ԵԱՆԴ 0035/01/09
Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Ավան և Նոր Նորք համայնքների ընդհանուր իրավասության դատարանը

նախագահությամբ դատավոր Արարատ Պետրոսյաի
քարտուղարությամբ Մարինե Աղաջանյանի
մասնակցությամբ մեղադրող Սամվել Մկրտչյանի

2009 թվականի հունիսի 4-ին, դատարանում, դռնբաց դատական նիստում քննեց քրեական գործն ըստ մեղադրանքի Մանուկ Սամվելի Կիրակոսյանի, ծնված 02.11.1984թ., Երևան քաղաքում, հայ, ՀՀ քաղաքացի, միջնակարգ կրթությամբ, ամուսնացած, խնամքին երկու անձ, չի աշխատում, Արաբկիր և Քանաքեռ-Զեյթուն համայնքների առաջին ատյանի դատարանի 07.02.2001թ. դատավճռով ՀՀ քրեական օրենսգրքի 87 հոդվածի 2-րդ մասով դատապարտվել է ազատազրկման 3 տարի ժամկետով, ՀՀ քրեական օրենսգրքի 41 հոդվածի կիրառմամբ պատիժը պայմանականորեն չի կիրառվել և սահմանվել է փորձաշրջան 2 տարի ժամկետով, հաշվառված է Երևան քաղաքի Օրբելի փողոցի 64ա շենքի 29-րդ բնակարանում, բնակվում է Երևան քաղաքի Արղության փողոցի թիվ 21 տանը, սույն գործով արգելանքի տակ է 11.02.2009 թվականից:

1. Գործի դատավարական նախապատմությունը.

Նախաքննության մարմինն ամբաստանյալ Մանուկ Սամվելի Կիրակոսյանին մեղադրանք առաջադրել ՀՀ քրեական օրենսգրքի 176-րդ հոդվածի 1-ին մասով, այն բանի համար, որ նա ուրիշի գույքը հափշտակելու նպատակով 2008թ. նոյեմբերի 16-ին, ժամը 22-30-ի սահմաններում մտել է Ավան 7-րդ փողոցի 25 տան բակում գտնվող, Ալվարդ Մնացականյանին պատկանող խանութ, որտեղից բացահայտ հափշտակել է վերջինիս պատկանող 1.100 դրամ ընդհանուր արժողության ՙԴավիդով՚ և ՙՔենթ՚ տեսակի մեկական տուփ ծխախոտներ և դեպքի վայրից դիմել փախուստի:

2. Ապացույցների գնահատում և հետազոտում.

Գնահատելով դատաքննությամբ հետազոտված ապացույցները, դատարանը հանգեց համոզման, որ ամբաստանյալ Մանուկ Կիրակոսյանի արարքը ՀՀ քրեական օրենսգրքի 176-րդ հոդվածի 1-ին մասով, հաստատված է և ճիշտ որակված, իսկ նրա մեղավորությունն ապացուցված:
Դատաքննությամբ հետազոտված ապացույցներով դատարանը հաստատված համարեց, որ ամբաստանյալ Մանուկ Կիրակոսյանը 2008թ. նոյեմբերի 16-ին, ժամը 20-ի սահմաններում հանդիպել է իր ծանոթ Վանիկ Ամոլիկյանին և միասին, իր վարձակալած Վազ-2107 մակնիշի ավտոմեքենայով գնացել են Նոր Նորքի 5-րդ զանգվածում գտնվող թոնրատուն, միասին ճաշել և օգտագործել են ոգելից խմիչք, որից հետո նույն մեքենայով ուղևորվել են դեպի Զեյթուն թաղամաս: Ճանապարհին, ծխախոտ գնելու համար կայանելով Ավան Խուդյակով թաղամասի 7-րդ փողոցում, Մանուկ Կիրակոսյանն ու Վանիկ Ամոլիկյանը մտել են սույն գործով տուժողԱլվարդ Մնացականյանին պատկանող խանութ: Մանուկ Կիրակոսյանը խնդրել է Ալվարդ Մնացականյանին մեկական տուփ ՙԴավիդով՚ ևՙՔենթ՚ տեսակի ծխախոտ վաճառել իրեն: Վերջինս ծխախոտի տուփերը դրել է վաճառասեղանին: Այնուհետև Մանուկ Կիրակոսյանը խնդրել է նաև կես կիլոգրալ կոնֆետ կշռել: Վաճառող Ալվարդ Մնացականյանը շրջվել և ցանկացել է կատարել պատվերը, այդ պահին էր Մանուկ Կիրակոսյանը բացահայտ հափշտակելով 1.100 ՀՀ դրամ ընդհանու արժողությամբ վերոհիշյալ երկու տուփ ծխախոտները, նստել է մեքենան և կանչել է Վանիկ Ամոլիկյանին և չարձագանքելով գնումների դիմաց վճարելու մասին Ալվարդ Մնացականյանի պահանջին, նրանք մեքենայով դիմել են փախուստի:
Դատարանի նշված հետևությունները հաստատվեցին վերաբերելիության, թույլատրելիության տեսանկյունից գնահատված և իրենց համակցությամբ գործի լուծման համար բավարար հանդիսացող ներքոհիշյալ ապացույցներով:
Առաջադրված մեղադրանքում Մանուկ Կիրակոսյանն իրեն մեղավոր ճանաչեց և դատարանին ցուցմունքներ տվեց, որ իրոք 2008 թվականի նոյեմբերի 16-ին, ժամը 22-30-ի սահմաններում, Երևան քաղաքի Ավան Խուդյակով թաղամասի 7-րդ փողոցում գտնվող խանութից բացահայտ հափշտակել է երկու տուփ ծխախոտ:
Գործով տուժող Ալվարդ Մնացականյանի ցուցմունքներով, այն մասին, որ 2008 թվականի նոյեմբերի 16-ին, ժամը 22-30-ի սահմաններում, իրեն պատկանող խանութ են մտել Մանուկ Կիրակոսյանն ու նրա ընկերը: Մանուկ Կիրակոսյանը խնդրել է մեկական տուփ ՙԴավիդով՚ ևՙՔենթ՚ տեսակի ծխախոտ, որոնց ընդհանուր արժեքը կազմել է 1.100 դրամ: Նշված ծխախոտի տուփերը դրել է վաճառասեղանին, որից հետո Մանուկ Կիրակոսյանը խնդրել է նաև կես կիլոգրալ կոնֆետ կշռել: Շրջվել և ցանկացել է կշռել կոնֆետը, այդ պահին հայելու մեջ նկատել է, որ Մանուկ Կիրակոսյանը վերցնելով ծխախոտները դուրս է եկել խանութից: Դուրս գալով խանութից կանչել է, որպեսզի նա վերադառնա և վճարի ծխախոտների համար, սակայն նա իր ընկերոջ հետ միասին մեքենայով դիմել է փախուստի:
Գործով վկա Վանիկ Ամոլիկյանի ցուցմունքներով, այն մասին, որ 2008 թվականի նոյեմբերի 16-ին, ժամը 22-30-ի սահմաններում, Երևան քաղաքի Ավան Խուդյակով թաղամասի 7-րդ փողոցում գտնվող խանութից Մանուկ Կիրակոսյանը հափշտակել է մեկական տուփ ՙԴավիդով՚ ևՙՔենթ՚ տեսակի ծխախոտ:
Անձին ճանաչման ներկայացնելու մասին արձանագրությամբ:

