Գործ թիվ ԵԿԴ/ 0286/01/


ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը հետևյալ կազմով.

ՆԱԽԱԳԱՀՈՂ ԴԱՏԱՎՈՐ՝ Գ. Ավետիսյանի
ՔԱՐՏՈՒՂԱՐՈՒԹՅԱՄԲ՝ Հ. Հովհաննիսյանի

ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ՝ Զ.Ստեփանյանի
ՊԱՇՏՊԱՆ Կ.Աղաջանյանի


2011թ հունվարի 14-ին, դռնբաց դատական նիստում, դատարանում, քննեց քրեական գործն ըստ մեղադրանքի Սուրեն Գերասիմի Վարդանյանի` ծնված 1980թվականի
հոկտեմբերի 10-ին, Երևանում, ազգությամբ` հայ,
ՀՀ քաղաքացի, թերի միջնակարգ կրթությամբ,
ամուրի, խնամքին` ոչ ոք, նախկինում դատված` Կենտրոն և Նորք Մարաշ վարչական շրջանների ընդհանուր իրավասության դատարանի 2010թ. մարտի 30-ի դատավճռով` ՀՀ քրեական օրենսգրքի 268-րդ հոդվածի 2-րդ մասի 2-րդ կետով` դատապարտվել է ազատազրկման` մեկ տարի ժամկետով, նշանակվել է հարկադիր բուժում ` թմրամոլությունից, նշանակված պատժից՝ կրել է 10 ամիս 12 օր ժամկետով ազատազրկումը, մնացել է կրելու` մեկ ամիս 18 օր ժամկետով ազատազրկումը, պատիժը կրել է ՀՀ ԱՆ «Դատապարտյալների հիվանդանոց» քրեակատարողական հիմնարկում, ներկայումս ՀՀ ԱՆ «Նուբարաշեն» քրեակատարողական հիմնարկի կալանավոր է, հաշվառված և բնակվել է Երևան Արմենակյան փողոցի թիվ 81 տանը, կալանքի տակ է 2010թ. սեպտեմբերի 10-ից, մեղադրվում է ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերով, առաջադրված մեղադրանքում ամբաստանյալ Սուրեն Գերասիմի Վարդանյանն իրեն մեղավոր չճանաչեց։

ՀՀ քրեական օրենսգրքի 266-րդ հոդվածի 2-րդ մասի 2-րդ և 3-րդ կետերով և 268-րդ հոդվածի 2-րդ մասով թիվ 13138010 քրեական գործը հարուցվել է 2010թ. հուլիսի 28-ին ՀՀ ոստիկանության ՔԳՎ Երևանի ՔՎ Կենտրոնականի քննչական բաժնի կողմից։
Քննիչի 2010թ. սեպտեմբերի 1-ի որոշմամբ թիվ 13138010 քրեական գործով Ս.Վարդանյանի նկատմամբ 0.041 գրամ ընդհանուր քաշով «Ֆենոբարբիտալ» տեսակի հոգեմետ նյութ ապօրինի ձեռք բերելու և պահելու մասով քրեական հետապնդում չի իրականացվել` հանցակազմի բացակայության պատճառաբանությամբ։
Քննիչի քրեական գործից մաս անջատելու և առանձին վարույթում առանձնացնելու մասին 2010թ. հոկտեմբերի 25-ի որոշմամբ թիվ 13138010 քրեական գործից անջատվել և առանձին վարույթում առանձնացվել է Ս.Վարդանյանին ապօրինաբար խոշոր չափի` 0.225 գրամ «կոդեին» տեսակի թմրանյութը և 0.041 գրամ ընդհանուր քաշով «Ֆենոբարբիտալ» տեսակի հոգեմետ նյութը իրացրած անհայտ անձի վերաբերյալ մասը և շնորհվել 15103510 համարը։
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. հուլիսի 15-ի որոշմամբ Սուրեն Գերասիմի Վարդանյանի նկատմամբ նշանակված` թմրամոլության դեմ հարկադրական բուժումը դադարեցվել է։
Դատաքննությամբ և գործի տվյալներով դատարանը ապացուցված համարեց հետևյալը.
