Գործ ԵԱՆԴ/0034/01/09

Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ`

ՆԱԽԱԳԱՀՈՂ ԴԱՏԱՎՈՐ Մ.ՌԵՀԱՆՅԱՆ
ԴԱՏԱՎՈՐՆԵՐ Ա.ԴԱՆԻԵԼՅԱՆ
Մ.ԱՐՂԱՄԱՆՅԱՆ

ՔԱՐՏՈՒՂԱՐ Ռ.ՀԱԽՆԱԶԱՐՅԱՆ

Մասնակցությամբ`
ԴԱՏԱԽԱԶ Մ.ԵՆԳԻԲԱՐՅԱՆԻ
ԱՄԲԱՍՏԱՆՅԱԼ Դ.ՂԱԶԱՐՅԱՆԻ

2009թ. հուլիսի 09-ին ք.Երևան
Դռնբաց դատական նիստում, քննության առնելով ամբաստանյալ Դավիթ Սաշայի Ղազարյանի վերաքննիչ բողոքն` իր վերաբերյալ ՀՀ քրեական օրենսգրքի 177-րդ հոդվածի 2-րդ մասի 4-րդ կետով, Երևան քաղաքի Ավան և Նոր Նորք համայնքների ընդհանուր իրավասության դատարանի 2009թ. մայիսի 18-ի դատավճռի դեմ,

