաչվել ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով, ՀՀ քրեական օրենսգրքի 266 հոդվածի 1-ին մասով և ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով և ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով` դատապարտվել է ազատազրկման 5 /հինգ/ տարի ժամկետով` առանց գույքի բռնագրավման, ՀՀ քրեական օրենսգրքի 266-րդ հոդվածի 1-ին մասով` ազատազրկման 3 /երեք/ տարի ժամկետով, ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերով` ազատազրկման 6 /վեց/ ամիս ժամկետով, ՀՀ քրեական օրենսգրքի 66-րդ հոդվածի 4-րդ կետի կարգով, պատիժները մասնակի գումարելու միջոցով, վերջնական պատիժ է նշանակվել ազատազրկում 6 /վեց/ տարի 6 /վեց/ ամիս ժամկետով` առանց գույքի բռնագրավման:
Ամբաստանյալ Թաթուլ Գրիգորյանը դատապարտվել է այն բանի համար, որ առանց իրացնելու նպատակի, ապօրինի, կրկին անգամ, ձեռք է բերել ու պահել խոշոր չափի չորացված մարիխուանա տեսակի թմրամիջոց, բացի այդ, իրացնելու նպատակով, ապօրինի, կրկին անգամ ձեռք է բերել, պահել, այնուհետև իրացրել է նույն տեսակի խոշոր չափի թմրամիջոց.
2010թ. փետրվարից հունիսի 16-ն ընկած ժամանակահատվածում Թաթուլ Գրիգորյանը, աշխատելով <<Վիպ>> տաքսի ծառայությունում որպես վարորդ, 5 գրամ չափաբաժինը` 8 հազար դրամով, նախաքննությամբ չպարզված աղբյուրից, առանց իրացնելու նպատակի, ապօրինի ձեռք է բերել և պահել խոշոր չափի` 10 գրամ, ապա` կրկին անգամ խոշոր չափի` 5 գրամ չորացված <<մարիխուանա>> տեսակի թմրամիջոց, որը ծխելու եղանակով գործածել է անձամբ, իսկ չնչին մասը հյուրասիրելու եղանակով իրացրել է իր ծանոթ Հովհաննես Կարապետյանին:
Այնուհետև, նույն ժամանակահատվածում, նախաքննությամբ չպարզված աղբյուրից, Հովհաննես Կարապետյանի հետ կայացած նախնական համաձայնությամբ, վերջինիս իրացնելու նպատակով, ապօրինի ձեռք է բերել, պահել և խոշոր չափի` 5 գրամ փաթեթներով, երկու և ավելի դեպքերով, վերջինիս կրկին անգամ իրացրել է ընդհանուր առմամբ 40 գրամ չորացված <<մարիխուանա>> տեսակի թմրամիջոց:
Բացի այդ, 2010թ. հունիսի 17-ին, նախաքննությամբ չպարզված աղբյուրից, Հովհաննես Կարապետյանին իրացնելու նպատակով, Թաթուլ Գրիգորյանը կրկին անգամ, ապօրինի ձեռք է բերել և պահել չորացված <<մարիխուանա>> տեսակի թմրամիջոցի երկու փաթեթ` խոշոր չափի` 5.213 գրամ ու 4.972 գրամ քաշով` 10.185 գրամ ընդհանուր քաշով, որը նույն օրը հայտնաբերվել և առգրավվել է վերջինիս անձնական խուզարկությամբ:
Դատավճիռը Թ.Գրիգորյանի կողմից չի բողոքարկվել և 2011 թվականի մայիսի 05-ին ստացել է օրինական ուժ:
2011 թվականի հուլիսի 13-ին դատապարտյալ Թաթուլ Ժորայի Գրիգորյանը միջնորդություն է ներկայացրել դատարան` խնդրելով վերանայել առաջին ատյանի դատարանի կողմից իր նկատմամբ կայացրած դատավճիռը` նկատի ունենալով ՀՀ ազգային ժողովի կողմից 2011 թվականի մայիսի 23-ին ընդունված <<ՀՀ քրեական օրենսգրքում փոփոխություններ և լրացումներ կատարելու մասին>> ՀՀ օրենքը:
Վերանայման արդյունքում, դատարանի 21.07.2011թ. որոշմամբ դատապարտյալ Թաթուլ Ժորայի Գրիգորյանի դիմումը բավարարվել է և Թաթուլ Ժորայի Գրիգորյանին մեղսագրված հանցանքները համապատասխանեցվել են չորս դրվագներով կատարված ՀՀ քրեական օրենսգրքի 266-րդ հոդվածի 2-րդ մասի 2-րդ կետի, չորս և ավելի դրվագներով կատարված` ՀՀ քրեական օրենսգրքի 268-րդ հոդվածի 2-րդ մասի 2-րդ կետի և ՀՀ քրեական օրենսգրքի 266-րդ հոդվածի 1-ին մասի հատկանիշներին ու նշանակված` 6/ վեց/ տարի 6 /վեց/ ամիս ժամկետով ազատազրկումը թողնվել է անփոփոխ:
Դատավճիռը մնացած մասով թողնվել է անփոփոխ:
Նույն դատարանի 31.10.2011թ. որոշմամբ բավարարվել է դատապարտյալ Թ.Գրիգորյանի դիմումը և թիվ ԵԿԴ/0311/01/10 գործով 2010թ. դեկտեմբերի 22-ին կայացված դատավճիռը վերանայելու մասին 2011թ. հուլիսի 21-ի որոշման դեմ վերաքննիչ բողոք ներկայացնելու բաց թողնված ժամկետը համարվել է հարգելի:
Դատարանի 2011 թվական հուլիսի 21-ի որոշման դեմ վերաքննիչ բողոք է բերել դատապարտյալ Թ.Գրիգորյանը:

Վերաքննիչ բողոքի հիմքերը, փաստարկները և պահանջը
Վերաքննիչ բողոքը քննվում է հետևյալ հիմքերի սահմաններում ներքոհիշյալ հիմնավորումներով.
Դատապարտյալի կարծիքով` դատարանի կողմից նշանակված պատիժը անարդարացի է` ակնհայտ խիստ լինելու պատճառով և որոշում կայացնելիս դատարանը խախտել է նյութական և դատավարական իրավունքի նորմերի պահանջները:
Դատարանը որոշում կայացնելիս հաշվի չի առել այն հանգամանքը, որ ՀՀ ԱԺ կողմից ընդունված 23.05.2011թ. ՀՕ-143-Ն օրենքը արդեն դատավճիռը վերանայելու հիմք է և պատիժը մեղմացնող հանգամանք:
Իր մեղադրանքի ծավալից հանելով ՀՀ քրեական օրենսգրքի 266-րդ հոդվածի 2-րդ մասի 2.1 կետը և 268-րդ հոդվածի 2-րդ մասի 1-ին կետը` դատարանը պետք է մեղմացներ իր նկատմամբ նշանակված պատիժը: Մինչդեռ այն անփոփոխ թողնելով խախտել է ՀՀ Սահմանադրության 22-րդ հոդվածի 5-րդ կետը և ՀՀ քրեական օրենսգրքի 13-րդ հոդվածի 1-ին մասը և ծանրացրել իր` որպես դատապարտյալի վիճակը` հաշվի չառնելով, որ ՀՀ քրեական օրենսգրքի 21-րդ հոդվածը ուժը կորցրած է ճանաչվել:
Դատարանը որոշում կայացնելիս խախտել է նաև ՀՀ քրեական դատավարության օրենսգրքի 371-րդ հոդվածի 4-րդ կետը:
Վերոգրյալի հիման վրա խնդրել է վերաքննիչ բողոքը քննել առանց իր ներկայության: Բեկանել դատարանի 21.07.2011թ. թիվ ԵԿԴ/0311/01/10 որոշումը պատժաչափի մասով, այն փոփոխել և նշանակել ավելի մեղմ պատիժ:

Վերաքննիչ դատարանի պատճառաբանությունները և եզրահանգումը
Վերաքննիչ բողոքում նշված հիմքերի և հիմնավորումների սահմաններում կատարելով դատական ստուգում` ներկայացնելով դատական ակտի բովանդակությունը, վերաքննիչ բողոքի էությունը, վերլուծելով գործի նյութերը, Վերաքննիչ դատարանը հանգում է այն հետևության, որ վերաքննիչ բողոքը պետք է մերժել` դատական ակտը թողնելով օրինական ուժի մեջ, հետևյալ պատճառաբանությամբ.