Ամբաստանյալ Ս. Վարդանյանը ՀՀ քրեական օրենսգրքի 268-րդ հոդվածի 2-րդ մասի 2-րդ կետով նախատեսված հանցագործություն կատարելու համար 2010թ. մարտի 30-ին Երևանի քաղաքի Կենտրոն և Նորք Մարաշ վարչական շրջանների ընդհանուր իրավասության դատարանի կողմից դատապարտվել է մեկ տարի ժամկետով ազատազրկման և պատիժը կրել ՀՀ ԱՆ «Դատապարտյալների հիվանդանոց» քրեակատարողական հիմնարկում։
Պատիժը կրելու ընթացքում` 2010թ հուլիսի 23-ին ժամը 17։30-ի սահմաններում ամբաստանյալ Ս. Վարդանյանը, գործով չպարզված անձից և հանգամանքներում իր գործածման համար առանց իրացնելու նպատակի կրկին անգամ ապօրինի ձեռք է բերել ու իր մոտ պահել ՀՀ ԱՆ «Դատապարտյալների հիվանդանոց» ՔԿՀ տարածք արտանետված խոշոր չափի` 0.225 գրամ կոդեին տեսակի թմրամիջոց, ինչը նույն ժամանակահատվածում հայտնաբերվել է նրա բերանի խոռոչում` նարկոլոգիական բաժանմունքի զբոսահրապարակում ՀՀ ԱՆ «Դատապարտյալների հիվանդանոց» ՔԿՀ-ի աշխատակիցների կողմից։
Վերոհիշյալ արարքը կատարելու համար ամբաստանյալ Սուրեն Գերասիմի Վարդանյանին մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերով։
Առաջադրված մեղադրանքում Սուրեն Գերասիմի Վարդանյանն իրեն մեղավոր չճանաչեց և ցուցմունք տվեց այն մասին, որ 2010թ հուլիսի 23-ին ժամը 17։30-ի սահմաններում, երբ գտնվել է ՀՀ ԱՆ «Դատապարտյալների հիվանդանոց» ՔԿՀ-ի նարկոլոգիական բաժանմունքի զբոսահրապարակում նկատել է, որ տարածք է նետվել խմորի փաթաթված գունդ։ Վերցրել է այն, սակայն խմորը բերանը չի տարել և պահել, որովհետև մեծ զանգված է եղել, չէր կարող բերանի մեջ տեղավորել։ Այդ խմորի թելը բերանով արձակել է, փողը վերցրել, իսկ մյուս ձեռքով խմորը տվել է ՔԿՀ աշխատակցին, վերջինս պահանջել է նաև գումարը։ Սակայն ինքը գումարը չի տվել, քանի որ կարծել է, որ դա դատապարտյալներից մեկինն է։ Տեղում քրեակատարողական հիմնարկի աշխտակիցները զննում են կատարել, ոչինչ չեն հայտնաբերել։ Իրեն մեկ ու կես, երկու ժամ պահել են հերթապահ մասում, հարցաքննել են։ Սոդա են խմեցրել, կարծելով, որ ինչ-որ բան է կուլ տվել։ Հետո իրեն հայտնել են, որ զբոսահրապարակից թմրանյութ են գտել։ Տեղյակ չէ, թե որտեղից է այդ զանգվածը հայտնվել, դրա մեջ ինչ է եղել։ Ինքը խմորի զանգվածը գումարի համար է վերցրել։ Չի հասցրել հաշվել, թե որքան է եղել գումարը, բայց 20.000-ոց արժեթուղթ է տեսել։ Նախաքննության ժամանակ է իմացել, որ 40.000 ՀՀ դրամ է եղել։ Ընդհանրապես թմրանյութ չի օգտագործել։ Քանի որ այդ ժամանակահատվածում հիվանդ է եղել։ Նարկոլոգիական բաժանմունքում բազմապիսի դեղահաբեր է օգտագործել և հնարավոր է, որ կոդեին պարունակող դեղահաբ օգտագործած լինի և դրա հետևանքով փորձագիտական եզրակացությունը նման արդյունք ցույց տա /քրեական գործ, էջ 178-180, 183-184, 185 դատական նիստի արձանագրություն/ ։
Ամբաստանյալ Սուրեն Գերասիմի Վարդանյանի պատճառաբանություններն անհիմն են, քրեական պատասխանատվությունից խուսափելու նպատակ են հետապնդում, նրան մեղսագրվող արարքը հիմնավորվում, իսկ բերած պատճառաբանությունները հերքվում են քրեական գործով ձեռք բերված ներքոհիշյալ ապացույցներով.
Ամբաստանյալ Սուրեն Վարդանյանը 2010թ. հուլիսի 23-ին բացատրության մեջ ընդունել է, որ ինքը 2010թ. հուլիսի 23-ին ժամը 17։30-ին նարկոլոգիական բաժանմունքի զբոսահրապարակում զբոսնելիս նկատել է գետնին ընկած փողով փաթեթավորված մի գնդաձև առարկա, այն գետնից վերցրել է, ցանկացել գնդից փողը պոկել, դժվարացել է ու փողը կապող թելը ցանկացել է ատամով պոկել։ Իրեն մոտեցել է հսկիչ Վիգեն Արևյանը` պահանջել է տալ այդ գունդը, սակայն ինքը չի ցանկացել այն վերջինիս հանձնել։ Այդ ընթացքում հասցրել, առանձնացրել է նշված գումարը և աննկատ դրել գոտկատեղը, իսկ մնացած զանգվածը տեսուչների պահանջով տվել է նրանց։ Հայտնել է նաև, որ չի իմացել, թե այդ փաթեթը և գումարը ում են պատկանել։ Այսինքն, ընդունել է, որ գետնից վերցրել է զբոսահրապարակ արտանետված խմորը և դրա մեջ գտնվող զանգվածը ու այն բերանին է մոտեցրել։ /քրեական գործ, էջ 7-9, դատական նիստի արձանագրություն/։