Պ Ա Ր Զ Ե Ց

1.Գործի դատավարական նախապատմությունը.
2009թ.փետրվարի 17-ին Նոր Նորք քննչական բաժնում` ՀՀ քրեական օրենսգրքի 177-րդ հոդվածի 2-րդ մասի 4-րդ կետի հատկանիշներով, հարուցվել և վարույթ է ընդունվել թիվ 17105609 քրեական գործը:
2009թ. փետրվարի 17-ին Դավիթ Սաշայի Ղազարյանը ձերբակալվել է:
2009թ. փետրվարի 20-ին նախաքննական մարմնի որոշմամբ Դավիթ Սաշայի Ղազարյանը` ՀՀ քրեական օրենսգրքի 177-րդ հոդվածի 2-րդ մասի 4-րդ կետով, ներգրավվել է որպես մեղադրյալ, և նույն օրը նրա նկատմամբ` որպես խափանման միջոց, կալանավորում կիրառվելու մասին միջնորդություն ներկայացվել` Երևան քաղաքի Ավան և Նոր Նորք համայնքների ընդհանուր իրավասության դատարան:
Երևան քաղաքի Ավան և Նոր Նորք համայնքների ընդհանուր իրավասության դատարանի 2009թ. փետրվարի 20-ի որոշմամբ մեղադրյալ Դավիթ Ղազարյանի նկատմամբ որպես խափանման միջոց կիրառվել է կալանավորում և ընտրված կալանավորում խափանման միջոցը փոխարինվել` գրավով:
2009թ. ապրիլի 14-ին թիվ 17105609 քրեական գործը` մեղադրական եզրակացությամբ, ուղարկվել է Երևան քաղաքի Ավան և Նոր Նորք համայնքների ընդհանուր իրավասության դատարան:
Երևան քաղաքի Ավան և Նոր Նորք համայնքների ընդհանուր իրավասության դատարանի 2009 թվականի մայիսի 18-ի դատավճռով Դավիթ Սաշայի Ղազարյանը մեղավոր է ճանաչվել ՀՀ քրեական օրենսգրքի 177-րդ հոդվածի 2-րդ մասի 4-րդ կետով և դատապարտել ազատազրկման 2(երկու) տարի ժամկետով:
Դավիթ Սաշայի Ղազարյանի նկատմամբ ընտրված, այլընտրանքային խափանման միջոց, գրավը թողնվել է անփոփոխ, մինչև դատավճռի օրինական ուժի մեջ մտնելը:
Վճռվել է.գործով իրեղեն ապացույց ճանաչված և Նոր Նորք քննչական բաժնի իրեղեն ապացույցների սենյակում ի պահ հանձնված 3(երեք) շիշ <<Նաիրի>>, 1 (մեկ) շիշ <<Նոյ Կլասիկ>> և 1 (մեկ) շիշ <<Ախթամար>> տեսակի կոնյակները հանձնել տուժող <<Սթար Դիվայդ>> ՓԲ ընկերությանը` ի տնօրինություն:
Երևան քաղաքի Ավան և Նոր Նորք համայնքների ընդհանուր իրավասության դատարանի դատավճռի դեմ վերաքննիչ բողոք է բերել ամբաստանյալ Դավիթ Ղազարյանը:
2. Գործի փաստական հանգամանքները
Նախաքննական մարմինը Դավիթ Սաշայի Ղազարյանին մեղադրանք է առաջադրել այն բանի համար, որ նա ուրիշի գույքի գաղտնի հափշտակություն կատարելու նպատակով, 2009 թվականի փետրվարի 12-ին ժամը 2200 սահմաններում, մուտք է գործել Երևան քաղաք, Գայի պողոտա 16 հասցեում գտնվող <<Սթար>> սուպերմարկետ, որտեղից գողացել է զգալի չափի` 15.900 ՀՀ դրամ արժողության 1 շիշ 0.5 լիտր տարողության <<Նոյ>> և 5.590 ՀՀ դրամ արժողության 1 շիշ 0.25 լիտր տարողության <<Ախթամար>> տեսակի կոնյակներ:
Այնուհետև, Դավիթ Ղազարյանը, կրկին անգամ, ուրիշի գույքի գաղտնի հափշտակության նպատակով 2009 թվականի փետրվարի 13-ին, ժամը 2100-ից մինչև 2200-ն ընկած ժամանակահատվածում, մուտք է գործել Երևան քաղաք, Նոր Նորք, 7-րդ զանգված, Ավետիսյան 48/1 հասցեում գտնվող <<Սթար>> սուպերմարկետ, որտեղից գողացել է զգալի չափի` 27.380 ՀՀ դրամ ընդհանուր արժողության 2 շիշ 0.25 լիտր տարողության <<Նաիրի>> տեսակի կոնյակներ:
Դրանից հետո, Դավիթ Ղազարյանը, կրկին անգամ, ուրիշի գույքի գաղտնի հափշտակության նպատակով 2009 թվականի փետրվարի 14-ին, ժամը 2200-ի սահմաններում, մուտք է գործել Երևան քաղաք, Նոր Նորք, 7-րդ զանգված, Ավետիսյան 48/1 հասցեում գտնվող <<Սթար>> սուպերմարկետ, որտեղից գողացել է զգալի չափի` 13.690 ՀՀ դրամ արժողության 1 շիշ 0.25 լիտր տարողության <<Նաիրի>> տեսակի կոնյակ:
3.Վերաքննիչ բողոքի հիմքերը, փաստարկները և պահանջը.
Վերաքննիչ բողոքը քննվում է հետևյալ հիմքերի սահմաններում ներքոհիշյալ հիմնավորումներով.
Վերաքննիչ բողոքում հեղինակը նշել է, որ իր նկատմամբ նշանակված պատիժը չի համապատասխանում կատարած հանցագործության ծանրությանը: Դատարանը հաշվի չի առել մեղմացուցիչ հանգամանքները, նախկինում արատավորված չլինելը, խնամքին երկու անձի առկայությունը, դրական բնութագիրը, վնասի կամովին հարթելու հանգամանքը:
Խնդրել է իր նկատմամբ կիրառել ՀՀ քրեական օրենսգրքի 70-րդ հոդվածը` պայմանականորեն չկիրառել սահմանված պատիժը, սահմանելով փորձաշրջան որոշակի ժամկետով: Այնուհետև դիմում է հղել դատարան խնդրելով իր նկատմամբ կիրառել ՀՀ ԱԺ 19.06.2009թ. համաներում հայտարարելու մասին որոշումը և իրեն ազատել նշանակված պատժի կրումից:
4.Վերաքննիչ բողոքի դեմ բերված պատասխանը
Բերված վերաքննիչ բողոքի դեմ առարկեց գործով մասնակցող մեղադրողը
հայտնելով, որ ամբաստանյալի նկատմամբ Երևան քաղաքի Ավան և Նոր Նորք համայնքների ընդհանուր իրավասության դատարանի կողմից նշանակվել է համաչափ պատիժ, միաժամանակ միջնորդեց ամբաստանյալ Դավիթ Ղազարյանի նկատմամբ կիրառել ՀՀ ԱԺ 19.06.2009թ. համաներում հայտարարելու մասին որոշումը և նրան ազատել ընդհանուր իրավասության դատարանի դատավճռով նշանակված պատժի կրումից:
5. Վերաքննիչ դատարանի պատճառաբանությունները և եզրահանգումը
Քննելով վերաքննիչ բողոքը նշված հիմքերի սահմաններում, ՀՀ վերաքննիչ քրեական դատարանը գտնում է , որ Երևան քաղաքի Ավան և Նոր Նորք համայնքների ընդհանուր իրավասության դատարանի 2009թ. մայիսի 18-ի դատավճիռը պետք է թողնել անփոփոխ, իսկ ամբաստանյալի վերաքննիչ բողոքը մերժել հետևյալ պատճառաբանությամբ.
Հայաստանի Հանրապետության քրեական օրենսգրքի 70-րդ հոդվածը սահմանում է. եթե դատարանը կալանքի, ազատազրկման կամ կարգապահական գումարտակում պահելու ձևով պատիժ նշանակելիս, հանգում է այն եզրակացության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին: Պատիժը պայմանականորեն չկիրառելիս հաշվի է առնում հանցավորի անձը բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները:
Դատարանը նման հետևության հանգում է միայն գոյություն ունեցող տվյալների օբյեկտիվ վերլուծության հիման վրա, որոնք բնութագրում են արարքը, հանցավորի անձը և վկայում են պատիժը պայմանականորեն չկիրառելու հիմքերի առկայության մասին:
Պատիժը պայմանականորեն կարող է չկիրառվել, եթե առկա է դատարանի համոզվածությունը, վստահությունն առանց ռեալ պատիժ նշանակելու դատապարտյալի ուղղվելու հնարավորության մասին: Դատարանը նման հետևության հանգում է միայն գոյություն ունեցող տվյալների օբյեկտիվ վերլուծության հիման վրա, որոնք բնութագրում են արարքը, հանցավորի անձը և վկայում են պատիժը պայմանականորեն չկիրառելու հիմքերի առկայության մասին:
ՀՀ քրեական օրենսգրքի 48-րդ հոդվածի 2-րդ մասի համաձայն պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները:
Պատիժը պայմանականորեն չկիրառելու մասին որոշում կայացնելիս իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը:
Վերաքննիչ դատարանը, ամբաստանյալ Դավիթ Ղազարյանի վերաքննիչ բողոքի առկայության պայմանում, քննության առնելով վերջինիս նկատմամբ նշանակված պատժի հարցը, հաշվի է առնում ամբաստանյալի կատարած հանցագործության բնույթը և հասարակական վտանգավորության աստիճանը, կատարման հանգամանքները, դատական ակտում շարադրված ամբաստանյալի անձը բնութագրող, պատասխանատվությունը և պատիժը մեղմացնող հանգամանքներն, ինչպես նաև պատասխանատվությունը և պատիժը ծանրացնող հանգամանքների բացակայությունը, հանգում է հետևության, որ ամբաստանյալի նկատմամբ նշանակվել է համաչափ պատիժ` ազատազրկում երկու տարի ժամկետով, և գտնում է որ նվազագույն պատժաչափ նշանակելը և ազատազրկման ձևով նշանակված պատիժը պայմանականորեն չկիրառելը, տվյալ դեպքում չի կարող ապահովել պատժի նպատակները:
<<Համաներում հայտարարելու մասին>> ՀՀ Ազգային ժողովի կողմից ընդունված 19.06.2009թ. որոշման 1-ին կետի 1-ին ենթակետի համաձայն որոշվել է
պատժից ազատել առավելագույնը երեք տարի ժամկետով ազատությունից զրկելու հետ կապված պատիժների դատապարտված անձանց:
Տվյալ դեպքում հաշվի առնելով, որ ամբաստանյալ Դավիթ Ղազարյանը Երևան քաղաքի Ավան և Նոր Նորք համայնքների ընդհանուր իրավասության դատարանի 2009թ. մայիսի 18-ի դատավճռով դատապարտվել է ազատազրկման երկու տարի ժամկետով, վերաքննիչ դատարանը հանգում է հետևության, որ <<Համաներում հայտարարելու մասին>> ՀՀ Ազգային ժողովի կողմից ընդունված 19.06.2009թ. որոշման 1-ին կետի 1-ին ենթակետի կիրառմամբ ամբաստանյալ Դավիթ Ղազարյանին պետք է ազատել ընդհանուր իրավասության դատարանի նշանակած պատժի կրումից:
ՀՀ Վերաքննիչ քրեական դատարանը` ղեկավարվելով ՀՀ Սահմանադրության 92-րդ հոդվածով, ՀՀ քրեական դատավարության օրենսգրքի 390-րդ, 393-394-րդ 402-րդ հոդվածներով, ՀՀ ԱԺ 19.06.2009թ. որոշման 1-ին կետի 1-ին ենթակետով,

