Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

28 հոկտեմբերի 2010թ. ք. Երևան

0261/01/10

Երևանի Կենտրոն և Նորք-Մարաշ վարչական շրջանների ընդհանուր իրավասության
առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Տ. Գրիգորյան,

մեղադրող`
Երևանի Կենտրոն և Նորք-Մարաշ
վարչական շրջանների դատախազության
ավագ դատախազ Լ. Չարխիֆալակյան,



դատարանում, դռնբաց դատական նիստում քննեց գործն ըստ մեղադրանքի
Անդրանիկ Զավենի Ղազարյանի`
ծնված 1959թ. հունիսի 27-ին Երևանում, հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում դատված` Երևանի Սպանդարյան շրջանի ժողդատարանի 17.01.1992թ. դատավճռով, ՀՀ նախորդ քրեական օրենսգրքի 222-րդ հոդվածի 2-րդ մասով դատապարտվել է ազատազրկման 1 /մեկ/ տարի 6 /վեց/ ամիս ժամկետով, 28.07.1992թ. պայմանական վաղաժամկետ ազատվել է պատժի` 8 ամիս 2 օր չկրած մասից, դատվածությունը մարված, չի աշխատում, բնակվում է Երևանի Կոնդ թաղամասի թիվ 53 տանը, կալանքի տակ չէ, մեղադրվում է ՀՀ քրեական օրենսգրքի 258-րդ hոդվածի 1-ին մասով։



Գործի դատավարական նախապատմությունը
Թիվ 13139910 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2010թ. օգոստոսի 11-ին, ՀՀ քրեական օրենսգրքի 258-րդ հոդվածի 1-ին մասով։
Քննիչի 06.10.2010թ. որոշմամբ, թիվ 13139910 քրեական գործով, Եղիշե Կառլենի Չիլոյանի կողմից Անդրանիկ Զավենի Ղազարյանի առողջությանը դիտավորությամբ թեթև վնաս պատճառելու մասով, Ե. Չիլոյանի նկատմամբ ՀՀ քրեական օրենսգրքի 117-րդ հոդվածով քրեական հետապնդում չի իրականացվել` Անդրանիկ Ղազարյանի բողոքի բացակայության պատճառաբանությամբ։
Անդրանիկ Զավենի Ղազարյանի նկատմամբ, Ե. Չիլոյանին ծեծի ենթարկելու մասով, ՀՀ քրեական օրենսգրքի 118-րդ հոդվածով քրեական հետապնդում չի իրականացվել` Ե. Չիլոյանի բողոքի բացակայության պատճառաբանությամբ։
Անդրանիկ Զավենի Ղազարյանի կողմից ապօրինի կերպով հրազեն պահելու մասով, նրա նկատմամբ քրեական հետապնդում չի իրականացվել` հանցագործության դեպքի բացակայության պատճառաբանությամբ։
Անդրանիկ Զավենի Ղազարյանին մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով` հետևյալ արարքի համար. «որ նա` գտնվելով ոգելից խմիչքների ազդեցության տակ 2009թ. դեկտեմբեր ամսին քննությամբ չպարզված օրը և ժամին Երևան քաղաքի Կոնդ թաղամասի 134 տան դիմաց շուրջ 5 րոպե տևողությամբ անհիմն վիճաբանել է Եղիշե Կառլենի Չիլոյանի հետ, որի ընթացքում բարձրաձայն հնչեցրել է հայհոյանքներ` դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության` Ե. Չիլոյանի տան անդամների և շրջակա տների բնակիչների նկատմամբ։»։
12.10.2010թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
2009թ. դեկտեմբերին, քննությամբ չպարզված օրը և ժամին, Երևանի Կոնդ թաղամասի թիվ 134 տան դիմաց, ամբաստանյալ Անդրանիկ Զավենի Ղազարյանը գտնվելով ոգելից խմիչքի ազդեցության տակ, շուրջ 5 րոպե տևողությամբ անհիմն վիճաբանել է Եղիշե Կառլենի Չիլոյանի հետ, որի ընթացքում բարձրաձայն հայհոյել է` դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության` Ե. Չիլոյանի տան անդամների և շրջակա տների բնակիչների նկատմամբ։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.