Վկա` ՀՀ ԱՆ «Դատապարտյալների հիվանդանոց» քրեակատարողական հիմնարկի հերթապահ խմբի աշխատակից` Վիգեն Ռոստոմի Արևյանի ցուցմունքներով, այն մասին որ 2010թ. հուլիսի 23-ին ժամը 17։30-ի սահմաններում նարկոլոգիական բաժանմունքի զբոսահրապարակում նկատել է նույն բաժանմունքի դատապարտյալ Սուրեն Վարդանյանին, ով նկատելով իրեն սկսել է անհանգիստ շարժումներ անել, ինչը կասկածելի է թվացել։ Մոտեցել է և տեսել, որ զբոսահրապարակի` թոքախտաբանական բաժանմունքին կից պատի մոտ ընկած է ինչ-որ զանգված։ Դատապարտյալ Ս. Վարդանյանին նախազգուշացրել է, որպեսզի վերջինս չվերցնի այդ զանգվածը, մոտ չգնա։ Հակառակ դրան Ս. Վարդանյանը հապճեպ մոտեցել է, վերցրել այդ զանգվածը և գցել բերանը։ Անմիջապես մոտեցել է, թիկունքից բռնել Ս.Վարդանյանի թևերից և պահանջել որպեսզի բերանի պարունակությունը ցած գցի, սակայն Ս. Վարդանյանը չի կատարել իր պահանջը և իրեն թափ տալով փորձել է ազատվել։ Այդ ժամանակ իրենց է մոտեցել տեսուչ Միքայել Մալոյանը, ով Սուրեն Վարդանյանի բերանից քաշելով հանել է կասկածելի զանգվածը, որը փաթեթավորված է եղել անգույն պոլիէթիլենային թաղանթով, որը բերանից հանելու ընթացքում պատռվել է և դրա պարունակությունը` մի քանի խմորանման կտորներ և մեկ մուգ շագանակագույն զանգված, թափվել են գետնին։ Այդ ժամանակ իրենց են մոտեցել նաև հերթապահ խմբի աշխատակիցներ Նորիկ Այվազյանը և Կարեն Միրզոյանը, որոնց օգնությամբ, խուսափելով մյուս դատապարտյալների հետ հնարավոր ընդհարումից, Ս. Վարդանյանին անմիջապես դուրս են բերել զբոսահրապարակից, կողպել զբոսահրապարակի մուտքի դուռը և նրան ուղեկցել հերթապահ մաս։ Զբոսահրապարակը փակելուց հետո, մինչև զննություն կատարելը ոչ ոք այնտեղ մուտք չի գործել և մտնել չէր կարող։ Հերթապահ մաս տանելու ճանապարհին Ս. Վարդանյանը տաբատի ետևի գրպանից հանել է և իր հիվանդասենյակի մուտքի բաց դռան ուղղությամբ նետել ինչ-որ զանգված, որը տեսուչ Կարեն Միրզոյանը վերցրել է, եղել է 40.000 ՀՀ դրամ` 1 հատ 20.000 ՀՀ դրամանոց, 1 հատ 10.000 ՀՀ դրամանոց և 2 հատ 5 հազար ՀՀ դրամանոց արժեթղթերով։ Այնուհետև զննվել է նարկոլոգիական բաժանմունքի զբոսահրապարակը, որտեղից հայտնաբերվել են Ս. Վարդանյանի բերանից հանված կասկածելի զանգվածից գետնին թափված խմորանման կտորները և մուգ շագանակագույն մեկ հատ զանգվածը, որոնք հերթապահ մասում Ս. Վարդանյանի ներկայությամբ զննվել, կշռվել և փաթեթավորվել են։ Հայտնաբերված զանգվածը ինչպես հետագայում է պարզվել իրենից ներկայացրել է «կոդեին» տեսակի թմրամիջոց և «ֆենոբարբիտալ» տեսակի հոգեմետ նյութ։
Վիգեն Արևյանը իր ցուցմունքը պնդել է մեղադրյալ Սուրեն Գերասիմի Վարդանյանի հետ առերես հարցաքննության ժամանակ /քրեական գործ, էջ 2, 39-41, 178-180, դատական նիստի արձանագրություն/։
Վկա` ՀՀ ԱՆ «Դատապարտյալների հիվանդանոց» քրեակատարողական հիմնարկի հերթապահ խմբի աշխատակից` Միքայել Սամվելի Մալոյանի բացատրությամբ, ցուցմունքներով, այն մասին, որ 2010թ. հուլիսի 23-ին ժամը 17։30-ի սահմաններում նարկոլոգիական բաժանմունքից լսել է աղմուկի ձայներ և անմիջապես գնացել այնտեղ։ Նարկոլոգիական բաժանմունքի զբոսահրապարակի միջնամասում տեսել է տեսուչ Վիգեն Արևյանին, ով թիկունքի կողմից բռնել էր նույն բաժանմունքի դատապարտյալ Սուրեն Գերասիմի Վարդանյանին, ով իրեն թափ տալով փորձել է ազատվել։ Զբոսահրապարակում եղել են նաև այլ դատապարտյալներ, որոնք իր պահանջով գնացել են իրենց հիվանդասենյակները։ Այնուհետև մոտեցել է տեսուչ Վ. Արևյանին և դատապարտյալ Ս. Վարդանյանին, վերջինիս բերանում