<<ՀՀ քրեական օրենսգրքում փոփոխություններ և լրացումներ կատարելու մասին>> 2011 թվականի մայիսի 23-ի ՀՀ օրենքի 25-րդ հոդվածի համաձայն` ՀՀ քրեական օրենսգրքի 266 հոդվածի 2-րդ մասի 2.1 կետը ճանաչվել է ուժը կորցրած, նույն օրենքի 26-րդ կետի համաձայն` ՀՀ քրեական օրենսգրքի 268 հոդվածի 2-րդ մասի 1-ին կետը նույնպես ճանաչվել է ուժը կորցրած:
ՀՀ Սահմանադրության 22-րդ հոդվածի համաձայն` արարքի պատժելիությունը վերացնող կամ պատիժը մեղմացնող օրենքն ունի հետադարձ ուժ:
ՀՀ քրեական օրենսգրքի 13-րդ հոդվածի 1-ին մասը սահմանում է, որ <<արարքի հանցավորությունը վերացնող, պատիժը մեղմացնող կամ հանցանք կատարած անձի վիճակն այլ կերպ բարելավող օրենքը հետադարձ ուժ ունի, այսինքն՝ տարածվում է մինչև այդ օրենքն ուժի մեջ մտնելը համապատասխան արարք կատարած անձանց, այդ թվում՝ այն անձանց վրա, ովքեր կրում են պատիժը կամ կրել են դա, սակայն ունեն դատվածություն>>:
ՀՀ քրեական օրենսգրքի վերոշարադրյալ դրույթի վերլուծությունից երևում է, որ օրենքի հետադարձության կանոնը կիրառվում է այն դեպքերում, երբ անձի կողմից հանցավոր արարքը կատարվել է նախքան արարքի հանցավորությունը վերացնող, պատիժը մեղմացնող կամ հանցանք կատարած անձի վիճակն այլ կերպ բարելավող օրենքի ուժի մեջ մտնելը:
Ինչպես երևում է գործի նյութերից, դատարանի դատավճռով Թ.Գրիգորյանը դատապարտվել է ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով, ՀՀ քրեական օրենսգրքի 266-րդ հոդվածի 1-ին մասով և ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերով նախատեսված հանցագործությունների համար:
Տվյալ դեպքում դատապարտյալ Թ.Գրիգորյանի վերաբերյալ դատական ակտը վերանայելու արդյունքում դատարանը հանգել է ճիշտ հետևության և Թաթուլ Գրիգորյանին ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով և ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերով մեղսագրված արարքները օրենքով սահմանված կարգով համապատասխանեցրել է ՀՀ քրեական օրենսգրքի 266-րդ հոդվածի 2-րդ մասի 2-րդ կետի և 268-րդ հոդվածի 2-րդ մասի 2-րդ կետի հատկանիշներին և հաշվի առնելով վերջինիս կողմից կատարած հանցագործությունների բնույթը, հասարակական վտանգավորության աստիճանը, դատապարտյալի անձը, գործի կոնկրետ հանգամանքները, նշանակված պատիժը իրավացիորեն թողել է անփոփոխ:
Վերոգրյալի պայմաններում Վերաքննիչ դատարանը հանգում է այն հետևության, որ Երևան քաղաքի Կենտրոն և Նորք-Մարաշ համայնքների ընդհանուր իրավասության առաջին ատյանի դատարանի 2011 թվականի հուլիսի 21-ի վերոհիշյալ որոշումը օրինական է ու հիմնավորված, ուստի այն փոփոխելու և վերաքննիչ բողոքը բավարարելու օբյեկտիվ հիմքեր չկան:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-րդ, 394-րդ հոդվածներով` վերաքննիչ դատարանը

ՈՐՈՇԵՑ

Դատապարտյալ Թաթուլ Ժորայի Գրիգորյանի վերաքննիչ բողոքը մերժել:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի հուլիսի 21-ի որոշումը` Թաթուլ Ժորայի Գրիգորյանի վերաբերյալ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 22.11.2010թ. դատավճիռը վերանայելու մասին, թողնել օրինական ուժի մեջ:
Որոշումը կարող է բողոքարկվել ՀՀ վճռաբեկ դատարան` այն ստանալու պահից 15-օրյա ժամկետում:


ՆԱԽԱԳԱՀՈՂ ԴԱՏԱՎՈՐ` Մ. ՊԵՏՐՈՍՅԱՆ

Գործ Հ ԵԿԴ 0311/01/10

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Ք.Երևան 22 դեկտեմբերի 2010թ.

ԵՐԵՎԱՆԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ
ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ
ՆԱԽԱԳԱՀՈՂ ԴԱՏԱՎՈՐ` Կ.ՂԱԶԱՐՅԱՆ
Քարտուղարությամբ` Է. Ավետիսյանի
ՄԱՍՆԱԿՑՈՒԹՅԱՄԲ`
Մեղադրող` Վ. Մուրադյանի
Պաշտպաններ՝ Կ. Քամալյանի
Վ. Կիրակոսյանի
Ա. Հովհաննիսյանի
Դռնբաց դատական նիստում արագացված դատաքննության կարգով քննության առավ քրեական գործն ըստ մեղադրանքի`
1. Նարեկ Արայի Ռոստոմյանի, ծնված 16.10.1986թ. ք. Երևան,
հայ, ՀՀ քաղաքացի, ֆիզիկապես առողջ,միջնակարգ
մասնագիտական կրթությամբ, զինապարտ, սովորում է
Հայաստանի պետական ագրարային համալսարանի 1-կուրսում,
չամուսնացած, խնամքին 2 անձ, աշխատում է ՀՀ ոստիկանության
Երևան քաղաքի վարչության ուղեկցող գումարտակում որպես
ոստիկան, չդատված, հաշվառված է Երևան քաղաքի Լենինգրադյան
փողոցի 32գ շենքի 25 բնակարանում, բնակվում է Երևան քաղաքի
Պարոնյան 1 շենքի 25 բնակարանում:
Կալանքի տակ է 2010թ.-ի հունիսի 17-ից:
Մեղադրվում է ՀՀ քրեական օրենսգրքի 266-րդ հոդվածի 1-ին մասով և 268-րդ հոդվածի 2-րդ մասի 1-ին ու 2-րդ կետերով:
2. Արտակ Իգնատի Խչեյանի, ծնված 07.03.1976թ. ք. Երևան,
հայ, ՀՀ քաղաքացի, ֆիզիկապես առողջ,միջնակարգ կրթությամբ,
ամուսնացած, խնամքին 4 անձ, չի աշխատում, նախկինում
չդատված, բնակվում է Երևան քաղաքի Բագրատունյաց 28 շենքի
59 բնակարանում:
Որպես խափանման միջոց կիրառվել է ստորագրություն չհեռանալու մասին:
Մեղադրվում է ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով:
3. Հովհաննես Սերգեյի Կարապետյանի, ծնված 15.07.1987թ. ք. Երևան, հայ, ՀՀ քաղաքացի, ֆիզիկապես առողջ,միջնակարգ կրթությամբ, ամուսնացած, խնամքին 2 անձ, չի աշխատում,
նախկինում չդատված, հաշվառված է ք. Երևան, Սողոմոն Տարոնցու 1-ին շենքի 520 բնակարանում, բնակվում է Մասիս քաղաքի 3-րդ թաղամասի 1-ին շենքի 1-ին բնակարանում:
Որպես խափանման միջոց կիրառվել է ստորագրություն չհեռանալու մասին:
Մեղադրվում է ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով:
4. Թաթուլ Ժորայի Գրիգորյանի, ծնված 20.07.1967թ. ք. Երևան, հայ, ՀՀ քաղաքացի,ֆիզիկապես վատառողջ, միջնակարգ կրթությամբ, ամուսնացած, խնամքին 5 անձ, աշխատում է որպես վարորդ <<ՎԻՊ>> տաքսի ծառայությունում, նախկինում չդատված, բնակվում է ք. Երևան, Նորագավիթ թաղամասի Արտաշատի խճուղու 50 շենքում:
Կալանքի տակ է 2010թ.-ի հունիսի 17-ից:
Մեղադրվում է ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով, 266-րդ հոդվածի 1-ին մասով և 268 հոդվածի 2-րդ մասի 1-ին և 2-րդ կետերով:
Քրեական գործը հարուցվել է 2010թ. հունիսի 17-ին ՀՀ հատուկ քննչական ծառայության կողմից:
Ամբաստանյալ Նարեկ Ռոստոմյանին մեղադրանք է առաջադրվել այն բանի համար, որ նա, առանց իրացնելու նպատակի, ապօրինի, կրկին անգամ ձեռք է բերել ու պահել խոշոր չափի չորացված <<մարիխուանա>> տեսակի թմրամիջոց, բացի այդ, ապօրինի իրացրել է նույն տեսակի թմրամիջոց.
