Գործ Հ ԵԿԴ 0299/01/10

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Ք.Երևան 02 դեկտեմբերի 2010թ.

ԵՐԵՎԱՆԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ
ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆԸ
ՆԱԽԱԳԱՀՈՂ ԴԱՏԱՎՈՐ` Կ.ՂԱԶԱՐՅԱՆ
Քարտուղարությամբ` Է. Ավետիսյանի
ՄԱՍՆԱԿՑՈՒԹՅԱՄԲ`
Մեղադրող` Ա.Գալստյանի
Պաշտպան՝ Գ. Բոյախանջյանի
Թարգման` Ա. Խանիկյանի
Դռնբաց դատական նիստում արագացված դատաքննության կարգով քննության առավ քրեական գործն ըստ մեղադրանքի`
Արմեն Ռոմիկի Ավագյանի,ծնված 19.01.1974թ. ք. Բաքու,
հայ,ՀՀ քաղաքացի,ֆիզիկապես վատառողջ,ութամյա կրթությամբ,
ամուսնացած, խնամքին 2 անձ, չի աշխատում ,
նախկինում դատված` 1. Կրասնոդարի շրջանի դատարանի
29.11.2002թ. դատավճռով ՌԴ քրեական օրենսգրքի 228 հոդվածի
1- ին մասով ազատազրկման 1/մեկ/ տարի 6 /վեց/ ամիս
ժամկետով, 04.03.04թ. ազատվել է պատիժը լրիվ կրելով,
դատվածությունը մարված, Երևանի Կենտրոն և Նորք-Մարաշ
վարչական շրջանների ընդհանուր իրավասության դատարանի
27.05.2010թ. որոշմամբ ՀՀ քրեական օրենսգրքի 177 հոդվածի 1-ին
մասով քրեական գործի վարույթը նրա նկատմամբ
կարճվել է ՀՀ քր. դատ. օրենսգրքի 183 հոդվածի 1-ին մասի
համաձայն, բնակվում է ք. Երևան, Մասիսի փողոց, 99/3շենք,բն.24 Որպես խափանման միջոց ընտրվել է ստորագրություն չհեռանալու մասին:
Մեղադրվում է ՀՀ քրեական օրենսգրքի 34-176 հոդվածի 1-ին մասով:
Քրեական գործը հարուցվել է 23.10.2010թ. ՀՀ Ոստիկանության ՔԳՎ Երևան քաղաքի ՔՎ Կենտրոնականի քննչական բաժնի կողմից:
Ամբաստանյալ Արմեն Ավագյանին մեղադրանք է առաջադրվել այն բանի համար, որ նա, ուրիշի գույքի բացահայտ հափշտակություն կատարելու դիտավորությամբ, 2010թ. հոկտեմբերի 23-ին, ժամը 12:00 սահմաններում Երևան քաղաքի Աբովյան և Իսահակյան փողոցների խաչմերուկի հարևանությամբ գտնվող կանգառում, թիվ 45 երթուղուն պատկանող միկրոավտոբուսից իջնելուց անմիջապես հետո Աննա Հայթայանի պայուսակի կողային գրպանից փորձել է բացահայտ հափշտակել վերջինիս պատկանող` 55 000 դրամ ընդհանուր արժողությամբ <<Սամսունգ U-8000>> մոդելի բջջային հեռախոսը, արհեստական սև գույնի կաշվից պատրաստված դրա պատյանը, 1200 դրամ արժողությամբ 093 88-21-31 համարի կանխավճարային քարտը և դիմել փախուստի` վազելով դեպի Իսահակյան փողոցի կողմը, սակայն հանցագործությունն ավարտին չի հասցրել իր կամքից անկախ հանգամանքներով, քանի որ կանգառից շուրջ 90 մետր հեռավորության վրա բռնվել է ոստիկանության աշխատակիցների կողմից:
Քրեական գործը մեղադրական եզրակացությամբ ուղարկվել է դատարան 11.11.2010թ.-ին:
Մինչև դատաքննությունն սկսվելն ամբաստանյալ Արմեն Ավագյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է մեղադրանքի հետ, միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված կարգով դատաքննությունն անցկացնելու հետևանքները:
Դատարանը համոզվելով, որ առկա են ՀՀ քրեական դատավարության օրենսգրքի 375-1 և 375-2 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արմեն Ավագյանը կատարել է ՀՀ քրեական օրենսգրքի 34-176 հոդվածի 1-ին մասով նախատեսված արարք, որի համար պետք է ենթարկվի քրեական պատասխանատվության և պատժի:
Ամբաստանյալ Արմեն Ավագյանի նկատմամբ պատիժ նշանակելիս, պատժի տեսակն ու չափը որոշելիս, դատարանը հաշվի է առնում նրա կատարած հանցագործության հանրության համար վտանգավորության աստիճանն ու բնույթը,նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Որպես անձը բնութագրող հանգամանքներ դատարանը հաշվի է առնում այն, որ նա տվել է խոստովանական ցուցմունքներ, զղջում է կատարածի համար, դրական է բնութագրվում բնակության վայրից, վատառողջ է` տառապում է <ազդր-ծնկափոսային սեգմենտի ֆլեբոթրոմբոզ աջից> ախտորոշմամբ:
Որպես մեղմացնող հանգամանք դատարանը արձանագրում է այն, որ ամբաստանյալը իր խնամքի տակ ունի մինչև 14 տարեկան մեկ երեխա:
Ծանրացնող հանգամանքներ դատարանը չի արձանագրում:
Տուժողը քաղաքացիական հայցի պահանջ չի ներկայացրել:
Քննության առնելով ամբաստանյալի նկատմամբ ընտրված խափանման միջոցի հարցը` դատարանը գտավ, որ այն պետք է թողնել անփոփոխ մինչև դատավճռի օրինական ուժի մեջ մտնելը:
Գործով իրեղեն ապացույց ճանաչված <<Սամսունգ U-8000>> մոդելի բջջային հեռախոսը` արհեստական կաշվից պատրաստված սև գույնի պատյանով և 093 88-21-31 համարի կանխավճարային քարտով` ի պահ հանձնված տուժող Աննա Հայթայանին, պետք է թողնել նրան ի տնօրինություն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 375-3 հոդվածներով, դատարանը

Վ Ճ Ռ Ե Ց

Արմեն Ռոմիկի Ավագյանին մեղավոր ճանաչել ՀՀ քրեական օրենսգրքի 34-176 հոդվածի 1-ին մասով և դատապարտել ազատազրկման 6 /վեց/ ամիս ժամկետով, որը պետք է կրի ՀՀ ԱՆ համապատասխան ՔԿՀ-ում:
Պատժի սկիզբը հաշվել դատավճիռն ի կատար ածելու օրվանից:
Խափանման միջոց` ստորագրություն չհեռանալու մասին, թողնել անփոփոխ մինչև դատավճռի օրինական ուժ ստանալը:
Գործով իրեղեն ապացույց ճանաչված <<Սամսունգ U-8000>> մոդելի բջջային հեռախոսը` արհեստական կաշվից պատրաստված սև գույնի պատյանով և 093 88-21-31 համարի կանխավճարային քարտով` ի պահ հանձնված տուժող Աննա Հայթայանին, թողնել նրան ի տնօրինություն:
Դատավճիռը կարող է բողոքարկվել ՀՀ Վերաքննիչ քրեական դատարանին հրապարակման օրվանից մեկամսյա ժամկետում` բացառությամբ ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:




ԴԱՏԱՎՈՐ՝ Կ.ՂԱԶԱՐՅԱՆ