տեսել անգույն պոլիէթիլենային թաղանթով փաթեթավորված զանգված, որի պատճառով Ս. Վարդանյանը չի կարողացել խոսել և հավանաբար մեծ լինելու պատճառով չի կարողացել կուլ տալ։ Բռնելով Ս. Վարդանյանի ծնոտը և սահմանափակելով գլխի շարժումները նրա բերանից հանել է տվյալ զանգվածը, որի ընթացքում Ս. Վարդանյանը ատամներով փորձել է կծել, կուլ տալ դրա պարունակությունը, ինչի հետևանքով պոլիէթիլենային թաղանթը պատռվել է և զանգվածը թափվել գետնին` մի քանի խմորի կտորներ և մեկ մուգ շագանակագույն փոքր զանգված։ Իրենց են մոտեցել նաև հերթապահ խմբի աշխատակիցներ Նորիկ Այվազյանը և Կարեն Միրզոյանը, որոնց օգնությամբ Ս. Վարդանյանին դուրս են բերել զբոսահրապարակից, կողպել զբոսահրապարակի մուտքի դուռը և ուղեկցել հերթապահ մաս։ Զբոսահրապարակը փակելուց հետո, մինչև զննություն կատարելը ոչ ոք այնտեղ մուտք չի գործել և մտնել չէր կարող։ Հերթապահ մաս տանելու ճանապարհին Ս. Վարդանյանը տաբատի հետևի գրպանից հանել և իր հիվանդասենյակի մուտքի բաց դռան ուղղությամբ նետել է 40.000 ՀՀ դրամ գումար, որը վերցվել է տեսուչների կողմից։ Օպերատիվ բաժնի աշխատակիցներ Դավիթ Եղյանի և Վաղինակ Մինասյանի հետ գնացել է նարկոլոգիական բաժանմունքի զբոսահրապարակ, որտեղ կատարված զննությամբ հայտնաբերել են Ս. Վարդանյանի բերանից հանված և գետնին թափված թվով 4 հատ խմորի կտորներ և մեկ հատ մուգ շագանակագույն զանգված, որոնք ներկայացվել են հերթպահ մաս, Ս. Վարդանյանի ներկայությամբ կշռել և փաթեթավորել։ Պարզվել է, որ Ս. Վարդանյանի մոտից հայտնաբերված զանգվածը իրենից ներկայացնում է «կոդեին» տեսակի թմրամիջոց և «ֆենոբարբիտալ» տեսակի հոգեմետ նյութ։
Միքայել Մալոյանը իր ցուցմունքը պնդել է մեղադրյալ Սուրեն Գերասիմի Վարդանյանի հետ առերես հարցաքննության ժամանակ /քրեական գործ, էջ 15-16, 35-38, 183-184, դատական նիստի արձանագրություն/։
Վկա` ՀՀ ԱՆ «Դատապարտյալների հիվանդանոց» քրեակատարողական հիմնարկի հերթապահ խմբի աշխատակից` Կարեն Հենրիկի Միրզոյանի ցուցմունքներով, այն մասին, որ 2010թ. հուլիսի 23-ին, ժամը 17։30-ի սահմաններում հերթապահ խմբի աշխատակից Նորիկ Այվազյանի հետ միասին գնացել են նարկոլոգիական բաժանմունքի զբոսահրապարակ, որտեղ տեսել են դատապարտյալ Սուրեն Գերասիմի Վարդանյանին, տեսուչներ Վ. Արևյանին և Մ. Մալոյանին, վերջինիս ձեռքում եղել է պոլիթիլենային անգույն թաղանթով պատառոտված փաթեթ։ Մ. Մալոյանը տեղեկացրել է, որ այդ փաթեթը հանել է դատապարտյալ Ս. Վարդանյանի բերանից։ Փաթեթը Մ. Մալոյանը տվել է իրեն, այն ամբողջովին եղել է պատառոտված և խոնավ վիճակում։ Մյուս դատապարտյալների հետ ընդհարումից խուսափելու համար դատապարտյալ Ս. Վարդանյանին դուրս են բերել զբոսահրապարակից և ուղեկցել հերթապահ մաս։ Զբոսահրապարակի մուտքի դուռը կողպել են, քանի որ տեսուչներ Մ. Մալոյանը և Վ. Արևյանը տեղեկացրել են, որ դատապարտյալ Ս. Վարդանյանի բերանից կասկածելի փաթեթը հանելիս դրա պարունակությունը թափվել է գետնին։ Զբոսահրապարակը փակելուց հետո, մինչև զննություն կատարելը ոչ ոք այնտեղ մուտք չի գործել և մտնել չէր կարող։ /քրեական գործ, էջ 101-102, դատական նիստի արձանագրություն/։
Վկա` ՀՀ ԱՆ «Դատապարտյալների հիվանդանոց» քրեակատարողական հիմնարկի օպերատիվ բաժնի աշխատակից` Դավիթ Ներսեսի Եղյանի ցուցմունքներով, այն մասին, որ 2010թ. հուլիսի 23-ին, ժամը 17։30-ի սահմաններում ՔԿ հիմնարկի հերթապահ մասից տեղեկացել է, որ նարկոլոգիական բաժանմունքի զբոսահրապարակում նույն բաժանմունքի դատապարտյալ Սուրեն Գերասիմի Վարդանյանի բերանից հերթապահ խմբի աշխատակիցներ Միքայել Մալոյանը և Վիգեն Արևյանը հայտնաբերել են կասկածելի փաթեթ։ Օպերատիվ բաժնի աշխատակից Վաղինակ Մինասյանի և տեսուչներ Վ. Արևյանի, Մ. Մալոյանի հետ գնացել է նարկոլոգիական բաժանմունքի զբոսահրապարակ, բանալիով բացել են մուտքի դուռը և կատարել զննություն, որի ընթացքում հայտնաբերել են խմորանման կտորներ և մուգ շագականակագույն զանգված, որը բերվել է հերթապահ մաս, կշռվել, փաթեթավորվել և կնիքվել /քրեական գործ, էջ 122-123, դատական նիստի արձանագրություն/։