Ամբաստանյալ Անդրանիկ Զավենի Ղազարյանի ցուցմունքով այն մասին, որ 2009թ. դեկտեմբերին, կոնկրետ օրը չի հիշում, ոգելից խմիչքներ օգտագործած վիճակում, Երևանի Կոնդ թաղամասի թիվ 138 տան դիմաց, չի հիշում, թե ինչ հարցի շուրջ, վիճաբանել է Եղիշե Չիլոյանի հետ, որի ընթացքում բարձրաձայն տվել է հայհոյանքներ։ Աղմուկի հետևանքով մարդիկ են հավաքվել, իսկ թե կոնկրետ ովքեր` չի հիշում։ 1990-ական թվականներին մասնակցել է Լեռնային Ղարաբաղի ինքնապաշտպանական մարտերին։ Այնուհետև, 1992թ. հունվարին դատապարտվել և ազատազրկման ձևով պատիժ է կրել «Կոշ» քրեակատարողական հիմնարկում։ Ինքնաձիգ ինքը չունի և դեպքի օրն ինքնաձիգից չի կրակել։ Թե ինչու են իր հարևաններ Գեղամն ու նրա կինը այդպիսի ցուցմունքներ տվել` չգիտի։ Նրանց հետ իր հարաբերությունները միշտ լավ են եղել։
/դատական նիստի արձանագրություն, գ.թ. 64/։
Վկա Եղիշե Չիլոյանի ցուցմունքով այն մասին, որ 2009թ. դեկտեմբերին, ստույգ օրը չի հիշում, Երևանի Չկալով և Ռուսթավելի փողոցների խաչմերուկում հանդիպել է Կոնդ թաղամասի բնակիչ Անդրանիկ Ղազարյանին։ Վերջինս գտնվելով ոգելից խմիչքի ազդեցության տակ` անհաջող կատակներ է արել իր հետ։ Ինքը խնդրել է նման կատակներ չանել, սակայն Ա. Ղազարյանը շարունակել է կատակել, որի հետևանքով իրենց միջև վիճաբանություն է ծագել։ Վիճաբանության ժամանակ Ա. Ղազարյանը մի քանի անգամ հարվածներ է հասցրել իր մարմնի տարբեր մասերին ու ընկել է իր վրա, որի հետևանքով կորցնելով հավասարակշռությունն ինքն ընկել է գետնին։ Տեսնելով, որ չի կարողանում հանդարտեցնել Ա. Ղազարյանին` գետնից վերցրել է փայտի կտոր և դրանով հարվածել է նրա գլխին։ Հարվածից Ա. Ղազարյանը սթափվել է և վիճաբանությունն ավարտվել է։ Երբ գնացել է տուն` մորը պատմել է իր և Ա. Ղազարյանի միջև տեղի ունեցած ընդհարման մասին։ Քիչ անց իրենց տան բակից լսել է Անդրանիկ Ղազարյանի ձայնը, որը բարձրաձայն հայհոյանքներ է տվել իր հասցեին։ Ա. Ղազարյանի նման վարքագծի պատճառը պարզելու համար դուրս է եկել բակ, սակայն մոր խնդրանքով վերադարձել է տուն։ Մոտ 5-10 րոպե անց մորը և հարևաններին հաջողվել է Անդրանիկ Ղազարյանին հանգստացնել և նա հեռացել է։
/դատական նիստի արձանագրություն, գ.թ. 42-44/։
Վկա Սոնյա Եղյանի ցուցմունքով այն մասին, որ 2009թ. դեկտեմբերին, ստույգ օրը չի հիշում, իր որդի Եղիշե Չիլոյանը վերադառնալով տուն` պատմել է, որ փողոցում պատահաբար հանդիպել է Անդրանիկ Ղազարյանին, որը գտնվել է ոգելից խմիչք օգտագործած վիճակում։ Իրենք վիճաբանել են, քաշքշել ու փոխադարձ հարվածներ են հասցրել միմյանց, որից հետո բաժանվել են։ Քիչ անց իրենց տան բակից լսել է Անդրանիկ Ղազարյանի բղավոցը, որը բարձրաձայն հայհոյելով դուրս է կանչել իր որդուն։ Անդրանիկից պարզաբանումներ պահանջելու համար որդին դուրս է եկել տանից, սակայն ինքը նրան խնդրել է վերադառնալ տուն։ Անդրանիկ Ղազարյանի հնչեցրած հայհոյանքների արդյունքում հավաքված մի քանի հարևանների օգնությամբ իրեն հաջողվել է հանգստացնել Ա. Ղազարյանին ու հեռացնել իրենց տան բակից։
/դատական նիստի արձանագրություն, գ.թ. 46-47/։
Վկա Անուշ Գրիգորյանի ցուցմունքով այն մասին, որ 2009թ. դեկտեմբերին, ստույգ օրը չի հիշում, փողոցից ջուր տանելու ընթացքում, թիվ 134 տան դիմաց նկատել է Անդրանիկ Ղազարյանին, որը բարձրաձայն հայհոյանքներ է տվել Չիլոյանների հասցեին և աղմկել է։ Ինքը մոտեցել է և Ե. Չիլոյանի մայր Սոնյա Եղյանի հետ հանգստացրել են նրան։
/դատական նիստի արձանագրություն, գ.թ. 77-78/։
Վկա Նոնա Պետրոսյանի նախաքննական ցուցմունքով այն մասին, որ 2009թ. դեկտեմբերին, ստույգ օրը չի հիշում, ամուսինը զայրացած պատմել է, որ անախորժություն է տեղի ունեցել իրենց թաղամասի բնակիչ Անդրանիկի հետ, որը գտնվել է ոգելից խմիչքի ազդեցության տակ։ Քիչ հետո իրենց տան բակից լսել է Անդրանիկ Ղազարյանի ձայնը, որը բղավելով դուրս է կանչել իր ամուսնուն։ Ամուսնու մայրը` Ս. Եղյանն իրեն հեռացրել է տան հեռավոր սենյակներից մեկը, որպեսզի հղիության հետ կապված բարդություններ չլինեն։ Մոտ 5-10 րոպե տևողությամբ լսվել են աղմուկ-աղաղակի ձայներ, որի արդյունքում խանգարվել է իր հանգիստն ու անդորրը։
/գ.թ. 96-97/։
Վկա Քրիստինե Չիլոյանի նախաքննական ցուցմունքով այն մասին, որ 2009թ. դեկտեմբերին, օրը ստույգ չի հիշում, ուշ երեկոյան, երբ վերադարձել է տուն` մայրն իրեն պատմել է, որ իրենց թաղամասի բնակիչ Անդրանիկ Ղազարյանը խմած եկել է իրենց տան բակ, աղմկել ու բարձրաձայն հայհոյել է։ Աղմուկից հավաքված հարևանների հետ միասին կարողացել են հանդարտեցնել Անդրանիկ Ղազարյանին, որն ամեն կերպ ցանկացել է տեսնել եղբորը` Ե. Չիլոյանին։ Մտածելով, որ հարևաններ են և ամեն ինչ կհարթվի` ինքը դեպքի մանրամասների մասին չի հետաքրքրվել։
/գ.թ. 98-99/։