2010թ. փետրվարից հունիսի 16-ն ընկած ժամանակահատվածում ոստիականության Երևան քաղաքի վարչության ուղեկցող գնդի ոստիկան Նարեկ Ռոստոմյանը իր ծանոթ Արտակ Խչեյանից, 5 գրամ չափաբաժինը 10 հազար դրամով, առանց իրացնելու նպատակի, ապօրինի ձեռք է բերել և պահել <<մարիխուանա>> տեսակի թմրամիջոց, այնուհետև, կրկին անգամ, տարբեր խմբաքանակներով, առանց իրացնելու նպատակի, ապօրինի ձեռք է բերել և պահել 40 գրամ ընդհանուր քաշով խոշոր չափի մարիխուանա տեսակի թմրամիջոց, այն տարբեր ժամանակահատվածներում ծխելու եղանակով գործածել է անձամբ, իսկ 2010թ. հունիսի 17-ին` ժամը 11-ի սահմաններում, չնչին մասն իրացրել է նույն գնդի ոստիկաններ Վարդան Վահանյանին և Մհեր Մանուչարյանին, ովքեր հիշյալ թմրամիջոցը նույնպես գործածել են ծխելու եղանակով: Ապօրինի ձեռք բերած ու պահած չորացված <<մարիխուանա>> տեսակի թմրամիջոցից 0.27 գրամը նույն օրը հայտնաբերվել և առգրավվել է Նարեկ Ռոստոմյանի վարած <<Միցուբիշի Պաջեռո>> մակնիշի, 14uu707 պետհամարանիշի ավտոմեքենայի զննմամբ:
Ամբաստանյալ Արտակ Խչեյանին մեղադրանք է առաջադրվել այն բանի համար, որ նա, իրացնելու նպատակով, ապօրինի, կրկին անգամ ձեռք է բերել, պահել, այնուհետև իրացրել է խոշոր չափի չորացված <<մարիխուանա>> տեսակի թմրամիջոց.
2010թ. փետրվարից հունիսի 16-ն ընկած ժամանակահատվածում, Արտակ Խչեյանը իր ծանոթ Հովհաննես Կարապետյանից, նախնական համաձայնությամբ, երկու և ավելի դեպքերով խոշոր չափի` 5 գրամ չափաբաժնով փաթեթը 8 հազար դրամով իրացնելու նպատակով, ապօրինի ձեռք է բերել, պահել, այնուհետև նույն չափաբաժնով փաթեթը 10 հազար դրամով տարբեր խմբաքանակներով կրկին անգամ Նարեկ Ռոստոմյանին իրացրել է 40 գրամ ընդհանուր քաշով չորացված <<մարիխուանա>> տեսակի թմրամիջոց, որը հայտնաբերվել է վերջինիս ավտոմեքենայի զննմամբ:
Ամբաստանյալ Հովհաննես Կարապետյանին մեղադրանք է առաջադրվել այն բանի համար, որ նա, իրացնելու նպատակով, ապօրինի, կրկին անգամ ձեռք է բերել, պահել, այնուհետև իրացրել է խոշոր չափի չորացված մարիխուանա տեսակի թմրամիջոց.
2010թ. փետրվարից հունիսի 16-ն ընկած ժամանակահատվածում իր ծանոթ ` <<Վիպ>> տաքսի-ծառայությանը պատկանող ԳԱԶ-3110 մակնիշի ավտոմեքենայի վարորդ Թաթուլ Գրիգորյանից, նախնական համաձայնությամբ, երկու և ավելի դեպքերով խոշոր չափի` 5 գրամ չափաբաժնով փաթեթը 8 հազար դրամով, տարբեր խմբաքանակներով, կրկին անգամ Արտակ Խչեյանին իրացրել է 40 գրամ ընդհանուր քաշով չորացված մարիխուանա տեսակի թմրամիջոց:
Ամբաստանյալ Թաթուլ Գրիգորյանին մեղադրանք է առաջադրվել այն բանի համար, որ նա, առանց իրացնելու նպատակի, ապօրինի, կրկին անգամ, ձեռք է բերել ու պահել խոշոր չափի չորացված մարիխուանա տեսակի թմրամիջոց, բացի այդ, իրացնելու նպատակով, ապօրինի, կրկին անգամ ձեռք է բերել, պահել, այնուհետև իրացրել է նույն տեսակի խոշոր չափի թմրամիջոց.