Վկաներ` ՀՀ ԱՆ «Դատապարտյալների հիվանդանոց» ՔԿՀ նարկոլոգիական բաժանմունքի դատապարտյալներ, Արմեն Աղասի Մկրտչյանի և Դավիթ Ռադիկի Խոջաբեկյանի բացատրություններով և ցուցմունքներով, այն մասին, որ 2010թ. հուլիսի 23-ին ժամը 17։30-ի սահմաններում նարկոլոգիական բաժանմունքի զբոսահրապարակից լսել են աղմուկի ձայներ։ Մոտենալով նկատել են տեսուչ Վիգեն Արևյանին, ով թիկունքից բռնել և դատապարտյալ Սուրեն Գերասիմի Վարդանյանից պահանջել է, որպեսզի վերջինս բերանից ցած գցի դրանում եղած զանգվածը։ Սուրեն Վարդանյանը ամբողջ մարմնով թափահարել է իրեն և ցանկացել տեսուչ Վ. Արևյանից ազատվել։ Այդ ժամանակ զբոսահրապարակ են եկել այլ տեսուչներ, ովքեր պահանջել են դատապարտյալներին զբոսահրապարակից դուրս գալ։ Կատարել են տեսուչների պահանջը և հեռացել դեպքի վայրից։ Իրենց հեռանալուց հետո ոչ ոք զբոսահրապարակ չի մտել և մտնել չէր կարող։ Նրանք ցանկանալով հովանավորության տակ վերցնել իրենց հետ պատիժ կրող ամբաստանյալ Ս.Վարդանյանին, նշել են, որ զբոսահրապարակում պոլիթիլենային թաղանթով նյութը ՔԿՀ-ի աշխատակիցները գտել են ամբաստանյալին բռնելու վայրից հեռու։ Այդ ցուցմունքները դատարանը համարում է անարժանահավատ, վերջիններս նման ցուցմունքներ տալով նպատակ են հետապնդում հովանավորության տակ վերցնել իրենց հետ պատիժ կրող ամբաստանյալ Ս. Վարդանյանին։ /քրեական գործ, էջ 17-20, 21-23, 187-189, 195-196, դատական նիստի արձանագրություն/։
Վկա` ՀՀ ԱՆ «Դատապարտյալների Հիվանդանոց» ՔԿՀ-ի նարկոլոգիական բաժանմունքի պետ Գրիգոր Գրիգորյանի ցուցմունքով այն մասին, որ ամբաստանյալը 10.05.2010թ. թմրամոլության դեմ բուժում է ստացել մինչև 29.06.2010թ.« որի ընթացքում նա որևէ թմրանյութ պարունակող դեղահաբ չի ստացել։ Իրենք թմրամիջոցի մասնիկներ պարունակող դեղահաբեր չեն ստանում։ Դատապարտյալի դիմումի հիման վրա հնարավոր է նրան թույլ տան« որ հարազատները նրան դեղահաբեր բերեն։ Եթե այդպիսի դեպք է լինում« դատապարտյալի հիվանդության պատմագրի մեջ նշվում է։ Ամբաստանյալ Սուրեն Վարդանյանի հիվանդության պատմագրի մեջ նման նշում չկա։ Հետևաբար դրսից դեղահաբ նրան չի փոխանցվել։ Վերջինիս ցուցմունքով հերքվում է ամբաստանյալ Ս.Վարդանյանի այն պատճառաբանությունը, թե նարկոլոգիական բաժանմունքում բազմապիսի դեղահաբեր է օգտագործել և հնարավոր է, որ կոդեին պարունակող դեղահաբ օգտագործած լինի և դրա հետևանքով փորձագիտական եզրակացությունը նման արդյունք ցույց տար / դատական նիստի արձանագրություն/։
Քննչական փորձարարություն կատարելու մասին արձանագրությամբ, համաձայն որի ՀՀ ԱՆ «Դատապարտյալների հիվանդանոց» ՔԿՀ հերթապահ խմբի աշխատակից, վկա Վիգեն Արևյանը մատնացույց է արել ՔԿՀ նարկոլոգիական բաժանմունքի զբոսահրապարակի այն վայրը, որտեղ տեսել է ամբաստանյալ Սուրեն Գերասիմի Վարդանյանին կասկածելի զանգվածը գետնից վերցնելիս և բերանը գցելիս, միաժամանակ Վ. Արևյանը մատնացույց է արել զբոսահրապարակի այն հատվածը, որտեղ ամբաստանյալ Ս. Վարդանյանը չի ենթարկվել իրեն և տեսուչ Միքայել Մալոյանին, փորձել է մարմնով իրեն թափ տալով ազատվել։ Ըստ Վիգեն Արևյանի հենց նշված վայրից է հայտնաբերվել ամբաստանյալ Ս.Վարդանյանի բերանից թափված կասկածելի զանգվածի պարունակությունը /քրեական գործ, էջ 141-143/
Դատաքիմիական փորձաքննության թիվ 24431005 եզրակացությամբ, համաձայն որի փորձաքննության ներկայացված 0,58 գրամ մաքուր քաշով, գորշ գույնի, պինդ զանգվածը հանդիսանում է տնայնագործական պայմաններում դեղերից, հավանաբար «սեդալգին-Նեո» տեսակի, քիմիական եղանակով ակտիվ բաղադրատարրերի լուծամզմամբ ստացված զանգված, որը իր բաղադրության մեջ պարունակում է 0.041 գրամ «Ֆենոբարբիտալ» տեսակի հոգեմետ նյութ և 0,225 գրամ «կոդեին» տեսակի խոշոր չափի թմրամիջոց /քրեական գործ, էջ 24-27/