Դատարանի իրավական վերլուծությունները

Վերլուծելով ամբաստանյալ Անդրանիկ Զավենի Ղազարյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Անդրանիկ Զավենի Ղազարյանի կողմից, նրա մեղավորությամբ, խուլիգանություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 258-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները, ամբաստանյալ Անդրանիկ Զավենի Ղազարյանի նկատմամբ պատիժ նշանակելիս դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը։ Ամբաստանյալի պատասխանատվությունը և պատիժը մեղմացնող հանգամանքներ դատարանը չի արձանագրում, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցանքն ալկոհոլի ազդեցության տակ կատարելը։
Հաշվի առնելով գործի հանգամանքներն ու հանցանքն ալկոհոլի ազդեցության տակ կատարած լինելը` դատարանը գտնում է, որ ամբաստանյալ Անդրանիկ Զավենի Ղազարյանն իր կատարած` Հայաստանի Հանրապետության քրեական օրենսգրքի 258-րդ հոդվածի 1-ին մասով նախատեսված հանցագործության համար ենթակա է պատժի այդ հանցագործության համար նախատեսված պատիժներից առավել խիստ պատժի` կալանքի ձևով, որը նա պետք է կրի, քանի որ տվյալ դեպքում պատժի նվազ խիստ տեսակը` տուգանքը, չի կարող ապահովել պատժի նպատակները։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով խափանման միջոցի հարցը` դատարանը գտնում է, որ ամբաստանյալ Անդրանիկ Զավենի Ղազարյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ, 364-366-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Անդրանիկ Զավենի Ղազարյանին մեղավոր ճանաչել Հայաստանի Հանրապետության քրեական օրենսգրքի 258-րդ hոդվածի 1-ին մասով նախատեսված հանցանքում և դատապարտել կալանքի 20 /քսան/ օր ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով կալանավորման պահից։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