3. Դատարանի իրավական վերլուծությունները.

Այդպիսով, դատարանը հանգում է հետևության, որ Մանուկ Կիրակոսյանին պետք է մեղավոր ճանաչել ՀՀ քրեական օրենսգրքի 176-րդ հոդվածի 1-ին մասով և նա այդ հոդվածի սանկցիայով պետք է կրի քրեական պատասխանատվություն:
Պատժի տեսակը և չափը որոշելիս դատարանը հաշվի է առնում կատարված հանցագործության` հանրության համար վտանգավորության աստիճանը և բնույթը, հանցավորի անձը բնութագրող տվյալները, այդ թվում` պատասխանատվությունը և պատիժը մեղմացնող կամ ծանրացնող հանգամանքները:
Դատարանն ամբաստանյալ Կիրակոսյանի պատասխանատվությունը և պատիժը մեղմացնող հանգամանք է դիտում նրա խնամքի տակ մինչև տասնչորս տարեկան երեխայի առկայությունը:
Դատաքննությամբ ամբաստանյալ Կիրակոսյանի պատասխանատվությունը և պատիժը ծանրացնող հանգամանքներ ի հայտ չեն եկել:
Դատարանը գտնում է, որ ամբաստանյալ Կիրակոսյանի նկատմամբ որպես պատիժ պետք է նշանակել ազատազրկում, նկատի առնելով, որ պատժի նվազ խիստ տեսակը չի կարող ապահովել պատժի նպատակները:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 373 հոդվածներով, դատարանը

Վ Ճ Ռ Ե Ց

Ամբաստանյալ Մանուկ Սամվելի Կիրակոսյանին մեղավոր ճանաչել ՀՀ քրեական օրենսգրքի 176-րդ հոդվածի 1-ին մասով և դատապարտել ազատազրկման չորս ամիս ժամկետով: Նշանակված պատժի ժամկետի մեջ հաշվակցել նրա ձերբակալման տակ գտնվելու երեք օրյա ժամկետը և վերջնական դատապարտել ազատազրկման երեք ամիս, քսանյոթ օր ժամկետով:
Պատժի կրման սկիզբ հաշվել 11.02.2009 թվականից:
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում:
Ընտրված խափանման միջոց` կալանքը թողնել անփոփոխ:
Դատավճիռը կարող է բողոքարկվել ՀՀ վերաքննիչ քրեական դատարան, այն հրապարակվելու օրվանից հետո` մեկամսյա ժամկետում:

ԴԱՏԱՎՈՐ Ա. ՊԵՏՐՈՍՅԱՆ