Տոքսիկոքիմիական փորձաքննության թիվ 10-2160 եզրակացությամբ, համաձայն որի Սուրեն Գերասիմի Վարդանյանից վերցված մազի փորձանմուշի մեջ հայտնաբերվել են ափիոնի խմբին պատկանող թմրամիջոցի թմրալկալոիդներ։ Նշված փորձաքննության եզրակացությամբ հաստատվում է, որ դատավճռով նշանակված հարկադիր բուժման գործընթացի ժամանակ ամբաստանյալ Ս.Վարդանյանը հանդիսացել է թմրանյութ օգտագործող և հերքվում է նրա պատճառաբանությունները, որ առհասարակ թմրանյութ չի օգտագործել/քրեական գործ, էջ 125-126/
Ապացույց ճանաչված այլ փաստաթուղթ հանդիսացող դատապարտյալ Ս. Վարդանյանի կողմից 2010թ. հուլիսի 23-ին նարկոլոգիական բաժանմունքի զբոսահրապարակում անհայտ փաթեթի մի մասը կուլ տալու և մնացած կտորները հայտնաբերելու, ինչպես նաև դատապարտյալ Սուրեն Գերասիմի Վարդանյանի մոտից առգրավված զանգվածների կտորների զննման, փաթեթավորման և կնիքման մասին արձանագրություններով, համաձայն որոնց ամբաստանյալ Ս. Վարդանյանը 2010թ. հուլիսի 23-ին ժամը 17։30-ի սահմաններում գտնվել է ՀՀ ԱՆ «Դատապարտյալների հիվանդանոց» ՔԿՀ նարկոլոգիական բաժանմունքի զբոսահրապարակում, որտեղ հակառակ ՔԿՀ հերթապահ խմբի տեսուչ Վիգեն Արևյանի նախազգուշացման, կռացել և գետնից վերցրել է սպիտակ գույնի ձվաձև մի փաթեթ և գցելով բերանը` ցանկացել կուլ տալ։ Տեսուչներ Վիգեն Արևյանը և Միքայել Մալոյանը, բռնելով ամբաստանյալ Սուրեն Վարդանյանի թևերից, նրա բերանից հանել են տվյալ կասկածելի զանգվածը, որը այդ ընթացքում պատառոտվել է, իսկ դրա պարունակությունը թափվել գետնին։ Խուսափելու համար նարկոլոգիական բաժանմունքի մյուս դատապարտյալների հետ ընդհարումից` ՔԿՀ հերթապահ խմբի տեսուչները ամբաստանյալ Ս. Վարդանյանին դուրս են բերել զբոսահրապարակից, կողպել մուտքի դուռը և Ս. Վարդանյանին տարել հերթապահ մաս, որտեղ գնալու ճանապարհին վերջինս տաբատի գրպանից հանել և իր հիվանդասենյակի ուղղությամբ նետել է 40.000 ՀՀ դրամ գումար, որը տեսուչների կողմից նույն պահին վերցվել և ներկայացվել է հերթապահ մաս։ Ամբաստանյալ Ս. Վարդանյանին հերթապահ մաս տանելուց հետո, նարկոլոգիական բաժանմունքի զբոսահրապարակը զննվել է, որտեղից հայտնաբերվել են ամբաստանյալ Ս. Վարդանյանի բերանից հանված կասկածելի զանգվածից գետնին թափված մեկ հատ մուգ շագանակագույն փոքր զանգվածը` 0.6 գրամ քաշով և պոլիէթիլենային սպիտակ թաղանթով զանգվածը` 26 գրամ ընդհանուր քաշով, որոնք փաթեթավորվել և կնիքվել են։ Հերթապահ մասում ամբաստանյալ Ս. Վարդանյանը հրաժարվել է որևէ բուժօգնությունից` պատճառաբանելով, որ իր ինքնազգացողությունը լավ է, միաժամանակ հայտարարել, որ կատարել է դատապարտյալին «վայել արարք»` վերցնելով արտանետված առարկան։ /քրեական գործ, էջ 3-5/
Պաշտպանական կողմի այն պատճառաբանություննները, որ Ս.Վարդանյանի նկատմամբ ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերով քրեական հետապնդումը պետք է դադարեցնել և նրան արդարացնել, նկատի ունենալով, որ մեղադրյալը առաջադրված մեղադրանքը չի ընդունել, որ հայտնաբերված խմորի մեջ թմրանյութի պարունակություն չի հայտնաբերվել, որ դեպքի վայրում զննությունը կատարվել և թմրանյութը հայտնաբերվել է ամբաստանյալին այնտեղից տանելուց տևական ժամանակ հետո, որ դեպքի վայրում ամբաստանյալից բացի եղել են նաև այլ դատապարտյալներ և չի բացառվում, որ թմրանյութը նրանցից որևէ մեկը գցած լինի, որ ըստ վկա Դավիթ Ռադիկի Խոջաբեկյանի թմրանյութը հայտնաբերվել է ամբաստանյալի հետ կապված դեպքի վայրից բավականին հեռու, որ ամբաստանյալը ուղղակի դիտավորություն չի ունեցել, մեղադրանքը հիմնված է անթույլատրելի ապացույցների վրա, մասնավորապես մեղադրանքի հիմքում դրվել են Ս.Վարդանյանի մոտից առգրավված զանգվածի զննման, փաթեթավորման և կնքման մասին արձանագրությունները, որոնք կազմվել են սահմանված կարգի խախտմամբ, քանի որ կատարվել են առանց ընթերականների մասնակցության և այդ անթույլատրելի ապացույցի հիման վրա տրված 2010թ. հուլիսի 27-ի դատանյութագիտական թիվ 24431005 եզրակացությունը` հիմնավոր չէ։