Ո Ր Ո Շ Ե Ց

Դավիթ Սաշայի Ղազարյանի նկատմամբ ՀՀ քրեական օրենսգրքի 177-րդ հոդվածի 2-րդ մասի 4-րդ կետով, Երևան քաղաքի Ավան և Նոր Նորք համայնքների ընդհանուր իրավասության դատարանի 2009թ. մայիսի 18-ի դատավճիռը թողնել օրինական ուժի մեջ, իսկ ամբաստանյալի վերաքննիչ բողոքը մերժել:
Ամբաստանյալ Դավիթ Սաշայի Ղազարյանի նկատմամբ կիրառել ՀՀ Ազգային Ժողովի կողմից 19.06.2009թ. համաներում հայտարարելու մասին որոշման 1-ին կետի 1-ին ենթակետը և նրան ազատել Երևան քաղաքի Ավան և Նոր Նորք համայնքների ընդհանուր իրավասության դատարանի 2009թ. մայիսի 18-ի դատավճռով նշանակված` երկու տարի ժամկետով ազատազրկում, պատժից:
Որոշումը կարող է բողոքարկվել ՀՀ վճռաբեկ դատարան` հրապարակման պահից, մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ ստորագրություն
ԴԱՏԱՎՈՐՆԵՐ ստորագրություններ
Իսկականի հետ ճիշտ է:
ՆԱԽԱԳԱՀՈՂ ԴԱՏԱՎՈՐ Մ.ՌԵՀԱՆՅԱՆ