2010թ. փետրվարից հունիսի 16-ն ընկած ժամանակահատվածում Թաթուլ Գրիգորյանը, աշխատելով <<Վիպ>> տաքսի ծառայությունում որպես վարորդ, 5 գրամ չափաբաժինը` 8 հազար դրամով, նախաքննությամբ չպարզված աղբյուրից, առանց իրացնելու նպատակի, ապօրինի ձեռք է բերել և պահել խոշոր չափի` 10 գրամ, ապա` կրկին անգամ խոշոր չափի` 5 գրամ չորացված <<մարիխուանա>> տեսակի թմրամիջոց, որը ծխելու եղանակով գործածել է անձամբ, իսկ չնչին մասը հյուրասիրելու եղանակով իրացրել է իր ծանոթ Հովհաննես Կարապետյանին:
Այնուհետև, նույն ժամանակահատվածում, նախաքննությամբ չպարզված աղբյուրից, Հովհաննես Կարապետյանի հետ կայացած նախնական համաձայնությամբ, վերջինիս իրացնելու նպատակով, ապօրինի ձեռք է բերել, պահել և խոշոր չափի` 5 գրամ փաթեթներով, երկու և ավելի դեպքերով, վերջինիս կրկին անգամ իրացրել է ընդհանուր առմամբ 40 գրամ չորացված <<մարիխուանա>> տեսակի թմրամիջոց:
Բացի այդ, 2010թ. հունիսի 17-ին, նախաքննությամբ չպարզված աղբյուրից, Հովհաննես Կարապետյանին իրացնելու նպատակով, Թաթուլ Գրիգորյանը կրկին անգամ, ապօրինի ձեռք է բերել և պահել չորացված <<մարիխուանա>> տեսակի թմրամիջոցի երկու փաթեթ` խոշոր չափի` 5.213 գրամ ու 4.972 գրամ քաշով` 10.185 գրամ ընդհանուր քաշով, որը նույն օրը հայտնաբերվել և առգրավվել է վերջինիս անձնական խուզարկությամբ:
Քրեական գործը մեղադրական եզրակացությամբ ուղարկվել է դատարան 12.11.2010թ.-ին:
Մինչև դատաքննությունն սկսվելն ամբաստանյալներ Նարեկ Ռոստոմյանը, Արտակ Խչեյանը, Հովհաննես Կարապետյանն ու Թաթուլ Գրիգորյանը միջնորդեցին դատական քննությունն անցկացնել արագացված կարգով և հայտարարեցին, որ առաջադրված մեղադրանք իրենց պարզ է, համաձայն են մեղադրանքի հետ, միջնորդությունը ներկայացրել են կամավոր, խորհրդակցել են պաշտպանների հետ, գիտակցում են արագացված կարգով դատաքննությունն անցկացնելու հետևանքները:
Դատարանը համոզվելով, որ առկա են ՀՀ քրեական դատավարության օրենսգրքի 375-1 և 375-2 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալները կատարել են արարքներ` Նարեկ Ռոստոմյանը`ՀՀ քրեական օրենսգրքի 266-րդ հոդվածի 1-ին մասով և 268-րդ հոդվածի 2-րդ մասի 1-ին ու 2-րդ կետերով, Արտակ Խչեյանը` ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով, Հովհաննես Կարապետյանը` ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով և Թաթուլ Գրիգորյանը` ՀՀ քրեական օրենսգրքի 266-րդ հոդվածի 2-րդ մասի 2-րդ և 2.1 կետերով, 266-րդ հոդվածի 1-ին մասով և 268 հոդվածի 2-րդ մասի 1-ին և 2-րդ կետերով, որի համար պետք է ենթարկվեն քրեական պատասխանատվության և պատժի ու այն պետք է կրեն:
Ամբաստանյալների նկատմամբ պատիժ նշանակելիս, պատժի տեսակն ու չափը որոշելիս, դատարանը հաշվի է առնում նրանց կատարած հանցագործության հանրության համար վտանգավորության աստիճանն ու բնույթը, նրանց անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Որպես Նարեկ Ռոստոմյանի անձը բնութագրող հանգամանքներ դատարանը հաշվի է առնում այն, որ նա երիտասարդ է, զղջում է կատարածի համար, նախկինում արատավորված չի եղել, դրական է բնութագրվում բնակության և ծառայության վայրերից, բարեխիղճ ծառայելու համար զորամասի հրամանատարության կողմից արժանացել է շնորհակալական նամակի:
Որպես մեղմացնող հանգամանք դատարանը արձանագրում է այն, որ նա խնամքին ունի 2 անձ` ծնողները, ընդ որում` 2-րդ կարգի հաշմանդամ հայր, տալով խոստովանական ցուցմունքներ` աջակցել է հանցագործության բացահայտմանը:
Ծանրացնող հանգամանքներ դատարանը չի արձանագրում:
Որպես Արտակ Խչեյանի անձը բնութագրող հանգամանքներ դատարանը հաշվի է առնում այն, որ նա երիտասարդ է, տվել է խոստովանական ցուցմունքներ, զղջում է կատարածի համար, նախկինում արատավորված չի եղել, խնամքին ունի 3 անձ` կինը և երկու երեխաները:
Որպես մեղմացնող հանգամանք դատարանը արձանագրում է այն, որ նա խնամքին ունի 10 և 9 տարեկան երկու երեխաներ:
Ծանրացնող հանգամանքներ դատարանը չի արձանագրում:
Որպես Հովհաննես Կարապետյանի անձը բնութագրող հանգամանքներ դատարանը հաշվի է առնում այն, որ նա երիտասարդ է, տվել է խոստովանական ցուցմունքներ, զղջում է կատարածի համար, նախկինում արատավորված չի եղել, խնամքին ունի 2 անձ` կինը և մեկ երեխան:
Որպես մեղմացնող հանգամանք դատարանը արձանագրում է այն, որ նա խնամքին ունի 5 տարեկան մեկ երեխա:
Ծանրացնող հանգամանքներ դատարանը չի արձանագրում:
Որպես Թաթուլ Գրիգորյանի անձը բնութագրող հանգամանքներ դատարանը հաշվի է առնում այն, որ նա տվել է խոստովանական ցուցմունքներ, զղջում է կատարածի համար, նախկինում արատավորված չի եղել, խնամքին ունի 5 անձ` մայրը, կինը և երեք երեխաները , դրական է բնութագրվում բնակության վայրից:
Որպես մեղմացնող հանգամանք դատարանը արձանագրում է այն, որ նա խնամքին ունի 5 և 12 տարեկան երեխաներ, վատառողջ է` տառապում է <<միջին ծանրության երկկողմանի թոքաբորբ>> ախտորոշում հիվանդությամբ:
Ծանրացնող հանգամանքներ դատարանը չի արձանագրում:
Հաշվի առնելով ամբաստանյալներ` Արտակ Խչեյանի, Հովհաննես Կարապետյանի և Թաթուլ Գրիգորյանի անձը բնութագրող հատկանիշները, մեղմացմող հանգամանքների առկայությունը, ծանրացնող հանգամանքների բացակայությունը, ընտանեկան վիճակը, դատարանը եկավ համոզման, որ նրանց նկատմամբ պետք չէ կիրառել լրացուցիչ պատիժ` գույքի բռնագրավում:
Քննության առնելով ամբաստանյալների նկատմամբ ընտրված խափանման միջոցների հարցը` դատարանը գտավ, որ դրանք պետք է թողնել անփոփոխ մինչև դատավճռի օրինական ուժի մեջ մտնելը:
Գործով իրեղեն ապացույց ճանաչված` 0.27 գրամ և 10.185 գրամ <<չորացված մարիխուանա>> տեսակի թմրամիջոցներն ու <<Կոկա-Կոլա>> գրառմամբ պիտակով, կանաբինոիդների և թմրալկոլոիդ տետրեհիդրոկաննաբինոլի հետքերով պոլիմերային տարան, որոնք գտնվում են քրեական գործում, պետք է թողնել սույն քրեական գործից անջատված վարույթում:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 375-3 հոդվածներով, դատարանը

Վ Ճ Ռ Ե Ց