Դատապարտյալ Սուրեն Գերասիմի Վարդանյանի մոտից առգրաված զանգվածների կտորների զննման, փաթեթավորման և կնիքման մասին արձանագրությունները կազմվել են ՀՀ Կառավարության 2006թ. օգոստոսի 3-ի թիվ 1543-Ն ՀՀ Արդարադատության նախարարության քրեակատարողական ծառայության` կալանավորվածներին պահելու վայրերի և ուղղիչ հիմնարկների ներքին կանոնակարգը հաստատելու մասին որոշման 10-րդ գլխի 92-րդ կետի համաձայն` ... իրերի զննման ժամանակ առգրավման ենթակա առարկաների հայտնաբերման դեպքում կազմվում է արձանագրություն արգելված իրերի հայտնաբերման և առգրավման մասին։ Արձանագրությունը ստորագրվում է խուզարկություն կատարող անձանց և խուզարկության ենթարկված անձի կամ զննման ենթարկված իրեր ունեցող անձի կողմից։ «Դատապարտյալների հիվանդանոց» ՔԿՀ նարկոլոգիական բաժանմունքի զբոսահրապարակը զննվել է, որտեղից հայտնաբերվել են դատապարտյալ Ս. Վարդանյանի բերանից հանված կասկածելի զանգվածից գետնին թափված մեկ հատ մուգ շագանակագույն փոքր զանգվածը` 0.6 գրամ քաշով և պոլիէթիլենային սպիտակ թաղանթով զանգվածը` 26 գրամ ընդհանուր քաշով, որոնք փաթեթավորվել և կնիքվել են, որի մասին կազմվել է արձանագրություն։ Դատապարտյալ Սուրեն Գերասիմի Վարդանյանի մոտից առգրաված զանգվածների կտորների զննման, փաթեթավորման և կնիքման մասին արձանագրությունը ստորագրվել է զննություն կատարող անձանց և զննման ենթարկված իրեր ունեցող անձի` դատապարտյալ Սուրեն Գերասիմի Վարդանյանի կողմից, վերջիններս ստորագրել են նաև կնիքների և ծրարների վրա։ Այսինքն, դատապարտյալ Սուրեն Գերասիմի Վարդանյանի մոտից առգրաված զանգվածների կտորների զննման, փաթեթավորման և կնիքման մասին արձանագրությունը կազմվել է ՀՀ Կառավարության 2006թ. օգոստոսի 3-ի թիվ 1543-Ն ՀՀ Արդարադատության նախարարության քրեակատարողական ծառայության` կալանավորվածներին պահելու վայրերի և ուղղիչ հիմնարկների ներքին կանոնակարգով սահմանված կարգով։ Նկատի ունենալով վերը նշվածը` դատարանը դատապարտյալ Սուրեն Գերասիմի Վարդանյանի մոտից առգրաված զանգվածների կտորների զննման, փաթեթավորման և կնիքման մասին արձանագրությունը համարում է թույլատրելի ապացույց, հետևաբար թույլատրելի ապացույց է նաև դատաքիմիական փորձաքննության 2010թ. հուլիսի 27-ի թիվ 24431005 փորձագիտական եզրակացությունը։ Պաշտպանական կողմի մյուս պատճառաբանությունները ևս հերքվել են վկաների ցուցմունքներով և մյուս ապացույցներով։ Բերանից ստիպողաբար թմրանյութը հանելու դատաքննությամբ հաստատված հանգամանքը դատարանին բերում է համոզման, որ ամբաստանյալ Ս.Վարդանյանը հաստատապես իմացել է, որ գետնից թմրանյութ է վերցրել և պահել բերանում ու այդպիսով ցանկացել է թաքցնել այն, որը չի հաջողվել։
Դատարանը, վերլուծելով և գնահատելով քրեական գործի նյութերը, ապացուցված է համարում, որ ամբաստանյալ Սուրեն Գերասիմի Վարդանյանն ապօրինաբար թմրամիջոցներ պահելու համար դատապարտված լինելով, պատիժը ՔԿ հիմնարկում կրելու ընթացքում առանց իրացնելու նպատակի կրկին անգամ ապօրինի ձեռք է բերել և պահել խոշոր չափերի հասնող` 0.225 գրամ «կոդեին» տեսակի թմրամիջոց։
Սուրեն Գերասիմի Վարդանյանի կատարված արարքը համապատասխանում է ՀՀ քրեական օրենսգրքի 268-րդ հոդվածի 2-րդ մասի 1-ին և 2-րդ կետերին։