Նարեկ Արայի Ռոստոմյանին մեղավոր ճանաչել ՀՀ քրեական օրենսգրքի 266-րդ հոդվածի 1-ին մասով և 268 հոդվածի 2-րդ մասի 1-ին ու 2-րդ կետերով և դատապարտել` ՀՀ քրեական օրենսգրքի 266 հոդվածի 1-ին մասով` ազատազրկման 3 /երեք/ տարի ժամկետով, ՀՀ քրեական օրենսգրքի 268 հոդվածի 2-րդ մասի 1-ին ու 2-րդ կետերով` ազատազրկման 6 /վեց/ ամիս ժամկետով, ՀՀ քրեական օրենսգրքի 66 հոդվածի 4-րդ կետի կարգով, պատիժները լրիվ գումարելու միջոցով, վերջնական պատիժ նշանակել ազատազրկում 3 /երեք/ տարի 6 /վեց/ ամիս ժամկետով, որը պետք է կրի ՀՀ ԱՆ համապատասխան ՔԿՀ-ում:
Պատժի սկիզբը հաշվել 2010թ.-ի հունիսի 17-ից:
Խափանման միջոց կալանավորումը թողնել անփոփոխ մինչև դատավճռի օրինական ուժի մեջ մտնելը:
Արտակ Իգնատի Խչեյանին մեղավոր ճանաչել ՀՀ քրեական օրենսգրքի 266 հոդվածի 2-րդ մասի 2-րդ և 2.1 կետերով և դատապարտել ազատազրկման 5 /հինգ/ տարի 6 /վեց/ ամիս ժամկետով` առանց գույքի բռնագրավման, որը պետք է կրի ՀՀ ԱՆ համապատասխան ՔԿՀ-ում:
Պատժի սկիզբը հաշվել դատավճիռն ի կատար ածելու օրվանից:
Խափանման միջոց ստորագրություն չհեռանալու մասին թողնել անփոփոխ մինչև դատավճռի օրինական ուժի մեջ մտնելը:
Հովհաննես Սերգեյի Կարապետյանին մեղավոր ճանաչել ՀՀ քրեական օրենսգրքի 266 հոդվածի 2-րդ մասի 2-րդ և 2.1 կետերով և դատապարտել ազատազրկման 5 /հինգ/ տարի 6 /վեց/ ամիս ժամկետով` առանց գույքի բռնագրավման, որը պետք է կրի ՀՀ ԱՆ համապատասխան ՔԿՀ-ում:
Պատժի սկիզբը հաշվել դատավճիռն ի կատար ածելու օրվանից:
Խափանման միջոց ստորագրություն չհեռանալու մասին թողնել անփոփոխ մինչև դատավճռի օրինական ուժի մեջ մտնելը:
Թաթուլ Ժորայի Գրիգորյանին մեղավոր ճանաչել ՀՀ քրեական օրենսգրքի 266 հոդվածի 2-րդ մասի 2-րդ և 2.1 կետերով, 266 հոդվածի 1-ին մասով և 268 հոդվածի 2-րդ մասի 1-ին և 2-րդ կետերով և դատապարտել` ՀՀ քրեական օրենսգրքի 266 հոդվածի 2-րդ մասի 2-րդ և 2.1 կետերով` ազատազրկման 5 /հինգ/ տարի ժամկետով` առանց գույքի բռնագրավման, ՀՀ քրեական օրենսգրքի 266 հոդվածի 1-ին մասով` ազատազրկման 3 /երեք/ տարի ժամկետով, ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով` ազատազրկման 6 /վեց/ ամիս ժամկետով, ՀՀ քրեական օրենսգրքի 66 հոդվածի 4-րդ կետի կարգով, պատիժները մասնակի գումարելու միջոցով, վերջնական պատիժ նշանակել ազատազրկում 6 /վեց/ տարի 6 /վեց/ ամիս ժամկետով` առանց գույքի բռնագրավման, որը պետք է կրի ՀՀ ԱՆ համապատասխան ՔԿՀ-ում:
Պատժի սկիզբը հաշվել 2010թ.-ի հունիսի 17-ից:
Խափանման միջոց կալանավորումը թողնել անփոփոխ մինչև դատավճռի օրինական ուժի մեջ մտնելը:
Գործով իրեղեն ապացույց ճանաչված` 0.27 գրամ և 10.185 գրամ <<չորացված մարիխուանա>> տեսակի թմրամիջոցներն ու <<Կոկա-Կոլա>> գրառմամբ պիտակով, կանաբինոիդների և թմրալկոլոիդ տետրեհիդրոկաննաբինոլի հետքերով պոլիմերային տարան, որոնք գտնվում են քրեական գործում, թողնել սույն քրեական գործի անջատված մասի հետ:
Դատավճիռը կարող է բողոքարկվել ՀՀ Վերաքննիչ քրեական դատարանին հրապարակման օրվանից մեկամսյա ժամկետում` բացառությամբ ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:




ԴԱՏԱՎՈՐ՝ Կ.ՂԱԶԱՐՅԱՆ