Դատարանը պատիժ սահմանելիս հաշվի է առնում Սուրեն Գերասիմի Վարդանյանի կատարած հանցանքի` առանց իրացնելու նպատակի, կրկին անգամ, խոշոր չափերի թմրամիջոց ապօրինի պահելու` հանրության համար վտանգավորության աստիճանը և բնույթը ու ամբաստանյալ Ս. Վարդանյանի անձնավորությունը։
Դատարանը որպես պատասխանատվությունը և պատիժը մեղմացնող հանգամանք դիտում է այն, որ Սուրեն Գերասիմի Վարդանյանը երիտասարդ է։
Պատասխանատվությունը և պատիժը ծանրացնող հանգամանքներ չկան։
Կատարած արարքների համար ամբաստանյալ Սուրեն Գերասիմի Վարդանյանը ենթակա է պատժի ազատազրկման ձևով նկատի ունենալով, որ նա հանցանքը կատարել է նմանատիպ հանցագործության համար դատավճռով նշանակված պատիժը կրելու ընթացքում` քրեակատարողական հիմնարկում։
Դատարանը գտավ, որ ամբաստանյալ Սուրեն Գերասիմի Վարդանյանի նկատմամբ ընտրված խափանման միջոց` կալանավորումը պետք է թողնել անփոփոխ` մինչև դատավճռի օրինական ուժի մեջ մտնելը։
Իրեղեն ապացույց ճանաչված 0.041 գրամ «Ֆենոբարբիտալ» տեսակի հոգեմետ նյութը և 0,225 գրամ «կոդեին» տեսակի թմրամիջոցը` պետք է հանձնել քրեական հետապնդում իրականացնող մարմնի` ՀՀ ոստիկանության քննչական գլխավոր վարչության Երևան քաղաքի վարչության Կենտրոնականի քննչական բաժնի տնօրինությանը` սույն գործից անջատված թիվ 15103510 քրեական գործին կցելու համար։
ՀՀ քրեական օրենսգրքի 67-րդ հոդվածի 1-ին մասի համաձայն, եթե դատավճիռ կայացնելուց հետո, բայց մինչև պատիժ կրելը դատապարտյալը նոր հանցանք է կատարել, ապա դատարանը նոր դատավճռով նշանակված պատժին լրիվ կամ մասնակիորեն գումարում է նախորդ դատավճռով նշանակված պատժի չկրած մասը։
Ամբաստանյալ Սուրեն Գերասիմի Վարդանյանը վերջին դատավճռով նշանակված պատժից՝ մեկ տարի ժամկետով ազատազրկումից, կրել է 10 ամիս 12 օր ժամկետով ազատազրկումը, մնացել է կրելու` մեկ ամիս 18 օր ժամկետով ազատազրկումը, որը ՀՀ քրեական օրենսգրքի 67-րդ հոդվածի հիմունքներով լրիվ պետք է գումարել սույն դատավճռով նշանակված պատժին։
Ղեկավարվելով Հայաստանի Հանրապետության քրեական դատավարության օրենսգրքի 357-360-րդ, 364-365-րդ, 369-372-րդ հոդվածներով՝ դատարանը`
Վ Ճ Ռ Ե Ց
Ամբաստանյալ Սուրեն Գերասիմի Վարդանյանին մեղավոր ճանաչել Հայաստանի Հանրապետության քրեական օրենսգրքի 268-րդ հոդվածի 2-րդ մասի 1-ին և 2-րդ կետերով և դատապարտել` ազատազրկման` մեկ տարի ժամկետով։
ՀՀ քրեական օրենսգրքի 67-րդ հոդվածի հիմունքներով սույն դատավճռով նշանակված` մեկ տարի ժամկետով ազատազրկում պատժին լրիվ գումարել Սուրեն Գերասիմի Վարդանյանի նախորդ՝ Երևանի Կենտրոն և Նորք-Մարաշ համայնքների ընդհանուր իրավասության դատարանի 2010թ. մարտի 30-ի դատավճռով նշանակված` մեկ տարի ժամկետով ազատազրկում պատժի չկրած մասից` մեկ ամիս 18 օր ժամկետով ազատազրկումը և Սուրեն Գերասիմի Վարդանյանի նկատմամբ վերջնական պատիժ սահմանել ազատազրկում` մեկ տարի մեկ ամիս 18 օր ժամկետով։
Սուրեն Գերասիմի Վարդանյանը պատիժը կրելու է Հայաստանի Հանրապետության արդարադատության նախարարության համապատասխան քրեակատարողական հիմնարկում։
Ամբաստանյալ Սուրեն Գերասիմի Վարդանյանի պատիժը կրելու սկիզբը հաշվել 2010թ. սեպտեմբերի 10-ից։
Ամբաստանյալ Սուրեն Գերասիմի Վարդանյանի նկատմամբ ընտրված խափանման միջոց կալանավորումը` թողնել անփոփոխ` մինչև դատավճռի օրինական ուժի մեջ մտնելը։
Իրեղեն ապացույց ճանաչված 0.041 գրամ «Ֆենոբարբիտալ» տեսակի հոգեմետ նյութը և 0,225 գրամ «կոդեին» տեսակի թմրամիջոցը` հանձնել քրեական հետապնդում իրականացնող մարմնի` ՀՀ ոստիկանության քննչական գլխավոր վարչության Երևան քաղաքի վարչության Կենտրոնականի քննչական բաժնի տնօրինությանը` սույն գործից անջատված թիվ 15103510 քրեական գործին կցելու համար։
Դատավճիռը հրապարակման օրվանից մեկամսյա ժամկետում կարող է բողոքարկվել Հայաստանի Հանրապետության վերաքննիչ քրեական դատարան։
ԴԱՏԱՎՈՐ՝ Գ. Ավետիսյան